(რეზონანსი) პოპულარული ბათუმელებმა გამხადეს, გარკვეულწილად ვალში ვარ და მინდა, ჩემს ქალაქს დავეხმარო, - ამის შესახებ მომღერალმა კახა ცისკარიძემ განაცხადა, რომელიც ბათუმის მერის არჩევნებში მონაწილეობას აპირებს.

„კახა ბერი-კახა მერი"-ეს იქნება საარჩევნოდ მისი ერთ-ერთი სლოგანი. არჩევნებში მონაწილეობაზე განცხადება მომღერალმა დღეს გააკეთა. ცისკარიძე მერობის დამოუკიდებელი კანდიდატია.

მან დღეს ბათუმელებს მხარდაჭერისკენ მოუწოდა და განაცხადა, რომ პირველ ეტაპზე დარეგისტრირებისთვის 2 000 ადამიანის ხელმოწერა სჭირდება, რომლის შეგროვებასაც სამ დღეში აპირებს.

ცისკარიძეს საარჩევნო პროგრამაზე არ ულაპარაკია, მხოლოდ ის განაცხადა, რომ ბათუმი "ხელოვნების ქალაქად" უნდა გადაიქცეს.

"პროგრამას დარეგისტრირების შემდეგ გაგაცნობთ. რამ გადამაწყვეტინა? პოპულარული ამ ქალაქმა გამხადა, მინდა ჩემი ენერგია მას მოვახმარო",- განაცხადა ცისკარიძემ.