ინდონეზიაში, კატასტროფების მართვის ეროვნული სააგენტოს წარმომადგენლის სუტოპო პურვო ნუგროჰოს განცხადებით, ლომბოკის კუნძულზე მიწისძვრის შედეგად დაღუპულთა რიცხვი 91-მდე გაიზარდა.  მისივე თქმით, კატასტროფის შედეგად 200-ზე მეტი ადამიანი სერიოზულად დაშავდა.

მანამდე გავრცელდა ინფორმაცია, რომ 6,9 მაგნიტუდის სიმძლავრის მიწისძვრის შედეგად 82 ადამიანი დაიღუპა. გარდა ამისა, სტიქიური უბედურების გამო ათასობით ადამიანის ევაკუაცია განხორციელდა.

6 აგვისტოს, ინდონეზიის კუნძულ ლომბოკზე, რომელიც ბალიდან აღმოსავლეთით მდებარეობს, 6,9 მაგნიტუდის სიმძლავრის მიწისძვრა მოხდა. მიწისძვრის ეპიცენტრი 10 კილომეტრის სიღრმეზე იყო. ცუნამის საშიშროება არ არსებობს.