(რეზონანსი) რუსეთში ქართული რუსულენოვანი საინფორმაციო ვებგვერდი „sova.news"-ი დაბლოკეს. ამის შესახებ ვებგვერდი თავად ავრცელებს ინფორმაციას.

„sova.news"-ის ცნობით, რუსეთში მათი დაბლოკვის მიზეზი გასული წლის 22 აგვისტოს გამოქვეყნებული სტატია გახდა, სათაურით - „ისლამური სახელმწიფოს სამხედრო მინისტრმა თარხან ბათირაშვილმა მოჯაჰიდებს ანდერძი დაუტოვა". რუსეთში მედიასაშუალებებს აკრძალული აქვთ „ისლამური სახელმწიფოს" ხსენება იმგვარად, რომ თან არ დაურთონ სიტყვები: „რუსეთში აკრძალული ტერორისტული ორგანიზაცია".

„sova.news"-ი რუსეთის პროკურატურის მიერ 6 სექტემბერს მიღებული გადაწყვეტილების საფუძველზე დაიბლოკა.

გამოცემა „ნეტგაზეთის" ცნობით, იმისათვის, რომ „სოვა" ისევ გახდეს რუსეთში მომხმარებლებისთვის ხელმისაწვდომი, მედიასაშუალება საიტიდან სადაო სტატიის აღებას აპირებს და ასევე, შემდეგში ყველა სტატიაში, სადაც „ISIS"-ი იქნება ნახსენები, აღნიშნავს, რომ საუბარია „აკრძალულ ტერორისტულ ორგანიზაციაზე".

ამის შემდეგ ვებგვერდი მიმართავს რუსეთის აღმასრულებელ ფედერალურ ორგანოს, რომ მათ გვერდზე ბლოკი მოიხსნას.