(რეზონანსი) შინაგან საქმეთა სამინისტროს ინფორმაცით, ტელეკომპანია „რუსთავი 2" - ის ვებ გვერდზე განხორციელებული კიბერ შეტევის ავტორი დაკავებულია.

„საქმეზე ჩატარებული ოპერატიულ-საგამოძიებო მოქმედებების შედეგად, სამართალდამცველებმა გამოავლინეს ტელეკომპანია „რუსთავი-2"-ის ვებ-გვერდზე განხორციელებული კიბერშეტევის ჩამდენი პირი - თეთრიწყაროს რაიონში მცხოვრები, 1999 წელს დაბადებული ე.მ.

„პოლიციამ მისი საცხოვრებელი სახლის ჩხრეკისას ნივთმტკიცებად კომპიუტერული ტექნიკა ამოიღო, რომელზეც შესაბამისი ექსპერტიზაა დანიშნული.

„გამოძიება კომპიუტერულ სისტემაში უნებართვო შეღწევის ფაქტზე საქართველოს სსკ-ს 284-ე მუხლის 1-ლი ნაწილით მიმდინარეობს, რაც სასჯელის სახით ითვალისწინებს ჯარიმას, გამასწორებელ სამუშაოს ორ წლამდე ვადით ან იმავე ვადით თავისუფლების აღკვეთას",- ნათქვამია შსს-ს განცხადებაში.

შეგახსენებთ, რომ 19 სექტემბერს განხორციელებული კიბერშეტევის შედეგად, ტელეკომპანიის ვებ გვერდი რამდენიმე საათის განმავლობაში არ მუშაობდა.