„ჩვენ მყარად მხოლოდ ერთადერთი რამ ვიცით, რომ მამუკა ხაზარაძეს აქვს სერიოზული ფინანსური რესურსი, რაც შეეხება პრეზენტაციას, ვერ ვიტყოდი, რომ ამან საზოგადოებაზე განსაკუთრებული შთაბეჭდილება მოახდინა, ვერც წარმოდგენილი კონტინგენტის თვალსაზრისით, ვერც დამფუძნებლების თვალსაზრისით და ვერც სხვა მოცემულობების თვალსაზრისით (ჯერჯერობით), მაგრამ ეს იმას არ ნიშნავს, რომ ხვალ ან ზეგ სიტუაცია არ შეიცვლება," - ასე აფასებს „რეზონანსთან" ექპერტი კავკასიის საკითხებში მამუკა არეშიძე, „თი-ბი-სი ბანკის" დამფუძნებლის მამუკა ხაზარაძის მიერ მოძრაობა „ლელოს" პრეზენტაციას და ამ მოძრაობის მომავალ საქმიანობას.

„რეზონანსი": ხაზარაძის მოძრაობა „ლელოს" პრეზენტაციაზე რას გვეტყვით, როგორი სტარტი აქვს და შეძლებს თუ არა 2020 წლის საპარლამენტო არჩევნებამდე კონკურენტუნარიან პარტიად ჩამოყალიბდეს?

მამუკა არეშიძე: ამ ეტაპზე მე ვფიქრობ, რომ ის ძალა, რომელიც ყალიბდება, უახლოეს მომავალში ანგარიშგასაწვევი იქნება, მაგრამ რამდენად შეძლებს თავის დასახული ამოცანების შესრულებას, ანუ არჩევნებში გამარჯვებას, ან განსაკუთრებული წარმატების მიღწევას, ამაზე ლაპარაკი ნაადრევია.

„რ": ხაზარაძემ განაცხადა, რომ მის მოძრაობაში არ იქნებიან ცნობილი პოლიტიკოსები.

მ.ა.: არცერთი ცნობილი პოლიტიკოსი რომ არ იქნება მის მოძრაობაში, ეს კარგია, ის სახეებიც, რომლებიც წარმოდგენილია, გარკვეულწილად კონიუქტურულია, ზოგიერთმა მათგანმა საზოგადოებას თავისი წინააღმდეგობრივი პოზიციით დაამახსოვრა თავი.

„რ": 12 ლიდერის იდეაზე რას გვეტყვით?

მ.ა.: ყველა ასეთი ტიპის იდეა საინტერესოა, ჩვენ მხოლოდ იდეა მოვისმინეთ. არ ვიცით განხორციელების გზები, როგორი იქნება შერჩევითი კრიტერიუმი, როგორი საგზაო რუკა ექნებათ, რადგან ეს ყველაფერი ჯერჯერობით ბუნდოვანია, გამიჭირდება შეფასების მიცემა, ზოგადად იდეა საინტერესოა.

„რ": ანაკლიაში „ლელოს" პრეზენტაციის ჩატარებაზე რა აზრის ხართ, რატომ ანაკლია?

მ.ა.: ყველაზე უფრო არ მომეწონა ანაკლიასთან დაკავშირება იმიტომ, რომ ხაზარაძეს დიდი ხანია ვიცნობ და თუ რამე პრეტენზია მასთან მაქვს, მაქვს ზუსტად ანაკლიასთან დაკავშირებული და კონკრეტულად ერთ საკითხთან, რომელიც სახელმწიფოს ჩართულობას ეხება ამ პროექტის რეალიზაციის საქმეში. ვგულისხმობ სახელმწიფო დაზღვევას, ჩვემთვის და საზოგადოების იმ ნაწილისთის ვინც ეს თემა კარგად იცის უსიამოვნო იყო ეს პრეზენტაცია ანაკლიაში.

„რ": შეძლებს თუ არა ხაზარაძე პოლიტიკაშიც ისეთივე წარმატებული იყოს, როგორი წარმატებულიც ბიზნესშია?

მ.ა.: მახსოვს მამუკა ხაზარაძეს ასეთი გამოცდილება უკვე ჰქონდა, 2000-იანი წლების დასაწყისში, როდესაც შეიქმნა პოლიტიკური ორგანიზაცია „ახალი მემარჯვენეები", მაშინ ხაზარაძე ამ პოლიტიკურ ძალას ეხმარებოდა, მიუხედავად იმისა, რომ ამ ორგანიზაციაში თვითონ აქტიურად არ ჩანდა. მაშინ ამ ორგანიზაციის პარალელურად შეიქმნა „მოძრაობა ახალი მემარჯვენეები" და ამ მოძრაობის შეხვედრები, რომლებშიც საზოგადოების საქმიანი და სახელიანი ნაწილი მონაწილეობდა, იმართებოდა მამუკა ხაზარაძის ოფისში.

მაშინ რაღაც მომენტში, მან საზოგადოებრივი ორგანიზაციის მუშაობა შეაჩერა და პოლიტიკასაც გაემიჯნა, თუმცა იგი მაინც ყოველთვის ასოცირდებოდა „ახალ მემარჯვენეებთან". ანუ გარკვეული გამოცდილება აქვს, და ამ გამოცდილების რეალიზაცია „ლელოს" შემთხვევაში როგორ მოხდება, ვერ გეტყვით. ვფიქრობ, რომ სეროზული წინააღმდეგობები იქნება. იმიტომ, რომ ის მოცემულობა, რომელიც ბიძინა ივანიშვილს ჰქონდა 2011 წელს, როცა ოპოზიცია და საზოგადოება კონსოლიდირებული იყო, არსებული რეჟიმის წინააღმდეგ, დღეს არ არის.

„რ": ზოგიერთი ანალიტიკოსის აზრით, გამოცდილი პოლიტიკოსების გარეშე პარტია და პოლიტიკა ვერ შეიქმნება, თუმცა ხაზარაძე ცნობილი პოლიტიკოსების გარეშე აპირებს პოლიტიკურ მოღვაწეობას, ამ ფაქტს როგორ განიხილავთ?

მ.ა.: ერთის მხრივ გამოცდილი პლიტიკოსებს მოაქვთ პოლიტიკური გამოცდილება,მაგრამ მეორეს მხრივ საზოგადოებას იმდენად მობეზრდა პარტიიდან პარტიაში გადაბარგებული პოლიტიკოსები, რომ ამას ახალი ორგანიზაციისთვის შესაძლოა უარყოფითი შედეგი მოეტანა, ვთვლი, რომ მაინც სწორი გზა შეარჩია, როდესაც პოლიტიკური და პოლიტიკურად ანგაჟრებული ფიგურები არ შეარჩია.ამის მინუსი ისაა, რომ პოლიტიკის კეთება ახლა გზადაგზა უნდა ისწავლონ, ამ თვალსაზრისით, შესაძლოა ვერც მოასწრონ პოლიტიკური სტრუქტურების სრულფასოვანი შექმნა.