ოკუპირებულ აფხაზეთში დაძაბულობა და შეტაკებებია - ოპოზიციის წარმომადგენლებმა დე ფაქტო პრეზიდენტის  რაულ ხაჯიმბას ადმინისტრაცია შტურმით აიღეს და შენობაში შეიჭრნენ. ოკუპირებულ სოხუმში აქციაზე შეკრებილებსა და ე.წ. ადმინისტრაციის დაცვას შორის შეტაკებაც მოხდა. ხმაური ამ წუთებშიც გრძელდება. 

მთავრობა „ანაკლიის განვითარების კონსორციუმთან" ხელშეკრულებას წყვეტს. სამომავლო გეგმებთან დაკავშირებით ხელისუფლებაში აცხადებს, რომ პროექტი გაგრძელდება ახალ ინვესტორთან ერთად. მეტიც, საპარლამენტო უმრავლესობის წევრი რევაზ არველაძე „რეზონანსთან" საუბრისას ამბობს, რომ ეს ახალი ინვესტორი შესაძლოა ის ჩინური კომპანია იყოს, რომელიც პროექტით თავდაპირველად დაინტერესდა, (ჩინეთში სიდიდით მეორე ყველაზე მსხვილ სამშენებლო კომპანია China Railway International Group-ზეა საუბარი).

გახმაურდა დამპალოს სასაფლაოზე მომხდარი დაპირისპირების დეტალლები. შეგახსენებთ, რომ ამ დაპირისპირებას ახალგაზრდა კაცის მურად წურწუმიას გარდაცვალება მოჰყვა. ამჟამად საქმეზე უკვე დაკავებულია ორი პირი რომელთაგანაც ერთი ძალოვანი სტრუქტურის თანამშრომელია, ხოლო მეორე კი ერთ-ერთი კერძო კომპანიის დისტრიბუტორი.

"მთავარი ნაკლი ჩვენი დღევანდელი ხელისუფლების ისევ და ისევ მისი პოლიტიკური უნიათობაა, არადა ყველაფერი აქვთ საიმისოდ, რომ სანამ გვიან არ არის ხალხის ნდობა დაიბრუნონ და დამნაშავეებს კანონიერი პასუხი აგებინონ. თუ სახელმწიფოს მცირეოდენი ნიშნები გაგვაჩნია და მთლად წყალწაღებული არ ვართ, უნდა იგრძნოს ქვეყანამ, რომ მას პატრონი ჰყავს" - აცხადებს შოთა რუსთაველის პრემიის ლაურეატი, მწერალთა კავშირის თავმჯდომარე რევაზ მიშველაძე, რომელსაც "რეზონანსი" ქვეყანაში მიმდინარე პოლიტიკურ მოვლენებზე გაესაუბრა.

ოპოზიციური სპექტრი ე.წ. შავი სიის პირველ ათეულს უახლოეს დღეებში დაასახელებს, რომელსაც საქართველოს დასავლელ პარტნიორებს გადასცემენ, რაც საპარლამენტო უმრავლესობის წევრის, შოთა ხაბარელის განცხადებით, თავად ოპოზიციის წინააღმდეგ მოქმედებს. მეტიც, ის ოპოზიციას ბოლშევიკებს ადარებს.

„გარდაცვალებაზე საერთოდ არ ვიძლევი კომენტარებს, ვირუსები არ მომრავლებულა, ისეა როგორც უნდა იყოს ზამთარში, არაფერი არაა მომრავლებული,"- ამის შესახებ „რეზონანსთან" დაავადებათა კონტროლის ეროვნული ცენტრის სამეცნიერო საბჭოს თავმჯდომარემ, პაატა იმნაძემ განაცხადა.

აშშ-სა და ირანს შორის უკიდურესად დაძაბული ვითარების მიუხედავად, მესამე მსოფლიო ომის დაწყების ზღვარზე არ ვართ. ამის შესახებ „რეზონანსთან" „არსენალის" მთავარი რედაქტორი ირაკლი ალადაშვილი საუბრობს. ის ასევე საქართველოს როლზეც ამახვილებს ყურადღებას და ამბობს, რომ აშშ-ირანის სამხედრო შეტაკების შემთხვევაში არა მხოლოდ საქართველო, მთელი რეგიონი სერიოზული საფრთხის წინაშე დადგება, თუმცა მოსაზრება, რომ პენტაგონმა საქართველოს ტერიტორიაზე შესაძლოა სამხედრო ბაზა განათავსოს, ანდა ამ ტერიტორიიდან ირანის საჰაერო სივრცეში შეჭრა მოახდინოს, მისი აზრით, არასწორია.

„მესამე ძალის ვარიანტი გულისხმობს, რომ ეს ძალა უნდა იყოს მომავალი პარლამენტის ცხოვრების განმსაზღვრელი. დღევანდელ პანორმაში ასეთი პერსპექტივა არ ჩანს“, - ასეთ პროგნოზს აკეთებს პოლიტოლოგი რამაზ საყვარელიძე 2020 წლის საპარლამენტო არჩევნებმდე პოლიტიკურ სცენაზე ახალი ძალის გამოჩენასთან დაკავშირებით.

საარჩევნო სისტემასთან დაკავშირებით, მმართველ პარტიასა და გაერთიანებულ ოპოზიციას შორის გასულ წელს დაწყებული პოლიტიკური ვაჭრობა წელსაც გაგრძელდება. იანვარში დასავლელი შუამავლების მონაწილეობით მხარეების კიდევ ერთი შეხვედრაა დაგეგმილი. ოპოზიციაში მიიჩნევენ, რომ ეს შეხვედრები ხელისუფლების მიერ დადგმული სპექტაკლია, რაც მოჩვენებით დიალოგს უფრო ჰგავს, ვიდრე მცდელობას იმისა, რომ საბოლოოდ შეთანხმება მოხდეს.

„მრჩეველის თანამდებობაზე დანიშვნას არ მგონია, რომ დიპლომატიური განათლება ან პარტიული ნიშნით შერჩევა სჭირდებოდეს. ეს ალბათ თავად საგარეო უწყების გადაწყვეტილებაა, რადგან დავით გომართელს კულტურის სფეროში რჩევების მიცემა არ გაუჭირდება“, - ასე ეხმაურება „ოცნების“ დეპუტატი ლადო კახაძე მომღერალ დავით გომართელის იტალიაში საქართველოს საელჩოში მრჩევლის თანამდებობაზე დანიშვნას.

ე.წ. დამპალოს სასაფლაოზე მომხდარ სასტიკ მკვლელობასთან დაკავშირებით ორი  ვერსია ვრცელდება - 24 წლის  მურად წურწუმიას  წამებასა და მკვლელობაში ბრალდებული სპეცრაზმელი ზვიად ფოფხაძე და მოკლულის ოჯახი მომხდარის სხვადასხვა ამბავს ჰყვებიან. ფოფხაძე მხოლოდ მურად წურწუმიას ცემის ფაქტს აღიარებს და ასევე ამბობს, რომ 24 წლის ბიჭი მხოლოდ მან სცემა, ხოლო როდესაც ნახა, რომ მისი მდგომარეობა დამძიმდა, ის სახლში წაიყვანა და სასწრაფო გამოიძახა. 

„ევროპის საბჭოს მინისტერიალი იმართება ევროპის საბჭოს ეგიდით და არა საქართველოს ხელისუფლების გადაწყვეტილებით.  ამიტომ უარის თქმა ლავროვის ვიზიტზე საქართველოს ხელისუფლების მხრიდან სწორი არ იქნება“, - ასე ეხმაურება პოლიტოლოგი ვახტანგ ძაბირაძე სერგეი ლავროვის შესაძლო ვიზიტს საქართველოში.