(რეზონანსი) ევროკავშირის მიერ აღმოსავლეთ პარტნიორობის ქვეყნებში ჩატარებული საზოგადოებრივი აზრის გამოკითხვის შედეგებში ნათქვამია, რომ საქართველოში მოსახლეობის მხრიდან ევროკავშირის მხარდაჭერის ზრდა აღინიშნება.

ევროკავშირის წარმომადგენლობის ინფორმაციით, 2017 წლის მარტიდან მაისამდე საქართველოში პირისპირ გამოიკითხა 1000-ზე მეტი ადამიანი. აღნიშნული მაჩვენებელი წინა წელთან შედარებით 6%-ით გაიზარდა და აღმოსავლეთ პარტნიორობის ქვეყნებში ყველაზე მაღალ მაჩვენებელს წარმოადგენს.

საქართველოს მოქალაქეთა 83% მიიჩნევს, რომ ჩვენს ქვეყანას ევროკავშირთან კარგი ურთიერთობები აქვს - ეს მაჩვენებელი გაიზარდა შარშანდელ მაჩვენებელთან (75%) შედარებით და საგრძნობლად აღემატება აღმოსავლეთ პარტნიორობის ქვეყნების საშუალო მაჩვენებელს - 61%-ს.

საქართველოს მოქალაქეთა 66% ევროკავშირს ენდობა. აღსანიშნავია, რომ ეს მაჩვენებელი აღემატება გაერო-ს (56%) და ნატო-ს (54%) მიმართ ნდობის მაჩვენებლებს.

საქართველოს მოქალაქეთა თითქმის ნახევარზე მეტი (58%) კარგად არის ინფორმირებული ევროკავშირის ფინანსური მხარდაჭერის შესახებ. მოქალაქეთა თითქმის 1/3 თვლის, რომ არსებული მხარდაჭერა ეფექტურია.

საქართველოს გარდა, საზოგადოებრივი აზრის გამოკითხვა სომხეთში, აზერბაიჯანში, ბელარუსში, მოლდოვას რესპუბლიკასა და უკრაინაში ჩატარდა. ყოველწლიური გამოკითხვები უკვე ორი წელია ტარდება - კვლევის პირველი ეტაპი 2016 წელს დაიწყო.