ნიკა გვარამიასთვის აღკვეთის ღონისძიების შეფარდებაზე სასამართლოში ამ წუთებშიც მსჯელობენ. პროკურორის განცხადებით, სასამართლომ ყურადღება არ უნდა მიაქციოს ნიკა გვარამიას განცხადებებს, რომ ის გირაოს გადახდას არ აპირებს. თუ ბრალდებული შეფარდებული გირაოს გადახდის პროცედურებს დაარღვევს, ამისათვის არსებობს სპეციალური ღონისძიებები.

„ის, თუ რას იზამს ან არ იზამს სამომავლოდ ბრალდებული, დღევანდელ განხილვაზე ვერ მოახდენს გავლენას, ვინაიდან არსებობს ღონისძიებები, თუ ბრალდებული დაარღვევს გირაოს გადახდის ვადებს. სამომავლოდ ბრალდებული გადაიხდის თუ არ გადაიხდის გირაოს, ამის გამო გირაო რომ არ შეეფარდოს, ეს ყოველგვარ საღ აზრს მოკლებულია. ამაზე საერთოდ არ უნდა იყოს სასამართლოს მხრიდან ყურადღება გამახვილებული. გირაოს არ გადახდის ან ვერ გადახდის შემთხვევაში, შესაძლებელია შემდგომი ღონისძიებები იქნეს გამოყენებული. შესაბამისად, ამაზე ახლა მარჩიელობა შორს წაგვიყვანს," - განაცხადა პროკურორმა.