(რეზონანსი) პეჩორის რაიონულმა სასამართლომ იუსტიციის ყოფილი მინისტრის, ალექსანდრ ლავრინოვიჩის დაკავების გადაწყვეტილება მიიღო. მას 2-თვიანი წინასწარი პატიმრობა შეუფარდეს. ექსმინისტრს ბრალი „საკონსტიტუციო გადატრიალებაში" ედება.

საუბარია 2010 წელს მიღებულ კანონზე, რომლითაც პრეზიდენტს უფლებამოსილება გაეზარდა.

„პეჩორის სასამართლომ იუსტიციის ყოფილ მინისტრს ალექსანდრე ლავრინოვიჩს აღკვეთის ღონისძიების სახით 60 დღე-ღამე შეუფარდა, 2 ნოემბრამდე" , - განაცხადა უკრაინის გენერალური პროკურორის პრესმდივანმა ლარისა სარგანმა.

იუსტიციის ყოფილ მინისტრს ბრალი უკრაინის სისხლის სამართლის კოდექსის 109-ე მუხლით ედება, რაც გულისხმობს ქმედებებს, რომლებიც მიზნად ისახავს კონსტიტუციური წესრიგის ძალადობრივ შეცვლას, დამხობას ან სახელმწიფო ძალაუფლების ხელში ჩაგდებას.