„ძალა ერთობაშიას“ წევრი დავით ქცარავა „რეზონანსთან“ ინტერვიუში აცხადებს, რომ თუ მას უახლოეს მომავალში ხურვალეთში შესვლის უფლებას არ მისცემენ და დადგინდება, რომ რუსებმა ქართველების მიერ კონტროლირებადი ბაღები დაიკავეს, ის სოფლის მიმდებარედ აქციებს დაიწყებს. ქაცარავა ამბობს, რომ არც ის არის გამორიცხული, მან მასობრივი აქციების  ფონზე კარვებიც დადგას. 

სამოქალაქო აქტივისტი ამბობს, რომ არ არის გამორიცხული 15 მარტს რუსების სოფლიდან მოჩვენებითი გასვლა მოხდა იმ პირობით, რომ შემდეგ უკან დაბრუნდებოდნენ და „ძალა ერთობაშიას“ წევრებს საქართველოს ხელისუფლება ხურვალეთში შესვლის უფლებას აღარ მისცემდა. ქაცარავა ამბობს, რომ სოფლის მოსახლეობის ინფორმაციით, რუსები ღამე ქართველების ბაღებში ძაღლებით დადიან. 

„რეზონანსი“: რა სიტუაციაა ახლა ხურვალეთში, გეძლევათ თუ არა სამოქალაქო აქტივისტებს იქ შესვლის უფლება და მოსახლეობა რას აცხადებს?  

დავით ქაცარავა: ერთადერთი, რაც დადასტურებით შემიძლია გითხრათ, ისაა, რომ ხურვალეთის ტერიტორიაზე პოლიცია ადგილობრივი მცხოვრებლების გარდა არავის  უშვებს. ვერც ჟურნალისტები, ვერც სამოქალაქო აქტივისტები და ვერც არასამთავრობო ორგანიზაციების წარმომადგენლები ვერ  შედიან. შესაბამისად, ზონა ჩაიკეტა. 

ინფორმაცია, რაც შიგნიდა გამოდის, სახარბიელო არ არის. თუმცა ამის რაიმე დოკუმენტური დადასტურება ჯერჯერობით არ შემიძლია. გეტყვით იმას, რასაც ადგილობრივები პრივატულ საუბრებში გვეუბნებიან, როდესაც სოფლიდან გამოდიან. ისინი ამბობენ, რომ რუსები ღამის განმავლობაში იმ ბაღებში მოძრაობენ, რომელზეც 15 მარტს საუბარი იყო. ისინი გადაადგილდებიან ძაღლებით და ტერიტორიას აკონტროლებენ. 

ეს არის საქართველოს მიერ კონტროლირებადი ტერიტორია. თუმცა, ამას კიდევ ერთხელ გავიმეორებ, დოკუმენტური მტკიცებულება არ მაქვს და მხოლოდ ადგილობრივების ინფორმაციას ვეყრდნობი. 

„რ“: ინციდენტების პრევენციისა და მათზე რეაგირების მექანიზმის შეხვედრებზე დე ფაქტო ხელისუფლების დელეგაციის ხელმძღვანელის  ეგორ კოჩიევის განცხადებას როგორ შეფასებთ, სადაც მან ნაწილობრივი დაადასტურა კიდევაც, რომ ხურვალეთში გარკვეული სახის აქტივობას ადგილი ჰქონდა...

დ.ქ.: კოჩიევის განცხადება საკმაოდ საგანგაშო და სკანდალურია. მან ნაწილობრივი კი არა, ფაქტობრივად აღიარა, რომ ხურვალეთში რუსი სამხედოები იმყოფებოდნენ. უბრალდო ხაზი გაუსვა, რომ ისინი ე.წ. სამხრეთ ოსეთის რესპუბლიკის  მიწაზე იმყოფებოდნენ. ამით კი დაადასტურა, რომ რუსებმა ჩვენი კონტროლირებადი ტერიტორია მიიტაცეს. 

ჩვენმა მთავრობამ ამასთან დაკავშირებით ვერანაირი კონტრარგუმენტი ვერ თქვა. თანაც ეჭვს უკვე აღარ იწვევს ის ფაქტიც, რომ რუსები ბატონიშვილების და ყურაშვილების ადგილ-მამულებში შესულები იყვნენ. ხალხმა ნახა ფოტოები, რომელიც მაინც უტყუარი მტკიცებულებაა. ხოლო ის, რომ ჩვენ ხურვალეთში აღარ გვიშვებენ, უკვე საგანგაშო ვითარებაა. 

„რ“: კოჩიევის განცხადებით, თქვენ და „ძალა ერთობაშიას“ სხვა წევრებიც ხურვალეთში პროვოკაციის მოწყობას  აპირებდით და სწორედ ამიტომაც მოხდა სოფელში დამატებით ძალების აქტიურობა. შესაბამისად, ჩვენი ხელისუფლების ქმედება, რომ თქვენ იქ არ გიშვებთ, არ ფიქრობთ, რომ  თუნდაც რუსეთის მხრიდან პროვოკაციის მოწყობის  საფრთხის გამო ხდება? ანუ, რუსებ პროვოკაციისათვის დამატებით საბაბს არ აძლევენ...

დ.ქ.: ჩემი ბრალი რა არის - რომ საქართველოს მიერ კონტროლირებადი მიწების დამუშავებაში ადგილობრივებს უნდა დავხმარებოდით? იმედი მაქვს, რომ ეს ტერიტორიები ისევ ჩვენ გვეკუთვნის, რადგანაც იქ არავის აღარ უშვებენ და კაცმა არ იცის რა ხდება. არანაირად ჩვენი მხრიდან გაცხადებული არ ყოფილა, რომ მათ მიერ კონტროლირებად ტერიტორიას ერთი სანტიმეტრით მაინც  უნდა შევხებოდით.  

თუ ჩვენი ხელისუფლება ასეთ პოზიციას იზიარებს, მაშინ სერიოზული სისტემური პრობლემები გვქონია. გამოდის, რომ ოკუპანტების ნარატივს ვიზარებთ დ ამ მოსაზების განვითარებას ჩვენც ხელს ვუწყობთ. ვაპირებდით ჩვენს მიერ კონტროლირებად ბაღებში შესვლას, ეს იყო ყურაშვილების მიწა, რომელსაც ჩვენი პოლიცია აკონტროლებდა. 

„რ“: თუ თქვენ  მაინც ამბობთ, რომ რუსები ხურვალეთში იმყოფებოდნენ, მაშინ გამოდის, რომ ჩვენმა ხელისუფლებამ ისინი უკან გაუშვა. როგორ ფიქრობთ, რატომ მალავენ ამას,  შესაძლოა რაღაც  სახის გარიგება მოხდა? 

დ.ქ.: რა თქმა უნდა, რამდენიმე საათის განმავლობაში სიტუაციის განსამუხტად რუსებისს გაყვანა მოხდა. დაახლოვებით, ოთხი-ხუთი საათი ხურვალეთში რა ხდებოდა სრული ვაკუუმი იყო. რუსები გავიდნენ რამდენიმე საათით, რათა ჟურნალისტები შეეყვანათ და ეჩვენებინათ, რომ იქ არავინ იყო. თუმცა ესეც ისე გააკეთეს, რომ ბაღებში სრულად არ შეუშვეს და შორიდან გადააღებინეს. მას შემდეგ კი ხურვალეთი ჩაიკეტა. მოდი, ვთქვათ - თუ ისინი გავიდნენ და გაიყვანეს, დღეს იქ რატომ არავის უშვებენ? კითხვები ისმის და იქიდან არავის პასუხი არ გვაქვს.

კოჩიევის განცხადებები ისმის, რომელიც ადასტურებს, რომ ისინი მოძრაობენ მათ მიერ კონტროლირებად ტერიტორიაზე. ეს კი იმის ნიშანია, რომ რუსებმა ეს ტერიტორია დაისაკუთრეს და ჩვენი ხელისუფლების მხრიდან შეგნებული მცდელობაა, რომ ხურვალეთში გრადუსი დააგდოს, საზოგადოებას დაავიწყდეს რა ხდება და შემდეგ მოსახლეობას შეაგუებენ, რომ რუსებს ვერაფერს ვუშვებით და ხურვალეთი წაიღეს. 

„რ“: თუ ასე გაგრძელდა და „ძალა ერთობაშიას“ წევრები აღარ შეგიშვეს ხურვალეთში, რას აპირებთ, როგორ გააგრძელებთ ამ კუთხით აქტივობას? 

დ.ქ.: ვპირდებით ყველას, რომ მაქსიმალურად ვიმუშავებთ იმაზე, რათა ხურვალეთთან დაკავშირებით ინფორმაცია მოვიპოვოთ. არცერთი წუთით და არცერთი წამით არ მოვდუნდებით. ვიბრძოლებთ ისე, როგორც ეს ატოცისთვის და ჩორჩანასთვის გავაკეთეთ. ჩვენი აქტიურობით უზარმაზარი ტყე საქართველოს ხელისუფლების კონტროლის ქვეშ დაბრუნდა. 

ასევე ვიბრძოლებთ ხურვალეთისთვის, რომ რუსებს ასე ჩუმად არ  გადასცენ. ესენი არიან ყაჩაღები და ტერორისტები, რომლებიც ჩვენს მიწებს ასე იტაცებენ. მერე რა რომ რუსები არიან, ჩვენს ქვეყანას და წინაპრებს ასე რომ შეშინებოდა ყველა დამპყრობელის კიდევ კი არ ვიარსებებდით. 

„რ“:მაგრამ როგორ - თუ ხურვალეთში ხელისუფლება არ გიშვებთ, ძალით აპირებთ სოფელში შესვლას?

დ.ქ.: ბუნებრივია, რომ ჩვენ სამოქალაქო აქტივისტების მობილიზებას გავაკეთებთ და თუ საჭირო გახდება აქციების გამართვა, ამასაც გავაკეთებთ. ეს იქნება ფართომასშტაბიანი აქციები. კარვებსაც გავშლით და ხურვალეთის მიმდებარედ გადავცხოვრდებით. ყველა რესურს გამოვიყენებთ იმისთვის, რომ იქიდან სწორი ინფორმაცია გამოვიტანოთ. თუ საჭირო იქნება ამ ბაღების დეოკუპაცია, ამასაც გავაკეთებთ და რუსებს უკან დავახევინებთ. 

„რ“: როდის და რა ვადებში აპირებთ ამ აქციების დაწყებას. რას დაელოდებით და თქვენი მოქმედება რაზე იქნება დამოკიდებული? 

დ.ქ.: ჩვენ ახლაც მოქმედ რეჟიმში ვართ, ვმუშაობთ ინფორმაციის მოგროვებაზე. ეს არის ჩვენი ცხოვრების ნაწილი. რა წამს გვექნება დადასტურებული ფაქტი, რომ ჩვენს ბაღებში რუსები არიან, ამას საზოგადოებას ვამცნობთ. ეს ინფორმაცია თუ დადასტურდება, ესევე აქტიურ მოქმედებებზე გადავალთ. ძალიან ბევრი ადამიანი ჩამოვა და ხურვალეთში შესვლას მოითხოვს. ბოლოს და ბოლოს ახსნან ის, რაც ხურვალეთში ხდება ან არ ხდება.  

„რ“: ხშირად ისმის თქვენი მისამართით ბრალდებები, როგორც ხელისუფლების ასევე მედიის და საზოგადოების გარკვეული  ნაწილისგან, რომ „ნაციონალურ მოძრაობასთან“ აფილირებული პირი ხართ; რომ მიხეილ სააკაშვილისგან იღებთ გარკვეულ დირექტივებს და საოკუპაციო ხაზთან მიზანმიმართულ პროვოკაციებს აწყობთ. გაქვთ მესამე პრეზიდენტთან ურთიერთობა?

დ.ქ.: რომ ვიყოთ რომელიმე პოლიტიკურ ძალასთან აფილირებული, ჩვენ ამაზე ღიად ვისაუბრებდით. დასამალი არაფერი გვაქვს, ვართ სამოქალაქო მოძრაობა, რომელიც 22 თვეა კონფლიქტურ ზონებში პატრულირებს. ამიტომაც აბსოლუტურად ყველა იმ ადამიანთან გვაქვს კონტაქტი, ვინც თვლის, რომ ეს ქვეყნის პრობლემაა. 

ჩვენ „გაერთიანებულ ოპოზიციასთანაც“ გვაქვს ურთიერთობა და აბსოლუტურად ყველასთან, ვისაც კითხვა უჩნდება და ოკუპაცია ადარდებს. არავის შეზღუდვას არ ვუწესებთ. 

მიხელ სააკაშვილთან მხოლოდ და მხოლოდ ერთი კომუნიკაცია იყო. მან იანვრის დასაწყისში „სკაიპით“, აბსოლუტურად ღია კომუნიკაციით დამირეკა. არა თუ სააკაშვილს, არამედ ყველა პოლიტიკურ ძალას დაველაპარაკები, ვინც მხარს დაგვიჭერს. ოღონდ ეს იქნება ყოველგვარი აფილირების და გაერთიანების გარეშე.