(რეზონანსი)ფესტივალი განმუხურში, დაახლოებით, ერთი თვის განმავლობაში გაგრძელდება და 500-მდე მუსიკოსი და დიჯეი მიიღებს მონაწილეობას. განმუხურში უკვე ჩასულია 10 ათასამდე სტუმარი.

„ჩვენს 8 სცენაზე 500-ზე მეტი არტისტი დაუკრავს. მათ შორის საერთაშორისო არტისტები, როგორიც არის მარტინ გარიქსი" , - განაცხადა ჯემფესტის ორგანიზატორმა, გიორგი სიგუამ.

შსს-ს ინფორმაციით, წელს ფესტივალის უსაფრთხოებაზე აშშ-ის ანტინარკოტიკული და სამართალდამცავი ორგანოებიც იზრუნებენ. შს მინისტრის მოადგილემ, მერაბ მალანიამ ამერიკელ ექსპერტებს ფესტივალის უსაფრთხოების გეგმა და ფესტივალისთვის განსაზღვრული ტერიტორია დაათვალიერებინა.

ანაკლიის მუსიკალური ფესტივალის უსაფრთხოებისთვის შსს-ს სპეციალური გეგმა აქვს, რომელშიც ჩართული არიან შსს-ს საგანგებო სიტუაციების მართვის სააგენტო, საპატრულო პოლიციის, კრიმინალური პოლიციის და დაცვის პოლიციის დეპარტამენტები.

„GEM Fest-2017" წელს უპრეცედენტოდ ხანგრძლივად, ერთი თვის განმავლობაში გაგრძელდება. ელექტრონული მუსიკის ფესტივალი დღეს გაიხსნა და 14 აგვისტოს ჩათვლით გაგრძელდება.