სესხის გამცემი ორგანიზაციებისთვის 1 სექტემბრიდან წესები იცვლება. სამოქალაქო კოდექსის მიხედვით, სესხის წლიური ეფექტური საპროცენტო განაკვეთი 100%-დან 50%-მდე მცირდება.

ცვლილება ეხება როგორც სესხების საპროცენტო განაკვეთებს, ასევე ვადაგადაცილებულ სესხებზე ჯარიმაებისა და საურავების ოდენობას. კერძოდ, სესხის ხელშეკრულების ნებისმიერი პირობის დარღვევის გამო მსესხებლისათვის ხელშეკრულებით გათვალისწინებული/დაკისრებული პირგასამტეხლოს და ნებისმიერი ფორმის ფინანსური სანქციის ოდენობა თითოეულ დღეზე სესხის ნარჩენი ძირითადი თანხის 0.27 პროცენტს არ უნდა აღემატებოდეს. შესაბამისად, გამოდის, რომ სანქციის ოდენობა წლიურად 98.55%-ზე მეტი არ უნდა იყოს.

გარდა ამისა, სექტემბრიდან ე. წ. შავი სიები გაუქმდება და საფინანსო ინსტიტუტებს ნეგატიური სტატუსის მინიჭების შესაძლებლობა აღარ ექნებათ.

დღეს ე.წ. შავ სიაში 630 ათასამდე მომხმარებელია.