"სიღარიბის გადალახვა ეკონომიკის განვითარებას უკავშირდება. არა მხოლოდ ეკონომიკურ ზრდას ქაღალდზე და ციფრებით, რითიც ამაყობდა ესა თუ ის ხელისუფლება, არამედ ეს უნდა მოხდეს ეკონომიკური ზრდის სამართლიანი გადანაწილებით საქართველოს მოსახლეობაზე", - აცხადებს პოლიტოლოგი და ბიძინა ივანიშვილის ყოფილი მრჩეველი გია ხუხაშვილი.
"პირველი არხის" პირდაპირ ეთერში "ქართული ოცნების" პარტიის თავმჯდომარე ბიძინა ივანიშვილმა ჟურნალისტ მაკა ცინცაძის შეკითხვებს უპასუხა.
"რეზონანსი": ბიძინა ივანიშვილმა "პირველ არხთან" ინტერვიუს დროს განაცხადა, რომ ქვეყანაში სიღარიბეა და წლის ბოლომდე ამ მდგომარეობის შეცვლას გეგმავს. თქვენი აზრით, როგორ მოხერხდება ამ გეგმის შესრულება?
გია ხუხაშვილი: ამას შესაბამისი პოლიტიკის გატარება უნდა; ერთი მხრივ, ეკონომიკური ზრდა უნდა იყოს, მაგრამ ეკონომიკის სტრუქტურა ისეთი უნდა იყოს, რომ ეს სიკეთე ბოლომდე მივიდეს. შეიქმნას სამუშაო ადგილები და იყოს მყარი სოციალური გარანტიები. ეს, რა თქმა უნდა, შესრულებადია, თუმცა ხანგრძლივი პროცესია და სწორი ეკონომიკური პოლიტიკის გატარება სჭირდება მას.
"რ": ივანიშვილმა ყოფილი პრემიერ-მინისტრი გიორგი კვირიკაშვილი მწვავედ გააკრიტიკა. მან განაცხადა, რომ კვირიკაშვილი ვერ მართავდა ქვეყანას და ამიტომაც მოუხდა თანამდებობის დატოვება. რამდენად სწორია ივანიშვილის მხრიდან კვირიკაშვილის კრიტიკა?
გ.ხ: მიმაჩნია, რომ ობიექტური იყო. მიუხედავად იმისა, რომ ციფრებით თითქოს ყველაფერი წესრიგში იყო, ეს სიკეთე, სამწუხაროდ, არ ნაწილდებოდა სამართლიანად. ეკონომიკის სტრუქტურა იყო არა ადამიანზე, მის დასაქმებასა და მის კეთილდღეობაზე ორიენტირებული, არამედ უბრალოდ, ფინანსური ნაკადების ზრდაზე.
გადანაწილება, სეგრეგაცია კიდევ უფრო მეტად იზრდება; არათუ არ იკლებდა სხვადასხვა სოციალურ ფენას შორის, კიდევ უფრო იზრდებოდა. ამას ისიც დაემატა, რომ არა მხოლოდ მთლიანი ბიზნესის ლობისტად მოგვევლინა, არამედ - კონკრეტული სეგმენტის, საბანკო სეგმენტის ლობისტადაც. ფაქტობრივად, მან ხელი შეუწყო ვითარებას; ბანკებმა ქართულ ეკონომიკაზე დომინირება დაიწყეს, რაც ძალიან მძიმე ტვირთად დააწვა ამ პროცესს.
საქმე ის გახლავთ, რომ ბანკები ეკონომიკის აუცილებელი ელემენტია, მაგრამ მათ აქვთ სოციალურ-სახელმწიფოებრივი ფუნქცია და საქართველოში ბანკები ძალიან შორს გასცდნენ მათ ფუნქციას; ეკონომიკის ყველა სფეროში შეიჭრნენ.
ბანკის მხრიდან არაპროფილური აქტივობით ოპერირება, საბოლოო ჯამში, იწვევს იმას, რომ კონკურენტული გარემო სუსტდება, სხვა მოთამაშეები არაკონკურეტულნი არიან ბანკებთან და ეს, საბოლოო ჯამში, ჯანსაღ ეკონომიკურ ურთიერთობებს ანგრევს. ეს იყო ერთ-ერთი ფუნდამენტური და შეგნებული თუ შეუგნებელი მთავარი შეცდომა კვირიკაშვილის მხრიდან.
"რ": მისი თქმით, კვირიკაშვილმა და ქუმსიშვილმა ბანკებზე კვლევა დაუმალეს. თქვენი აზრით, მათ შორის დაპირისპირების ერთ-ერთი გამომწვევი მიზეზი ეს იყო?
გ.ხ: ვფიქრობ, ერთ-ერთი პრობლემა სწორედ ის იყო, რომ კვირიკაშვილი სრულიად აშკარად ლობირებდა საბანკო ინტერესებს. ქვეყანაში ეკონომიკა გამოიმუშავებს რაღაც რაოდენობის, იქს მოგებას.
ბანკები არ ქმნიან სამუშაო ადგილებსა და სოციალურ გარანტიებს. ბანკების მოგება მკვეთრად გაიზარდა და, შესაბამისად, ეს შემოსავლებისა და სიკეთის გადანაწილება კიდევ უფრო მახინჯი და მანკიერი გახდა, ვიდრე მანამდე იყო.
"რ": ივანიშვილის აზრით, აუცილებელია ბანკებზე რეგულაციების გატარება მთავრობის მხრიდან. რა რეგულაციები უნდა გატარდეს და რა იქნება შედეგი?
გ.ხ: გარკვეული რეგულაციები უკვე გატარდა და ვფიქრობ, რომ სამომავლოდ ბანკებს საერთოდ უნდა აეკრძალოთ, საფინანსო სფეროს გარდა, სხვა ბიზნესის წარმოება; ისეთი ბიზნესის წარმოება, სადაც სხვა მოთამაშეებთან საქმიანი ურთიერთობები წარმოეშვათ.
ეს ჯანსაღ კონკურენციას კლავს; ისინი უნდა ჩაეტიონ თავის ტყავში და მხოლოდ საფინანსო მომსახურებით უნდა შემოიფარგლონ. ისინი არ უნდა გავიდნენ სხვა სფეროებში.
დღემდე ბანკებს რა არაპროფილური აქტივებიც აქვთ მოპოვებული, ეს საინვესტიციო კომპანიებს უნდა გადაეცეთ; ისინი ბანკების დავალებით გაყიდიან ან სხვა. ვფიქრობ, ეს არის ერთადერთი სწორი გამოსავალი შექმნილი ვითარებიდან; ნელ-ნელა ბანკები ჩასხდნენ იმ კალაპოტში, რაც სწორი და ჯანსაღია ეკონომიკური განვითარებისთვის.
"რ": ივანიშვილის განცხადებით, "ოცნებამ" შესაძლოა, საპრეზიდენტო კანდიდატი არ დააყენოს. იგი არ გამორიცხავს, რომ არჩევნებში ოპოზიციურმა კანდიდატმა გაიმარჯვოს. ოპოზიციურ პარტიას ამ პოსტს რამდენად დაუთმობს?
გ.ხ: მისი ეს სურვილი ჩემთვის მისაღებია; როგორც ჩანს, ივანიშვილი, თავისი გუნდისგან განსხვავებით, ხვდება, რომ ძალაუფლების უზურპაცია კარგად არ მთავრდება. შესაბამისად, ის ცდილობს, რომ სახელმწიფოში პოლიტიკური ბალანსი წარმოშვას. მისი ეს სურვილი ამისთვის არის მოწოდებული.
არ ვიცი, მოქმედებაში ეს როგორ იქნება და რა სახეს მიიღებს. ალბათ, "ქართული ოცნება" არ შევა ამ საარჩევნო პროცესში თუ შევა, შედარებით ნორმალურ კანდიდატს დაუჭერს მხარს, მაგრამ თუკი ფორმალურად არა "ქართული ოცნების" კანდიდატს დაუჭერს მხარს და სინამდვილეში, "ოცნების" წარმომადგენელი იქნება, ამას ისევ ფარსის სახე მიეცემა.
როდესაც სალომე ზურაბიშვილზეა საუბარი, როგორც დამოუკიდებელ კანდიდატზე, ეს ძალიან სასაცილოა, რადგან დიდი ხანია, ეს ქალბატონი იქცა "ქართული ოცნების" ყველაზე აგრესიულ აქტივისტად.
ფორმალურად ის "ოცნებაში" არ არის, მაგრამ რეალურად ის დიდი ხანია, იქ არის და მასზე, როგორც დამოუკიდებელ კანდიდატზე, საუბარი არასერიოზულია.