(რეზონანსი) საქართველოს მთავრობის ადმინისტრაცია უამინდობის გამო თუშეთში შექმნილ ვითარებას ეხმაურება.
მთავრობის ადმინისტრაციის პრესსამსახურის ინფორმაციით, რეგიონში ყველა შესაბამისი უწყება და სამსახური მობილიზებულია.
რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი გზის გაწმენდით სამუშაოებს ინტენსიურ რეჟიმში განაგრძობს. ადგილზე შსს-ს შესაბამისი წარმომადგენლები იმყოფებიან.
მთავრობის ადმინისტრაციის ინფორმაციით, ომალოში მყოფი ტურისტები უსაფრთხოდ იმყოფებიან და ყოველგვარი შეფერხების გარეშე გადაადგილდებიან.
"ჯანმრთელობის პრობლემების მქონე ერთი მამაკაცი, რომლის სიცოცხლეს, ადგილობრივი ექიმის ინფორმაციით, საფრთხე არ ემუქრება, მაშველების დახმარებით, სასწრაფო სამედიცინო დახმარების ბრიგადას კლინიკაში გადაჰყავს. თუშეთში საგანგებო რეჟიმში ყველა შესაბამისი სამსახური მუშაობს, რათა ნებისმიერი სახის შესაძლო შეფერხება თავიდან იყოს აცილებული.
"აგრეთვე გაცნობებთ, რომ ადგილობრივი მოსახლეობის საჭიროებების უზრუნველსაყოფად, ასევე - უცხოელი ვიზიტორების მზარდი რიცხვის ფონზე, თუშეთში კომფორტული და უსაფრთხო მოგზაურობის მიზნით, პრემიერ-მინისტრ გიორგი კვირიკაშვილის გადაწყვეტილებით, გასული წლის სეზონის მსგავსად, წლევანდელი ზამთრის მანძილზე, ყოველკვირეულად, რეგულარულად შინაგან საქმეთა სამინისტროს სასაზღვრო პოლიციის ვერტმფრენი იფრენს", - ნათქვამია ინფორმაციაში.