(რეზონანსი) დეკანოზ გიორგი მამალაძის ადვოკატები საქმის პროკურორ ზვიად გუბელაძეს სახელმწიფო უსაფრთხოების სამსახურის საიდუმლო ინფორმაციის გასაჯაროვებაში ადანაშაულებენ.

საუბარია შსს-ს ყოფილი მაღალჩინოსნის - ირაკლი ფირცხალავას განცხადებაზე, სადაც ის დეკანოზის საქმის მთავარ მოწმეს, ჟურნალისტ ირაკლი მამალაძეს აგენტს უწოდებს.

პროკურორმა გუბელაძემ საჯაროდ განაცხადა, რომ ფირცხალავას განცხადება ტყუილია და ოფიციალური ინფორმაციით ირაკლი მამალაძე სუს-ის ოფიციალური ან არაოფიციალური თანამშრომელი არასოდეს ყოფილა.

დეკანოზის ადვოკატებ განმარტავენ, რომ სუს-იდან გამოთხოვილ ინფორმაციას გრიფით საიდუმლო ედო და ბრალდებულის ყველა ადვოკატს გაუთქმელობასთან დაკავშირებით ხელწერილი დააწერინეს. გიორგი ფანცულაიას თქმით, საიდუმლო დოკუმენტის გასაჯაროვება სისხლის სამართლის დანაშაულია. ის პროკურორის პასუხისმგებლობის საკითხის დაყენებას ითხოვს.