(რეზონანსი) ცხინვალიდან თბილისში სამკურნალოდ ჩამოსულ პაციენტთა რაოდენობა, აფხაზი პაციენტების მსგავსად, ყოველწლიურად იზრდება. ინფორმაციას გამოცემა „ნეტგაზეთი" ჯანდაცვის სამინისტროს ოფიციალურ სტატისტიკაზე დაყრდნობით ავრცელებს.
სტატისტიკის თანახმად, 2017 წლის იანვრიდან-ივნისამდე ცხინვალიდან სამკურნალოდ 322 პაციენტი, მათ შორის 46 ბავშვი ჩამოვიდა. მათ მკურნალობაზე კი საქართველოს ბიუჯეტიდან 898 852 ლარი დაიხარჯა.
რაც შეეხება აფხაზი პაციენტების რაოდენობას, 2017 წლის იანვარი-19 ივნისის ჩათვლით, ქართული საავადმყოფოებში 543 აფხაზმა პაციენტმა, მათ შორის 94 ბავშვმა იმკურნალა. მათ მკურნალობაზე კი სახელმწიფომ 1 294 600 ლარი დახარჯა.
ჯამში, 2015 წლიდან 2017 წლის 19 ივნისამდე აფხაზ და ოს პაციენტებზე საქართველოს ჯანდაცვის ბიუჯეტიდან 12 მილიონ ლარზე მეტია დახარჯული.