(რეზონანსი) აშშ-ის პრეზიდენტმა - დონალდ ტრამპმა ახალი კანონპროექტი სახელწოდებით - „აღმასვლა" (The Raise) წარადგინა, რომელიც „გრინ ქარდის" გათამაშების სისტემის შეცვლას ითვალისწინებს.

ახალი კანონპროექტის თანახმად, აშშ-ში ცხოვრების უფლების მიღების უფრო მეტი შანსი ექნებათ იმ მიგრანტებს, რომლებმაც ინგლისური ენა იციან, შეუძლიათ საკუთარი თავისა და ოჯახის ფინანსურად უზრუნველყოფა, ფლობენ ისეთ პროფესიულ უნარებს, რომლებიც აშშ-ის ეკონომიკას გამოადგება.

კანონპროექტს დონალდ ტრამპმა ბოლო ნახევარი საუკუნის განმავლობაში იმიგრაციული სისტემის ყველაზე დიდი რეფორმა უწოდა. დოკუმენტის შემუშავებაში სენატორები დევიდ პერდიუ და ტომ კოტონი მონაწილეობდნენ.

„გრინ ქარდის" ლატარეა აშშ-ში 1990 წლიდან მოქმედებს. ყოველწლიურად ლატარეაში ვლინდება 50 ათასი გამარჯვებული, რომელიც აშშ-ში ცხოვრებისა და მუშაობის უფლებას იღებს.