მმართველმა გუნდმა მთავრობაში საკადრო ცვლილებების განხორციელების გადაწყვეტილება საბოლოოდ მიიღო. სავარაუდოდ, მმართველი პარტია მოქმედი შს მინისტრის, გიორგი გახარიას პრემიერობასთან დაკავშირებით განცხადებას მომავალ კვირას გააკეთებს, გახარიას ნაცვლად შინაგან საქმეთა მინისტრად კი ირაკლი ღარიბაშვილს დაბრუნდება. 

გამომდინარე იქიდან, რომ გიორგი გახარიას პრემიერობასთან დაკავშირებით გუნდში გარკვეული წინააღმდეგობა არსებობდა და ასევე, კულუარული ინფორმაციით, მას მთავრობაში მოწინააღმდეგეებიც ჰყავს, არსებობს მოლოდინი, რომ მთავრობაშI ადგილს ყველა მინისტრი ვერ შეინარჩუნებს. 

ანალიტიკოსები „რეზონანსთან“ ვარაუდობენ,რომ თავდაპირველად თუ გახარია პრემიერი გახდება, დიდი ცვლილებები მოსალოდნელი არ იქნება. მათივე აზრით, გახარიას ივანიშვილი რის საშუალებასაც მისცემს, იმ დონის ცვლილებებს განახორციელებს. 

პოლიტიოლოგებს მოლოდინი აქვთ, რომ გახარიას გაპრემიერებასთან ერთად, შესაძლოა მთავრობის ეკონომიკური გუნდის ცვლილება მოხდეს, რადგანაც ლართან დაკავშირებულ უკმაყოფილებას ის ამ  ცვლილების მიზეზად გამოიყენებს. ისინი ვარაუდობენ, რომ მინისტრთა კაბინეტში მაია ცქიტიშვილი ნამდვილად დარჩება, ხოლო დანარჩენის ბედი უკვე სამომავლოდ გამოჩნდება. 

პოლიტოლოგები ერთ მნიშვნელოვან გარემოებაზეც ამახვილებენ ყურადღებას და ამბობენ, რომ თუ ირაკლი ღარიბაშვილი კვლავ შინაგან საქმეთა მინისტრად დაბრუნდა, ეს იმის ნიშანი იქნება, რომ გახარიას ივანიშვილი ბოლომდე არ ენდობა და მას გამკონტროლებელ პირად ღარიბაშვილს უსვამს. ხოლო ღარიბაშვილის და გახარიას მეშვეობით ის  წინასაარჩევნოდ მკაცრი ხელის პოლიტიკას მიმართავს და საბოლოოდ  დამთავრდება იმაზე საუბარი, რომ „ოცნება“ უნიათო ხელისუფლებაა. 

ანალიტიკოსი ვახტანგ ძაბირაძე „რეზონანსთან“ აცხადებს, რომ ჯერჯერობით რთულია საუბარი იმაზე, გახარიას გაპრემიერების შემთხვევაში ვინ დატოვებს მინისტრის პორტფელს. თუმცა ძაბირაძე არ გამორიცხავს, რომ გახარია, თუკი ივანიშვილი საშუალებას მისცემს, პირველ რიგში ეკონომიკურ გუნდს შეცვლის. თუმცა ძაბირაძე დარწმუნებულია, რომ სამთარობო  კაბინეტს არცერთ შემთხვევაში ინფრასტრუქტურის მინისტრი მაია ცქიტიშვილი არ დატოვებს და ის პოსტს ყველა ვარიანტში შეინარჩუნებს. 

„გახარია გახდება პრემიერი, მაგრამ ეს იმას არ ნიშნავს, რომ ის ნამდვილად მთავრობის მეთაური იქნება. აქ საუბარი იმაზეა, თუ ივანიშვილი გახარიას ვისი გაშვების ან დატოვების უფლებას მისცემს. არ მგონია ახლა, რომ მან ასე ერთი ხელისმოსმით, ივანიშვილთან კითხვის გარეშე მინისტრები გაათავისუფლოს. 

„ერთი რამ დაბეჯითებით შემიძლია ვთქვა - რომ მაია ცქიტიშვილი დიდი ალბათობით მინისტრის პოსტს შეინარჩუნებს. დანარჩენების რა მოგახსენოთ... ცვლილებებს  უფრო ეკონომიკური  გუნდიდან  ველი და ვფიქრობ, რომ ლარის კურსის ასეთ კატასტროფულ ზრდას ამ კუთხით გადაფარავენ“,-აცახდებს ძაბირაძე „რეზონანსთან“. 

მისივე თქმით, არ არის იმის მოლოდინი, რომ გახარიას ივანიშვილი ასე დამოუკიდებლად მართვის საშუალებას მისცემს. მითუმეტეს იმ გამოცდილებიდან, რაც მან კვირიკაშვილთან დაკავშირებით განაცხადა. ივანიშვილი პოლიტიკაში ზუსტად იმიტომა დაბრუნდა, რომ მისი გავლენა ხელისუფლებაზე უფრო მძაფრი იყოს. 

ანალიტიკოსი ვარაუდობს, რომ ღარიბაშვილი-გახარიას ტანდემით ივანიშვილი ქვეყანაში მკაცრი ხელის პოლიტიკას განახორციელებს და საუბარი იმაზე, რომ „ოცნების“ ხელისუფლება უნიათოა, დასრულდება. მათი მეშვეობით ის ხელისუფლების შენარჩუნებას კვლავ შეეცდება. 

ანალიტიკოსი ლევან ალაფიშვილი „რეზონანსთან“  ამბობს, რომ გახარია გაპრემიერებისთანავე რადიკალურ ცვლილებებს არ დაიწყებს. მისი აზრით,   საპარლამენტო არჩევნებამდე ცვლილებები ნამდვილად იქნება, თუმცა ეს არ იქნება გუნდი, რომელიც ერთმანეთს შიგნიდან ჭამას არ დაუწყებს. 

მისი აზრით, შესაძლოა, სახის შენარჩუნების მიზნით, გარკვეული ცვლილებები იყოს, თუმცა გახარია მაინც თავის მოქმედებებში ბოლომდე დამოუკიდებელი არასდროს იქნება.  

„თუკი ეს შუალედური სვლა და ცვლილება გაამართლებს, ვფიქრობ, რომ ამის შემდეგ შეიძლება უკვე თვისობრივი ცვლილებებიც ვიხილოთ. თუმცა, ნაკლებად სავარაუდო მგონია, რადგანაც ამისთვის დრო არ ეყოფათ. 

„ეს არის მმართველი პოლიტიკური ძალის სახის გადარჩენის მცდელობა, რომ შემოდგომაზე მოსალოდნელი ვნებათაღელვა განეიტრალდეს. ამისთვის  არც იმას გამოვრიცხავ, რომ ლარის კურსის ზრდის მიზეზით ეკონომიკური გუნდი შეიცვალოს. ამით  გარკვეულ წილად გახარია კიდევ ქულების დაწერას შეეცდება. 

„თუმცა, ირაკლი ღარიბაშვილის შს მინისტრად დაბრუნება საკმაოდ საინტერესო გარემოებაა. ეს იმას ნიშნავს, რომ ივანიშვილი მას ყველაზე გავლენიან სამინისტროში ისეთ ადამიანს ჩაუსვამს, რომელიც მის გაკონტროლებას შეძლებს. ამით ჩანს, რომ ივანიშვილი მას ბოლომდე არ ენდობა“, - აცხადებს ალაფიშვილი „რეზონანსთან“. 

ანალიტიკოსი ზაალ ანჯაფარიძე კი გახარიას გაპრემიერების შემთხვევაში რადიკალურ სამთავრობო ცვლილებებს არ ელის. ანჯაფარიძე „რეზონანსთან“ აცხადებს, რომ, მაღალი ალბათობით, შინაგან საქმეთა მინისტრად ივანიშვილისთვის  ყველლაზე სანდო პირი დაინიშნება და გახარია, რა თქმა უნდა, ამას ნამდვილად უზრუნველყოფს. 

ანჯაფარიძე ამბობს, რომ  გახარია შეეცდება  ჯერჯერობით ქვეყანაში სიტუაცია დაალაგოს და ახალი გუნდის შექმნაზე შემდეგ იფიქროს. 

„მგონია, გახარია ცვლილებებს არ განახორციელებს და ეს იქნება ერთადერთი იმით განპირობებული, რომ მაშინ ამით ხელისუფლება ქვეყანაში არსებულ პრობლემებს აღიარებს. ანუ არ შეცვლის თუნდაც ლარის გამო ეკონომიკურ გუნდს, რადგანაც ეს უკვე მმართველ გუნდზე გადაბრალება გამოდის. 

„ძალიან ბევრი მგრძნობიარე თემები დაგროვდა, როგორც ანაკლიასთან, ასევე ფოთის პორტთან დაკავშირებით. ამიტომ ასეთი მასიური გადაადგილება, თუნდაც ეკონომიკური გუნდის მიმართულებით, არ იქნება. თანაც ამომრჩევლის თვალში გაჩნდება უნდობლობა, რომ მმართველი გუნდი სწორ პოლიტიკას არ ატარებდა.  ამიტომაც, არჩევნებამდე თუ გახარია პრემიერი იქნება, დიდ არაფერ ცვლილებებს არ ველი“, - აცხადებს ანჯაფარიძე „რეზონანსთან“.