(რეზონანსი) თბილისის მერიისა და თბილისის სატრანსპორტო კომპანიის ინიციატივით, მეტროსადგურების რეაბილიტაციის პროექტი გრძელდება. პროექტის ფარგლებში მეტროსადგურ "გურამიშვილის" კაპიტალური რეაბილიტაცია იგეგმება, რომლის ღირებულებაც 1 356 251 ლარია. ინფორმაციას „პირველი არხი" ავრცელებს.

სარემონტო სამუშაოებს ტენდერში გამარჯვებული კომპანია - შპს ,,დიკა 2010" ასრულებს, რომელიც კონტრაქტს ხელს მიმდინარე კვირის ბოლომდე მოაწერს. პროექტის დასრულების თარიღი - ხელშეკრულების გაფორმებიდან (ამ მომენტისათვის მიმდინარეობს დოკუმენტაციის დაზუსტება) 220 კალენდარულ დღეში მოხდება.

თბილისის სატრანსპორტო კომპანიის ინფორმაციით, მეტროსადგურ „გურამიშვილის" რეაბილიტაცია ითვალისწინებს შემდეგ სამუშაოებს:

• აზბესტის დაზიანებული ქოლგების მთლიან დემონტაჟს

• თაღის ჭირხვნას წყლის მოდინების კერების გასაშრობად

• ახალი, თანამედროვე წყალამრიდი ლითონის მომინანქრებული ქოლგების მოწყობას;

•ცენტრალური, შესასვლელი კარების შეცვლას;

• ყველა სამოსამსახურეო ოთახის რემონტს;

• ძველი ელექტრო გაყვანილობა ჩანაცვლებას ახალი ელ. გაყვანილობთ;

• თანამედროვე ვიდეო მომსახურების სისტემების მონტაჟს;

• კედლების, ჭერის, კიბის მოაჯირების, დახრილი გვირაბის, ქვედა ბაქანის რემონტს, იატაკის ფილების მოხვეწას;

• ვესტიბიულის თანამედროვე დიზაინით მოწყობას.