(რეზონანსი) ოკუპირებული სამხრეთ ოსეთის ადმინისტრაციული საზღვარი 19-დან 22 სექტემბრის ჩათვლით ჩაიკეტება. საზღვარი სამხრეთ ოსეთის რესპუბლიკის 27-ე წლისთავისადმი მიძღვნილი სადღესასწაულო ღონისძიებების გამო ჩაიკეტება.

დე ფაქტო უშიშროების კომიტეტის განცხადებაში ნათქვამია, რომ ე.წ. გამშვები პუნქტების ჩვეულ რეჟიმში მუშაობა 22 სექტემბერს, 07:00 საათზე აღდგება.

სპეციალურად ამ ღონისძიებისთვის, 20 სექტემბერს რუსული და ოსური სამხედრო შენაერთები ცხინვალში მარშით ჩაივლიან. აღლუმში 800-ზე მეტი სამხედრო და 35 სამხედრო ტექნიკა მიიღებს მონაწილეობას.

ცხინვალის სეპარატისტულმა რეჟიმმა ე.წ. საზღვარი ბოლოს 31 აგვისტოს ჩაკეტა.

ე.წ. საზღვრის ჩაკეტვის მიზეზი მაშინ ახალი სასწავლო წლის დაწყებასთან დაკავშირებული ღონისძიებები იყო. 1 სექტემბრიდან სასწავლო პროცესი ოკუპირებული რეგიონის 53 საჯარო სკოლაში განახლდა.

მოსკოვმა 2008 წლის 26 აგვისტოს, ოკუპირებული აფხაზეთისა და ე.წ. სამხრეთს ოსეთის სუვერენიტეტი აღიარა.