(რეზონანსი) ახმეტის მუნიციპალიტეტის სოფლებში, მატანში, დუისსა და ომალოში ძლიერი წვიმის გამო საცხოვრებელი სახლების ეზოები დაიტბორა.

შეფერხებულია გადაადგილება სოფლების შიდა გზებზე. წვიმასთან ერთად ნალექის სახით მოვიდა სეტყვაც, რამაც სასოფლო-სამეურნეო სავარგულები დააზიანა.

ახმეტის მერის, იოსებ ქარუმაშვილის ინფორმაციით, ძლიერი წვიმის მიუხედავად, მნიშვნელოვანი ზარალი სოფლებს არ მიუღია. მისივე თქმით, სტიქიის ადგილზე მისი მოადგილე იმყოფება.