ოკუპირებულ აფხაზეთში, ცხინვალის რეგიონსა და დნესტრისპირეთში მუდმივად მცხოვრები რუსეთის მოქალაქეების გარკვეულ კატეგორიას კრემლის ლიდერმა საცხრამაისო საჩუქარი გაუკეთა.

ვლადიმერ პუტინის განკარგულებით, არაღიარებულ რესპუბლიკაში მცხოვრებ მეორე მსოფლიო ომის, ფინეთისა და იაპონიის ომების ვეტერანებს, ასევე, ომში დაღუპულთა ქვრივებს ფაშიზმზე გამარჯვების 75-ე წლისთავზე 75 000 რუბლი (დაახლოებით 1000 აშშ დოლარი) გადაეცემათ. ამავე რაოდენობით თანხას მიიღებენ ნაცისტთა საკონცენტრაციო ბანაკების და გეტოს ყოფილი პატიმრები, რომლებიც ბანაკებში სრულწლოვანებამდე მოხვდნენ. ისინი კი, ვინც ბანაკებში სრულწლოვანი მოხვდა, 50 000 რუბლს მიიღებენ. პრეზიდენტის განკარგულება ცოტა ხნის წინ კრემლის ვებ-გვერდზე გავრცელდა.