პრეზიდენტობის კანდიდატი დავით უსუფაშვილი აცხადებს, რომ პრეზიდენტად არჩევის შემთხვევაში შევა ავლაბრის რეზიდენციაში, მთავრობას და პარლამენტს კი დაითანხმებს უმაღლესი სახელმწიფო დაწესებულებების განთავსების იმ სქემაზე, რომელსაც 2012 წელს მხარს უჭერდა. კერძოდ: პარლამენტი – თბილისში, პრეზიდენტი – ათონელის ქუჩაზე, საქართველოს რესპუბლიკის სასახლე – ავლაბარში. მისი თქმით,  საქართველოს რესპუბლიკის სასახლე გახდება ქართული სახელმწიფოებრიობის მნიშვნელოვანი სიმბოლო.

“იგი პირველი ქართული რესპუბლიკის 100 წლის იუბილეს აღნიშვნის პერიოდში გაიხსნება და ერთგვარად ერთ სივრცეში მოაქცევს პირველ (1918-1921) და მეორე რესპუბლიკებს (1991-დან დღემდე). ეს სასახლე არ იქნება რომელიმე თანამდებობის პირის რეზიდენცია. მასში გაიმართება მნიშვნელოვანი სახელმწიფო ღონისძიებები და ცერემონიები, პრეზიდენტისა და პრემიერ-მინისტრის უმაღლესი რანგის სტუმრების მიღებები, ოფიციალური სადილები, სახელმწიფო ჯილდოების გადაცემის ცერემონიები და სხვა", – აცხადებს უსუფაშვილი.