(რეზონანსი) ევროკავშირმა ამერიკული კომპანია „Amazon"-ი 250 მილიონი ევროთი, 293 მილიონი დოლარით დააჯარიმა. ევროკომისიის თქმით, კორპორაცია გადასახადების გადახდას თავს არიდებდა. ევროკომისარმა კონკურენციის საკითხებში, მარგარეტ ვესტაგერმა აღნიშნა, რომ ლუქსემბურგის ხელისუფლებამ „Amazon"-ს უკანონო საგადასახადო შეღავათები დაუწესა.

ვესტაგერის განმარტებით, „Amazon"-მა შეთანხმების შედეგად, არასამართლიანი საგადასახადო სარგებელი მიიღო, რაც მას სხვა კომპანიებთან შედარებით, ნაკლები გადასახადის გადახდის შესაძლებლობას აძლევდა. საგადასახადო შეთანხმება ლუქსემბურგსა და „Amazon"-ს შორის 2003 წელს გაფორმდა.

„ჩვენი გადაწყვეტილება მინიშნებაა ყველა კომპანიისთვის, რომ მათ ევროპაში გადასახადები აუცილებლად უნდა გადაიხადონ" , - აცხადებს ევროკომისარი.

ევროკომისიამ ამერიკული კორპორაცია „Apple"-ი 13 მილიარდი ევროთი დააჯარიმა ირლანდიის ხელისუფლების სასარგებლოდ. გამოძიებით დადგინდა, რომ ამერიკული კომპანია ირლანდიაში საგადასახადო შეღავათებით სარგებლობდა, რის გამოც კონკურენტებზე ნაკლებ გადასახადებს იხდიდა.