(რეზონანსი) დედაქალაქის მთავარ საფინანსო დოკუმენტის განხილვას თბილისის მერი კახი კალაძე არ დაესწრება. ამის შესახებ თბილისის საკრებულოს ქონების მართვისა და საფინანსო-საბიუჯეტო კომისიის თავმჯდომარე ირაკლი ზარქუამ განაცხადა.

როგორც ზარქუამ აღნიშნა, ბიუჯეტის წარდგენაზე რეგლამენტი მერის მოსვლას არ ითვალისწინებს.

„ოპოზიციური შოუებისთვის არ გვცალია, ჩვენ საქმეს ვაკეთებთ. დღეს ჩვენ ვამტკიცებთ იმ ბიუჯეტს, სადაც ის დაპირებები და პრიორიტეტებია ასახული, რომელსაც მოსახლეობამ მისცა ხმა", - განაცხადა ზარქუამ.

ამასთან დაკავშირებით, "ნაციონალურ მოძრაობაში" აცხადებენ, რომ დედაქალაქის მერი მომავალი წლის ბიუჯეტის განხილვაზე აუცილებლად უნდა მივიდეს და თუ კი კალაძე თბილისის საკანონმდებლო ორგანოში არ მივა, ეს ნიშნავს, რომ მას თავისივე გუნდის მიერ შედგენილი ბიუჯეტი არ მოსწონს.

მთავარ ფინანსურ დოკუმენტზე საკრებულომ დღეს 16:00 საათზე უნდა იმსჯელოს.