(რეზონანსი) თბილისში დღეს „ქართველთა მარშია" დაგეგმილი. აქციის მონაწილეები 20:00 საათზე აღმაშენებლის გამზირზე, რკინიგზელთა სახლის მიმდებარე ტერიტორიაზე შეიკრიბებიან და მსვლელობით მთავრობის ადმინისტრაციასთან გადაინაცვლებენ. ისინი ქვეყანაში საიმიგრაციო კანონის გამკაცრებას და უცხოეთიდან არასამთავრობო ორგანიზაციების დაფინანსების აკრძალვას მოითხოვენ.აქციის ერთ-ერთი ორგანიზატორი მოძრაობა „ეროვნულებია".

„მშვიდობიანი მანიფესტაციის გზით, ჩვენ ვცდილობთ, რომ ხელისუფლებას გამოვუფხიკოთ ყურები, გამოვაფხიზლოთ საღათას ძილიდან და მოვუწოდოთ მათ, რომ სახელმწიფო მართონ კანონების მიხედვით და არა პირადი ამბიციების დონეზე" , - აცხადებს მოძრაობა „ეროვნულების" თავმჯდომარე სანდრო ბრეგაძე.

შსს-ს ინფორმაციით, თბილისში, აღმაშენებლის გამზირზე დღეს დაგეგმილი „ქართული მარშის" დროს უსაფრთხოების ზომები მაქსიმალურად იქნება დაცული. მათი თქმით, წესრიგს პოლიცია დაიცავს, რომელიც კანონის ფარგლებში იმოქმედებს.