"ქართველთა მარშის" ერთ-ერთი ორგანიზატორი ლადო სადღობელაშვილი გაერო-ში საქართველოს ახალგაზრდობის ყოფილ წარმომადგენელს, თათია დოლიძეს, ოს სეპარატისტებთან კავშირში ადანაშაულებს და უშიშროებისგან მის დაკითხვას მოითხოვს. იგი მტკიცებულებად ოსი ჟურნალისტის - თემურ ცხურბატისა და თათია დოლიძის ერთობლივ ფოტოს და ცხურბატის ვიდეოს აქვეყნებს. თუმცა აღსანიშნავია, რომ სადღობელაშვილის მიერ სეპარატისტად მოხსენიებული ჟურნალისტი ბოლო წლებში აქტიურად არის ჩართული ოსებსა და ქართველებს შორის ნდობის აღდგენის პროცესში.