ზემო ფონიჭალაში საცხოვრებელ კორპუსში გაზის აფეთქების შედეგად მომხდარ ტრაგედიას მაშველები იხსენებენ. ამბობენ, რომ უმძიმესი წუთები იყო, როცა დედა და მისი 8 თვის შვილი გარდაცვლილები ნახეს.
პაატა ჩხიტუნიძე, საგანგებო სიტუაციების მართვის სამსახურის, მთაწმინდა-კრწანისის რაიონის სახანძრო-სამაშველო სამსახურის გათვლის სამსახურის უფროსი:
"დაახლოებით 7 საათის განმავლობაში მიმდინარეობდა სამძებრო სამუშაოები, ფსიქოლოგიურად ეს ძალიან რთული პროცესია… გამოძახებაზე მისვლისთანავე დავიწყეთ მოქალაქეების ევაკუაცია. პირველ რიგში დაშავებულები გამოვიყვანეთ მეორე სართულიდან, რომლებიც აფეთქების შედეგად, მეორე სართულიდან ჩამოვარდნენ… დაზიანებები ჰქონდათ, დამწვრობები აღენიშნებოდათ. იმავდროულად სადარბაზოში მცხოვრებლების ევაკუაცია მიმდინარეობდა, რადგან აფეთქებები საკმაოდ ძლიერი იყო, მთელ სადარბაზოში თითქმის ყველა კარი გაიჭედა და მათი გაჭრა მოგვიწია, რომ მოქალაქეები გამოგვეყვანა…
მე-13 წელია ამ სამსახურში ვარ, ძალიან ბევრ სამაშველო ოპერაციაში ვმონაწილეობდი და შემიძლია ვთქვა, რომ ეს იყო ჩემს ცხოვრებაში ყველაზე რთული დღე, რადგან ვიცოდი, რომ უნდა გვეპოვა დედა-შვილი, პატარა ბავშვი, რომლებიც უკვე ცოცხლები აღარ იქნებოდნენ… ეს იყო დაახლოებით 20-25 მეტრის კვ. ფართობის ტერიტორია, სადაც ,,სინკარების” ქვეშ მოყოლილი იყო დედა-შვილი…
ლევან შარვაძე, თბილისის სამაშველო განყოფილების უფროსი ინსპექტორი:
"ბავშვი და დედა ნებისმიერ მდგომარეობაში პატრონისთვის უნდა ჩაგვებარებინა… არ ვიცი, მაინც უნდა ვთქვა… მაინც ვფიქრობდით, იქნებ სასწაული მოხდეს და ცოცხლები იყვნენო… შემდეგ, უკვე როდესაც ბავშვის სხეული გამოჩნდა, სინკარის ქვეშ იყო მოყოლილი, პაწაწუნა ხელი და ფეხი ჩანდა, წინდები ეცვა. ეს არის კადრი, რომელიც მთელი ცხოვრება გამყვება…
ჩვენ, ოჯახი და შვილები გვყავს და ძალიან მტკივნეულია ამის გაცნობიერება. წლებია ამ სამსახურში ვმუშაობ და ეს იყო ჩემს ცხოვრებაში უმძიმესი დღე, რომლის მსგავსი არ მინდა ოდესმე განმეორდეს…"
(ამბები.ჯი)