„ძალიან ადვილია ქუჩის აქციების წარმართვა ამა თუ იმ მიმართულებით, თუ ვინმეს რამე ინტერესი აქვს. ეს რევოლუციური სცენარი კი აუცილებელია იმიტომ რომ, სააკაშვილი ისე ვერ ჩამოვა საქართველოში. ვხედავთ, რომ „ნაცმოძრაობა" არჩევნებით ვერ გაიმარჯვებს, არადა ჩამოსვლა სჭირდება იმიტომ, რომ უკრაინაში მის წინააღმდეგ პროცესი იწყება. ასე, რომ მისი სასიცოცხლოდ აუცილებლობაა რევოლუციური რეჟიმით გადატრიალების მოწყობა და არა საარჩევნო რეჟიმით. ამიტომაც გახარია რომ გადადგეს, მერე ბახტაძის გადადგომას მოითხოვენ, რა ვიცი,.. კიდევ ბევრი მინისტრია. ბარტყების გადმოგდების არაკი ხომ ვიცით და ამ არაკთან გვაქვს საქმე", - აცხადებს პოლიტოლოგი რამაზ საყვარელიძე.

„რეზონანსი": აქციის მე-2 დღეს „ოცნებამ" გაუშვა ირაკლი კობახიძე, მე-5 დღეს განაცხადა, 2020 წლის არჩევნები ჩატარდება პროპორციული სისტემით და ნულოვანი ბარიერით. თუმცა, მოთხოვნად რჩება გიორგი გახარიას გადაყენება. ეს 2 დათმობა არის საკმარისი და რას ელოდებით თქვენ - რა იქნება კიდევ?

რამაზ საყვარელიძე: ვხედავთ, რომ კობახიძე გადადგა. პროპორციული სისტემა დათმო ხელისუფლება, მაგრამ ეს საკმარისი არ არის. პრაქტიკულად კი თქვეს, გავიმარჯვეთო, მაგრამ საკითხი ისე არ დაყენებულა, რომ იმათ 2 ნაბიჯი გადადგეს და ჩვენ ერთი ნაბიჯი გადავდგათო, მიუხედავად იმისა, რომ ყოველთვის მიდის საპასუხო ნაბიჯები. რატომ? ამ შემთხვევაში ოპოზიცია ლოგიკური და სწორია. ოპოზიციის ამოცანა ბევრი პრობლემის მოგვარებაა და უკმაყოფილების რაც უფრო მეტი მიზეზი იქნება, რა თქმა უნდა, უფრო ეს მომგებიანი ოპოზიციისთვისაა იმ მხრივ, რომ ამ პრობლემის მოსაგვარებლად ქუჩის აქციები დაიწყო.

ქუჩის აქციების დაწყება უმნიშვნელოვანესი ფაქტია. ჩვენ 1990-იან წლებში დავბრუნდით, როცა პოლიტიკა ხდებოდა ქუჩაში. ძალიან ადვილია ქუჩის აქციების წარმართვა ამა თუ იმ მიმართულებით, თუ ვინმეს რამე ინტერესი აქვს. ეს რევოლუციური სცენარი კი აუცილებელია იმიტომ, რომ სააკაშვილი ისე ვერ ჩამოვა საქართველოში. ვხედავთ, რომ „ნაცმოძრაობა" არჩევნებით ვერ გაიმარჯვებს, არადა ჩამოსვლა სჭირდება იმიტომ, რომ უკრაინაში მის წინააღმდეგ პროცესი იწყება. ასე რომ, მისი სასიცოცხლოდ აუცილებლობაა რევოლუციური რეჟიმით გადატრიალების მოწყობა და არა საარჩევნო რეჟიმით.

ამიტომაც, გახარია რომ გადადგეს, მერე ბახტაძის გადადგომას მოითხოვენ, რა ვიცი, კიდევ ბევრი მინისტრია. ბარტყების გადმოგდების არაკი ხომ ვიცით და ამ არაკთან გვაქვს საქმე.

ივანიშვილმა გონებამახვილური, მაგრამ არცთუ ისე ორიგინალური სვლა გააკეთა. 1990-იანი წლები ტყუილად არ ვახსენე. მაშინ იმისთვის, რომ ქუჩის პოლიტიკა ჩაექრო, შევარდნაძემ გააკეთა ანალოგიური - დაბალი ბარიერი და ყველა პოლიტიკოსი პარლამენტში შევიდა. იგივე გააკეთა ახლა ივანიშვილმა. მას უნდა, რომ ჩააქროს ქუჩის პროცესები და გააუქმა ბარიერი.

„რ": მაგრამ ჩანს, რომ ვერ უშველა. ვხედავთ, რომ პროტესტი ვერ ჩააქრო ივანიშვილის ამ შეთავაზებამ, გახარიას გადაყენება ძალაშია.

რ.ს.: „ნაციონალურმა მოძრაობას" სურს ისევ ქუჩის რეჟიმში გააგრძელოს ცხოვრება. თუ ეს მოახერხა „ნაცმოძრაობამ" მაშინ ვერ უშველის. მოხერხებულ ხელისუფლებას არც აქამდე უნდა მიეყვანა საქმე, შორსმხედველობა უნდა გამოეჩინა იგივე კობახიძეს, რომ საერთოდ არ ჩამოეყვანა ეს რუსები. ასევე ამათმა, „ნაცები" ვინ სად არის, სადამსჯელო რაზმებში, ძალოვან სტრუქტურებში რამდენი „ნაცია"?! ის, რომ რევოლუციური სცენარი მზადდებოდა, სააკაშვილი უკრაინიდან ამას რამდენიმე წელია იძახდა...

„რ": ფიქრობთ, რომ აქციებზე პროცესებს „ნაცმოძრაობა" წარმართავს?

რ.ს.: ახალგაზრდებს მე რა უნდა დავაბრალო. უბრალოდ, ეს არის ყოველთვის ქუჩის პოლიტიკის განმსაზღვრელი წესი, რომ რაღაც იდეა, რომელიც იდება, ემოციური მუხტით ერთად შეკრებილ ადამიანს მისი შეფასების უნარი არ აქვს და აჰყვებიან ხოლმე ნაცნობ ფრაზას, ისევე როგორც აყვნენ „პარლამენტის შენობა ავიღოთო" მელიამ რომ წამოიძახა და მერე გაქრა. ახალგაზრდები კი ეცნენ და დაიწყეს პარლამენტის შენობის აღება.

ეს ახალგაზრდების ამბავი არ არის, ეს სტიქიური პროცესების ზოგადი თვისებაა. ასეთ აქციებში ძალიან ადვილია, რომ ნებისმიერმა პარტიამ, მითუმეტეს „ნაციონალებმა", შეაგროვოს თავიანთი ლოზუნგები და იმ მიმართულებით წავიდეს მთელი მოძრაობა. ახალგაზრდებს მოთხოვნებს „ნაცმოძრაობის" ხალხი ესვრის, ამიტომაცაა, რომ ახალგაზრდების მოთხოვნები ტყუპის ცალივით ჰგავს „ნაცმოძრაობის" მოთხოვნებს. მაშინ ამიხსენით ეს მსგავსება.

„რ": თქვენი აზრით, აქციის რეზინის ტყვიებით დარბევის გამო, რისთვისაც 10 პოლიციელი გაუშვეს უკვე, შს მინისტრმა პოლიტიკური პასუხისმგებლობა არ უნდა აიღოს? „ოცნება", რომელიც მოვიდა ლოზუნგით, რომ 26 მაისი და 7 ნოემბერი არასდროს განმეორდებოდა, ახლა ამ დარბევითაც დაემსგავსა თუ არა „ნაციონალებს" და დაკარგა მორალური უპირატესობაც?

რ.ს.: მაშინ მარტო გახარიამ რატომ, მთელმა ვერტიკალმა უნდა აიღოს (პოლიტიკური პასუხისმგებლობა). მე ნაადრევად მეჩვენება, რომ გახარიამ უნდა აიღოს პასუხისმგებლობა. ჯერ მოუსმინონ პარლამენტში, იქნებ თვითონ გახარიამ ჩამოთვალოს ვინც უნდა აიღოს პასუხისმგებლობა?!

დამნაშავესაც კი დაკითხვას უტარებენ, რომ სხვა დამნაშავეებზე გავიდნენ. თუ გახარია დამნაშავეა, და დავუშვათ დამნაშავეა, ჯერ მოვისმინოთ, რას ამბობს, იქნებ სხვა დამნაშავეებიც არსებობენ?! გახარიამ სულ მინიმუმ ეს ბრძანება გასცა, რომ რეზინის ტყვიები ეხმარათ. ეს უკვე ერთი უპატიებელი შეცდომაა, როცა იცი რა პირობებში ხარ. მიუხედავად ამისა, გამოსაძიებელია.

მე არც იმ სცენარს გამოვრიცხავ, რომ ძალოვან სტრუქტურებში მყოფმა „ნაციონალური მოძრაობის" წევრებმა გადააჭარბეს უფლებამოსილებას, ისევე როგრც 7-ში და 26-ში, იმისთვის, რომ თქვენ ის გეთქვათ, რასაც ახლა ამბობთ. აქამდე რომ მივიდა საქმე, ამის უკან დგას „ოცნების" შეცდომა.

„რ": რაც შეეხება ნულოვანი ბარიერით პროპორციული არჩევნების ჩატარებას, ბევრი მოწინააღმდეგე გამოუჩნდა ნულოვან ბარიერს და ითქვა, რომ ეს არის ხაფანგი. თქვენ ხედავთ ხაფანგს?

რ.ს.: გაიხსენეთ ვინ ამბობს.

„რ": პოლიტოლოგებიც მათ შორის, ასევე „რესპუბლიკელებიც".

რ.ს.: პოლიტოლოგებში „ნაციონალები" არ გეგულებათ? ნულოვანი ბარიერი შეიძლება ხაფანგი იყოს ორივე მხარისთვის. მე ვიყავი პარლამენტში პრაქტიკულად ნულოვანი ბარიერის დროს, სადაც ცეკვავდნენ, მღეროდნენ, ჩხუბობდნენ - ქაოსი იყო. ამ ქაოსს მართავდა შევარდნაძე. თუ ამ ქაოსის მართვა ვერ შეძელი, ეს იქნება წამყვანი პარტიისთვის, ამ შემთხვევაში „ოცნებისთვის" ხაფანგი.

ოპოზიციური სპექტრიდანაც შეიძლება ხაფანგი იყოს. პოლიტიკურ ბრძოლებში გამოცდილმა „ნაცმოძრაობამ" იცის, რომ უნდა გააჩინოს სატელიტი პარტიები და ჰყავს კიდეც ასეთი უამრავი, „ოცნებას" - არ ჰყავს. ასე რომ, „ნაცმოძრაობა" დაყრის სატელიტ პარტიებს და მერე შეიკვრება ერთ მთლიანად პარლამენტში. „ოცნება" მოახერხებს თუ არა პარტიების ასე დაყრას, არ ვიცი.

შედეგი ის იქნება, რომ შემცირდება ორპოლუსიანობა ქართულ პოლიტიკაში და მარტო „ნაცმოძრაობა" და „ოცნება" აღარ იქნებიან ქართული პოლიტიკური კლიმატის განმსაზღვრელები.

„რ": ამ კრიზისიდან გამოსვლას შეძლებს „ოცნება"?

რ.ს.: არ ვიცი. მან გაცილებით უფრო მარტივი სიტუაციიდან ვერ მოახერხა გამოსავლის პოვნა, უცებ გუშინ საკმაოდ რთული ნაბიჯი გადადგა, რაც არ ვიცი, არის თუ არა გათვლილი ბოლომდე. ნულოვანი ბარიერი „ოცნებისთვის" რთული ნაბიჯია იმის გამო, რაც გითხარით, ქაოტური იქნება სიტუაცია, „ნაცმოძრაობა" დაყრის სატელიტ პარტიებს. ის, რომ „ოცნებამ" მისთვის მომგებიანი ვარიანტი ისროლა, ძნელი სათქმელია. ისროლა ვარიანტი, რომელიც უფრო ამცირებს „ოცნების" მარცხის შანსს, ვიდრე ეს რევოლუციაა. რევოლუციის, ანუ ქუჩიდან პარლამენტში შევარდნის შანსი ასეთი წინადადებით უკვე შემცირებულია.

„რ": რუსეთში მორიგი ანტიქართული ისტერია დაწყო. რეალურად რამ გამოიწვია ეს და რას უნდა ველოდოთ კიდევ?

რ.ს.: რუსული პროპაგანდა მიდის, რომ საქართველო არის არასტაბილური ქვეყანა და ამისთვის მოჰყავთ ეს მოვლენები. ეს ყველაფერი აწყობს რუსეთს იმიტომ, რომ ანაკლიის პორტი არის აქტუალური. პორტის მშენებლობის ჩაშლის ყველაზე კარგი საშუალებაა საქართველო წარმოაჩინოს არასტაბილურ ქვეყნად, სადაც ქუჩიდან პარლამენტში ვარდება ხალხი და ამის გამო ინვესტორებს ათქმევინოს უარი.

ვინ ასრულებს ამ სქემას? მე იმის მეშინია, არ გამოგვივიდეს რუსეთის წისქვილზე წყლის დასხმა. ამიტომ, ვისაც ეს არ უნდა, უნდა ჩააწყნარონ პროცესები და გადავიდნენ დიალოგის რეჟიმზე, რომ მსოფლიოს თვალში საქართველოს იმიჯი არ იყოს არასტაბილური ქვეყნის იმიჯი.