(რეზონანსი) ცაგერის მუნიციპალიტეტის სოფელ ოყურეშში ცოფის შემთხვევა დაფიქსირდა. ამის შესახებ ინფორმაციას სააგენტო "ინტერპრესნიუსი" ავრცელებს.

ლაბორატორიული გამოკვლევის შედეგად, ერთ-ერთი ადგილობრივი ოჯახის ძაღლის პათოლოგიურ მასალაში ცოფი დადასტურდა.

ძაღლის ლეშის შემოწმება ოჯახმა მას შემდეგ გადაწყვიტა, რაც ის დაავადდა და მკვდარი იპოვეს.

„პირველადი სალიკვიდაციო სამუშაოები შესაბამისი სამსახურების მიერ დროულად ჩატარდა", - ამბობს ადგილობრივი მკვიდრი მალხაზ მანაგაძე.

სოფელში სურსათის ეროვნული სააგენტოს სპეციალისტები იმყოფებიან. ამ ეტაპზე საკარანტინო ღონისძიებები გრძელდება.

პრევენციის მიზნით ვაქცინაცია სოფელში არსებულ ყველა ცხოველს ჩაუტარდა.