ტელეკომპანია „რუსთავი 2"-ის ყოფილი გენერალური დირექტორი ნიკა გვარამია, რამდენიმე პარტნიორთან ერთად, ახალი ტელევიზიის შექმნას გეგმავს. გვარამია აცხადებს, რომ მთავარი დასაყრდენი მისი გუნდი იქნება, თუმცა ყოფილი გენერალური დირექტორის თანაგუნდელების მხრიდან ამ ეტაპზე დუმილია.

გვარამიას განცხადებას „რუსთავი 2"-ის ჟურნალისტების მხრიდან გამოხმაურება ჯერჯერობით არ მოჰყოლია. მათ ფეისბუქ გვერდებზე სიჩუმეა. გვარამიას ფეისბუქპოსტი „რუსთავი 2"-ის ტელეწამყვანმა, ეკა კვესიტაძემ, რომელსაც გვარამიასთან ერთად „რუსთავი 2"-ზე გადაცემა „კვირის აქცენტები" მიჰყავდა, საკუთარ გვერდზე გააზიარა.

„რეზონანსი" ტელეკომპანია „რუსთავი 2-ის" საინფორმაციო სამსახურის უფროსს, ნოდარ მელაძეს დაუკავშირდა, რომელმაც განაცხადა, რომ გამოშვებას ამზადებს და არ სცალია. თუ როდის შეძლებდა საუბარს, მელაძეს ჩვენთან საუბრისას არ დაუკონკრეტებია.

გვარამიას განცხადებამდე „რუსთავი 2-ის" საინფორმაციო სამსახურის უფროსმა 25 ივლისს სამომავლო გეგმებზე „მედიაჩეკერთან" ისაუბრა. მისი თქმით, ამ ეტაპზე ჟურნალისტების მხრიდან არსად გადასვლა არ იგეგმება.

„ჩვენ ვიბრძვით არა ჩვენი სამსახურისთვის, არამედ იმ ძლიერი პლატფორმის კრიტიკულობის შესანარჩუნებლად, რომელსაც ჰქვია "რუსთავი 2" და "კურიერი". "რუსთავი 2-ის" საინფორმაციო გუნდი შეკრულია და ამ ეტაპზე არსად გადასვლა არ განიხილება. ახალი პლატფორმის შექმნა მარტივი არ არის, ფიქრი და მობილიზება სჭირდება. ყოველ შემთხვევაში ახლა ამაზე ფიქრი და მუშაობა გუნდის შიგნით არ დაგვიწყია," - განაცხადა მელაძემ.

ნიკა გვარამიამ ახალი ტელევიზიის შექმნის შესახებ ფეისბუქის პირად გვერდზე დაწერა. ყოფილი გენერალური დირექტორი ამბობს, რომ მისი მთავარი დასაყრდენი მისი გუნდი იქნება:

„მოკლედ, მეგობრებო, არც თუ ისე დიდი ხნის, თუმცა ძალიან მძიმე და ინტენსიური ფიქრის შემდეგ, გადაწყვეტილება მიღებულია.

„ბევრ ფიქრს მოყვა ბევრი კონსულტაცია: პროფესიონალებთან, პოტენციურ ინვესტორებთან ქვეყნის შიგნით და მის ფარგლებს გარეთ, და, რაც მთავარია, ამ ქვეყნის პატრიოტებთან და დემოკრატიის გულშემატკივრებთან. გადავწყვიტე: რამდენიმე პარტნიორთან ერთად, გავაკეთო ამ ქვეყნის მთავარი ტელევიზია, მთავარი და საუკეთესო. უკეთესი, ვიდრე ნებისმიერი სხვა. უკეთესი, ვიდრე ის, რომელიც აქამდე ყველაზე საუკეთესო მგონია.

„ჩემთვის ეს, ალბათ, ცხოვრების მთავარი გამოწვევაა - მე კრიზის-მენეჯერი ვარ, არ მიყვარს რუტინა და არასდროს მიშენებია ნულიდან. მე შემიძლია გავაცოცხლო მკვდარი კომპანია, მაგრამ არასდროს მიმიცია დასაბამი ახალი კომპანიის სიცოცხლისთვის. ამ გამოწვევაში ზუსტად ვიცი, ვისი დახმარება მჭირდება, ვინ იქნება ჩემი მთავარი დასაყრდენი - ჩემი გუნდი. ჩემი ამბიცია მხოლოდ საუკეთესოს გაკეთებაა, და საუკეთესოს, ცხადია, მხოლოდ საუკეთესოები გააკეთებენ.

„ბოლო მოვლენების შემდეგ, უკიდურესად დაღლილმა, ერთად ერთი დღის განმავლობაში ვიფიქრე ქვეყნიდან წასვლაზე და დალაგებულ ცხოვრებაზე მშვიდ ქვეყანაში. ახლა, ამ დღის გამო, საჯაროდ ბოდიშს ვუხდი საკუთარ თავს, საკუთარ ოჯახს და ყველას, ვინც ელოდით ჩემს გადაწყვეტილებას, ვინც გულშემატკივრობთ ჩემს საქმეს, ვინც ფიქრობთ, რომ პატრიოტებმა და მედასავლეთეებმა ქვეყანა არ უნდა დავთმოთ, ვინც ჩემს თანაგუნდელად მოიაზრებთ საკუთარ თავს.

„თავს უფლებას მივცემ და ჩემს თხოვნასაც გავაჟღერებ: სრულიად არ მეპარება ეჭვი, რომ ძალიან მალე ახალი ტელევიზია ქვეყნის მთავარი არხი გახდება და მის შემოსავლებს უკიდურესად ოპტიმისტურად ვუყურებ. თუმცა, თავიდან, მნიშვნელოვანი ინვესტიციებია საჭირო. ინვესტორები არიან, მაგრამ ხარჯი უფრო მეტია, როგორც ყოველთვის. ძალიან მალე დავიწყებთ საჯარო კამპანიას ახალი ტელევიზიის დასახმარებლად. დიდი იმედი მაქვს თქვენი, ვინც გულშემატკივრობთ ჩვენს საქმეს;

„ვინც ფიქრობთ, რომ საქართველო არ უნდა დარჩეს სიმართლის ხმამაღლა მთქმელის და სამართლიანობის გუშაგის გარეშე; ვინც ფიქრობთ, რომ დემოკრატიას სხვაგვარად მომავალი არა აქვს; ვინც ფიქრობთ, რომ სწორს ვაკეთებთ, რომ არ ვთმობთ და ბრძოლას განვაგრძობთ; ვინც ფიქრობთ, რომ ჩვენი გზა დასავლეთია და ამაზე ყოველდღე უნდა ვილაპარაკოთ; ვინც ფიქრობთ, რომ დამნაშავე თანამდებობის პირების მხილება მედიის მთავარი საქმეა და დიდი საზოგადოებრივი სიკეთე; ვინც ფიქრობთ, რომ სამართლიანი ეგზიტპოლი არჩევნებისთვის უმნიშვნელოვანესია; ვინც ფიქრობთ, რომ გამარჯვება რეალურია და იგი ახლოსაა; ვინც ფიქრობთ, რომ უზურპატორი უნდა წავიდეს;

„ამ კამპანიას მალე დავიწყებთ იმ იმედით, რომ დაგვეხმარებით, როგორც შეძლებთ. გპირდებით, თქვენს შემოწირულობას ვაქცევთ მნიშვნელოვან ინვესტიციად ჩვენი სამშობლოს წარმატებულ მომავალში, სიტყვის თავისუფლებასა და დემოკრატიაში. საქმე ძალიან ბევრია, მაგრამ დრო ძალიან ცოტა. გპირდებით, საუკეთესო ეთერი გელით, და გპირდებით, უფრო მალე, ვიდრე გგონიათ. წარმატებები ჩვენს ერთობლივ ბრძოლას! ერთად მოვიპოვოთ თავისუფლება!" - წერს გვარამია.

ნიკა გვარამიას ამ განცხადებამდე რამდენიმე დღით ადრე ის კიევში გაემგზავრა. 23 ივლისს მან ფეისბუკზე დაწერა: „გაგიკვირდებათ და ვგაზავ. ყველა დამფუძნებელი იქაა შეკრებილი და ანგარიშის ჩასაბარებლად და მომავალი სტრატეგიის დასაგეგმად მივდივარ. მიშას ვნახავ თუ არა, ეს თუ გაინტერესებთ, კიევში თუა ვნახავ, თუ არაა - ვერ ვნახავ. ისე აწი კიდე ბევრგან დავგაზავ, და ბევრ ვინმეს შევხვდები. აბა რა გგონიათ, მოვკვდი და ჩავყევი რ2 საფლავში თუ უკეთესს ვერ მოვიფიქრებ რამეს. ვაი, თქვენ პატრონს, ვინც ასე ფიქრობთ."