„მინისტრების და „ოცნების" დეპუტატების სახლების გაქურდვის საქმეები ძალიან სწრაფად გაიხსნა, ამ დროს კი, ბესელიას შემთხვევაში, იგივე „თიბისიზე" კიბერთავდასხმის შემთხვევაში ეს დანაშაულები რომ არა და არ იხსნება და გამოძიებიდან ვერაფერსაც ვერ ვიგებთ, ესე იგი სხვა ადამიანმა ასეთ ვითარებაში რა უნდა ქნას?!
"თუ ამ ქვეყანაში ხელისუფლების წარმომადგენელი არ ხარ, აბსოლუტურად დაუცველი ხარ. ეს ძალიან საშიში ტენდენციის მაჩვენებელია, ე.ი. ჩვენ უძლურები ვართ სახელმწიფოს მიერ ჩადენილი დანაშაულების მიმართ რამე გავაკეთოთ," - აცხადებს იურისტი ლია მუხაშავრია.
„რეზონანსი": ბოლო ერთ თვეში „ოცნების" სამი მაღალჩინოსანი გაქურდეს - არჩილ თალაკვაძე, გიორგი ქობულია და გია ვოლსკი. ეს ხდება იმ ფონზე, როცა ოპოზიცია აცხადებს, რომ 1990-იანი წლების კრიმინალურ სიტუაციას ვუბრუნდებით და ხელისუფლება ამტკიცებს, რომ ეს ტყუილია, კრიმინალი არ გაზრდილა და მხოლოდ სტატისტიკა გაუმჯობესდა. ხელისუფლების მტკიცება, რომ ოპოზიცია ტყუის, რამდენად რეალურად გამოიყურება ამ ფონზე?
ლია მუხაშავრია: ეს აჩვენებს, რომ ოპოზიციის კრიტიკა კრიმინოგენული ვითარების გაუარესებაზე, მართალია. მართლაც, ზედიზედ სამი ცნობილი პოლიტიკოსის გაქურდვა, თან სახლში შეღწევით, ეს უბრალო ამბავი არ არის.
ჩვეულებრივი ლოგიკაც უნდა ადასტურებდეს ამას, როცა შეჭირვებაა ქვეყანაში და ნაკლები შემოსავალი აქვთ ადამიანებს, ფასების ზრდამ და შემოსავლების შემცირებამ ასეთი დანაშაულების ზრდა იცის, განსაკუთრებით ასეთი, ქონებრივი ხასიათის დანაშაულის ზრდა.
„რ": არის თუ არა ერთგვარად სიმბოლური, ტრაგიკომიკური ფაქტიც, როცა სამი მაღალჩინოსანია გაქურდული?
ლ.მ: ტრაგიკომედიას არა, უფრო ტრაგედიას ვხედავ იმაში, რომ, როცა მათი მაღალჩინოსნები არიან დაზარალებულები, ქურდების ფაქტები გახსნეს, ხოლო სხვა საქმეები არ იხსნება. ალბათ, მათი სახლების ქურდობის გამოსაძიებლად ყველაფერი გაკეთდა, რომ დამნაშავე იდენტიფიცირებული ყოფილა, სხვა შემთხვევაში კი ეს არ მომხდარა და ეს არის ძალიან საშიში. ჩვენს სახელმწიფო იმისთვის გვინდა, რომ არა მარტო საკუთარი წევრების სახლების გაქურდვა გახსნა, არამედ სხვა საქმეებიც.
„რ": ალბათ, მაღალჩინოსნების განცხადებებიც მოისმინეთ ამ საქმეებზე. მაგალითად პრემიერ-მინისტრმა თქვა, რომ ჩვენს ხელისუფლებაში პრივილეგირებული პირები არ არსებობენ და იმიტომ გვქურდავენო, ხოლო ეკონომიკის მინისტრმა ჟურნალისტებს განუცხადა, რომ ჩემი სახლის ამბავი ჩემი პირადი ცხოვრებაა და ამაზე რატომ მეკითხებითო. ეს პასუხები რამდენად ადეკვატურია?
ლ.მ: პრემიერს, ალბათ, არ ჰქონდა კარგად ნაფიქრი, როგორ ეპასუხა. თუ ეს ხუმრობით თქვა, ეს ნამდვილად არ არის სახუმარო თემა. გამაოცა ეკონომიკის მინისტრის რეაქციამ და კომენტარმაც, რომ თურმე ეს მისი პირადი საკითხიაო. პირადი საკითხი არ არის, თუკი დანაშაულზეა საუბარი და ეს მინისტრმა უნდა იცოდეს. თან საუბარია ქურდობაზე სახლში შეღწევით, ეს არ არის მცირე მნიშვნელობის დანაშაული.
„რ": ეკა ბესელიას წინააღმდეგ პირადი ცხოვრების უკანონო ჩანაწერები ისევ გავრცელდა. ბესელიამ განაცხადა, რომ მის წინააღმდეგ კოლექტიური ტერორი ხდება ე.წ. ახლების მხრიდან, რომ განცდა რჩება ამ მორალური ტერორის მონაწილეები „ახლები" არიან და უხარიათ, ვერ მალავენ შურისძიების სურვილს. თქვენს გრჩებათ ეს განცდა, რომ ბინძური კამპანიის ბერკეტად არის გამოყენებული ეს კადრები ბესელიას წინააღმდეგ?
ლ.მ: ამაზე ბინძური დანაშაული წარმოუდგენელია. თითქოს გამოძიება დაწყებულია ამ ვიდეოს გავრცელების საქმესთან დაკავშირებით, მაგრამ ამდენი თვეა გასული და ვერა და ვერ გაირკვა საიდან წამოვიდა ეს ვიდეო. უფრო მეტიც, განმეორებით ხდება მისი ინტერნეტში ატვირთვა. ეს ძალიან ბევრ კითხვას ბადებს.
საერთოდაც, როცა ივანიშვილს ეკითხებიან ამ ფარული ვიდეო-ჩანაწერების გასაჯაროვებისა და გამოქვეყნების ამბებზე და ვერ იხსენებს, როცა ამდენი ხანია ასეთი მაღალი ცნობადობის მქონე პირი, ეკა ბესელია ვერ ახერხებს თავისი უფლებების დაცვას, ასეთ შემთხვევაში ეს ძალიან საშიში მოვლენაა.
წეღან სახლების გაქურდვასთან დაკავშირებით ვთქვი, რომ მინისტრების და „ოცნების" დეპუტატების სახლების გაქურდვის საქმეები ძალიან სწრაფად გაიხსნა, ამ დროს კი, ბესელიას შემთხვევაში ეს დანაშაული რომ არა და არ იხსნება და გამოძიებიდან ვერაფერსაც ვერ ვიგებთ, ესე იგი სხვა ადამიანმა ასეთ ვითარებაში რა უნდა ქნას?!
თუ ამ ქვეყანაში ხელისუფლების წარმომადგენელი არ ხარ, აბსოლუტურად დაუცველი ხარ. ეს ძალიან საშიში ტენდენციის მაჩვენებელია, მით უფრო, ჩვენ ვიცით, რომ ასეთ ტექნიკასთან მისაწვდომობა რიგით ადამიანს და კერძო კომპანიას არ შეიძლება ჰქონდეს.
აი, „თიბისის" განცხადებაც გავიხსენოთ, მათ თქვეს, რომ გამოძიების პარალელურად მათზე ხორციელდებოდა კიბერთავდასხმა და მიუხედავად იმისა, რომ თავადვე დაადგინეს, რომ თბილისის ცენტრალური ქუჩიდან ხდებოდა ეს თავდასხმა, ამ საკითხზეც არ გვაქვს პასუხები.
ეს ძალიან საშიში მოვლენაა. ისე იგი ჩვენ უძლურები ვართ სახელმწიფოს მიერ ჩადენილი დანაშაულების მიმართ რამე გავაკეთოთ, მით უფრო, რომ დამოუკიდებელი გამოძიება ქვეყანაში არ გვაქვს. გამოძიება არაკვალიფიციური და არასანდოა და ეს დიდი ხანია ვიცით. ეს საკითხი ასე დიდ ხანს ვერ დარჩება და პოლიტიკოსებს მოუწევთ გარკვეული ფასის გადახდა ამაში, მაგრამ ეს ჩვენთვის სახეირო ამბავი არ არის.
„რ": თქვენც თვლით, რომ სახელმწიფოს მიერ ჩადენილი დანაშაულებებია ბესელიას კადრებიც და "თიბისიზე" კიბერთავდასხმაც? ეს აღქმა არსებობს, რომ ოპონენტებზე თავდასხმა ხდება მაშინ, როცა მას ხელისუფლებასთან აქვს პრობლემები, ასეა ბესელიას შემთხვევაშიც. თვლით, რომ ბესელიას წინააღმდეგ კადრებით თავდასხმას პოლიტიკური მოტივები აქვს?
ლ.მ: ბუნებრივია ასეა. როცა პოლიტიკოსის წინააღმდეგ არის ეს ბინძური დანაშაული გამოყენებული და არის ძალიან დასაბუთებული ვარაუდი, რომ სახელმწიფოს მხრიდან ხდება დანაშაულის ჩადენა, ბუნებრივია მარტივად იკვეთება დანაშაულს პოლიტიკური მოტივი და ხასიათი.
იგივე შეიძლება ითქვას „თიბისისთან" დაკავშირებით. და ასევე ის, რომ არც ერთი ეს საკითხი არ გაიხსნა, ესეც ცხადია მეტყველებს ამ დანაშაულებების პოლიტიკურ ხასიათზე.