(რეზონანსი) ჯომარდობის ფედერაციის პრეზიდენტი დავით ქაცარავა შსს-ს ბორჯომის რაიონულ სამმართველოში დაკითხვაზეა დაბარებული.
ბორჯომის პოლიციიდან დამიკავშირდნენ და მითხრეს, რომ მიმეცა ჩვენება იმასთან დაკავშირებით, რაც გუშინ ფერდობზე ვიპოვეთ. ნივთმტკიცება უნდა გადავცე, - ამის შესახებ ბორჯომის ხეობაში, სტიქიის ზონაში მოხალისის სტატუსით მყოფმა ქაცარავამ განაცხადა.
მისი თქმით, მხოლოდ ექსპერტიზის დასკვნის შემდეგ დადასტურდება, არის თუ არა ბორჯომის ხეობაში ხანძარი დივერსიის ნაწილი.
როგორც შსს-ში ამბობენ, ქაცარავას გამოკითხვაზე დაბარება მის მიერ დღეს გაკეთებულ იმ განცხადებას უკავშირდება, რომლის თანახმადაც, ბორჯომის ხეობაში ერთ-ერთ კერასთან ბოთლის ნამტვრევები იპოვეს, რომელსაც სპეციფიური, სავარაუდოდ, ბენზინის სუნი ჰქონდა.
როგორც შსს-ში აცხადებენ, ბორჯომის ხეობაში გაჩენილ ხანძართან დაკავშირებით გამოძიება მიმდინარეობს სსკ-ის 187-ე მუხლით (ნივთის დაზიანება ან განადგურება) მე-2 ნაწილით.