(რეზონანსი) "ბავშვთა სამყაროს" დაკავებული დირექტორი - გიორგი მაჭავარიანი და უსაფრთხოების სამსახურის თანამშრომელი - მალხაზ თევზაძე გირაოს სანაცვლოდ გათავისუფლდებიან. მოსამართლემ გიორგი მაჭავარიანს 50 ათას ლარიანი, ხოლო მალხაზ თევზაძეს კი 10 ათას ლარიანი გირაო შეუფარდა.
ბრალდებულები თანხის გადახდის შემდეგ გათავისუფლდებიან. სასამართლოს გადაწყვეტილებას დარბაზში ოვაციები მოჰყვა. დღევანდელ სასამართლო სხდომაზე დაცვის მხარე სწორედ გირაოს შეფარდებას, ბრალდების მხარე კი პატიმტრობას ითხოვდა.
როგორც საქმის პროკურორი - გიორგი მუჯირმა განაცხადა, არსებობს ბრალდებული პირების მიმალვის და მათი მხრიდან მოწმეებზე ზემოქმედების საფრთხე. მუჯირის ინფორმაციით, გამოძიების ფარგლებში ჩატარებული მოქმედებებით დასტურდება, რომ დარღვეული იყო სახანძრო უსაფრთხოების წესები და იკვეთება სამსახურებრივი გულგრილობის ფაქტი. რაც შეეხება ხანძრის გამომწვევ მიზეზებს, პროკურორი აღნიშნავს, რომ აღნიშნულთან დაკავშირებით გამოძიება ინტენსიურ რეჟიმში მიმდინარეობს.
შეგახსენებთ, პროკურატურის საგამოძიებო ნაწილის თანამშრომლებმა სახანძრო უსაფრთხოების წესისდარღვევის ფაქტზე „ბავშვთა სამყაროს" დირექტორი, ხოლო სამსახურებრივიგულგრილობის ფაქტზე შიდა უსაფრთხოების სამსახურის თანამშრომელი გუშინ დააკავა.