(რეზონანსი) შინაგან საქმეთა სამინისტრომ გამოაქვეყნა 2019 წლის მე-3 კვარტლის მონაცემები იმ პირების რაოდენობის შესახებ, რომლებსაც მართვის მოწმობაზე მინიჭებული ქულები დააკლდათ.

არსებული ინფორმაციით, საქართველოში მართვის მოწმობის მოქმედების უფლება 125 ადამიანს შეუჩერდა. მათ შორის მისი მოქმედება ამ დროისთვის შეჩერებული აქვს - 117 მოქალაქეს, ხოლო - 8 პირმა გამოცდა ჩააბარა.

მართვის მოწმობაზე მინიჭებული 100 ქულა სრულად ყველაზე მეტ - 61 პირს (რეზიდენტი პირი) დედაქალაქში ამოეწურა. შემდეგ მოდის ქვემო ქართლი, სადაც უწყების ცნობით, ქულები 15 პირს (რეზიდენტი) ამოეწურა. მე-3 ადგილზე ამ მხრივ სამეგრელო-ზემო სვანეთი, სადაც დოკუმენტის მოქმედება 8 პირს (რეზიდენტი) შეუჩერდა. მე-4 და მე-5 პოზიციებს კი იმერეთი და სამცხე-ჯავახეთი ინაწილებენ, სადაც ქულები სრულად შესაბამისად, 7 და 6 პირს ამოეწურა.

მე-3 კვარტლის მონაცემებით, ქვეყნის მასშტაბით, მართვის მოწმობაზე მინიჭებულ 100 ქულიანი სისტემიდან სხვადასხვა დარღვევის გამო ზოგადად ქულები დაკლებული აქვს ჯამში, 170 249 ადამიანს, ხოლო 1 025 068 პირს სრულად აქვს შენარჩუნებული მართვის მოწმობაზე მინიჭებული 100 ქულა.