თბილისში, ბერი გაბრიელ სალოსის ქუჩაზე, ჩატარებული სპეცოპერაციის შედეგად დაკავებულია ერთი და ლიკვიდირებულია დანაშაულებრივი ჯგუფის სამი წევრი.

გაბრიელ სალოსის გამზირზე ჩატარებული სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპულია ერთი და დაჭრილია 4 სამართალდამცველი.

დედაქალაქის შუაგულში ელიავას ბაზრობა იმ ფორმით, რა ფორმითაც დღესაა, არ უნდა არსებობდეს - ამის შესახებ თბილისის მერის მოადგილე ირაკლი ბენდელიანმა "რადიო პალიტრის" გადაცემა "შუადღის სტუდიაში" განაცხადა და აღნიშნა, რომ თბილისის მერია გრძელვადიან პერსპექტივაში ელიავას ბაზრობის საკითხის გადაწყვეტას გეგმავს.

უკრაინიდან საქართველოს 8 მოქალაქის დეპორტაცია მოხდა. მათ შორისაა "რუსთავი 2"-ის ოპერატორი - თამაზ შავშიშვილი კიევის სამართალდამცავ უწყებას არაადამიანურ მოპყრობაში ადანაშაულებს.

საქართველოში აზარტული თამაშების ბიზნესი, შესაძლოა, შეიზღუდოს. ეს ყველაფერი პარლამენტში ახალ საკანონმდებლო ინიციატივას უკავშირდება, რომლის მიხედვითაც, მინიმალური ასაკი 18-დან 21 წლამდე იზრდება.

იუსტიციის მინისტრი თეა წულუკიანი უჩა ნანუაშვილს ყველაზე უსამართლო სახალხო დამცველს უწოდებს. წულუკიანმა ომბუდსმენი ე.წ. ციანიდის საქმეზე გამოთქმული განცხადების გამო გააკრიტიკა. შეგახსენებთ, უჩა ნანუაშვილმა დეკანოზ მამალაძის საქმეზე გამოქვეყნებულ ანგარიშში უკმაყოფილება გამოთქვა ხელისუფლების წარმომადგენლების მხრიდან საჯარო განცხადებების გამო. წულუკიანს კი მისივე თანაგუნდელი დაუპირისპირდა და უჩა ნანუაშვილის მისამართით გამოთქმულ განცხადებას უპასუხისმგებლო უწოდა.

ლარის კურსი დოლარის მიმართ გაუფასურებას განაგრძობს. ამასთან დაკავშირებით მმართველმა გუნდმა გადაწყვიტა, ეროვნული ბანკის პრეზიდენტი პარლამენტში დაიბაროს და არსებულ ვითარებასთან დაკავშირებით განმარტებები მოისმინოს.

იმ სამინისტროებში, რომლებიც სტრუქტურული ცვლილებების შედეგად უნდა გაუქმდეს და სხვა უწყებებთან შეერთდეს, დაახლოებით 2,900 ადამიანი მუშაობს. რამდენი პროცენტით შემცირდება ჯამში კადრების რაოდენობა, ჯერჯერობით უცნობია. თუმცა ფაქტია, სამინისტროების გაერთიანებას ადამიანური რესურსის შემცირება ბუნებრივად მოჰყვება.

1 აშშ დოლარის ოფიციალური ღირებულება 2,6830 ლარი გახდა. ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად აშშ დოლარის ღირებულებამ 2,6830 ლარი შეადგინა. კურსი, რომელიც დღეს მოქმედებდა, 2,6538 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0292 ლარი შეადგინა.

დაგეგმილი სტრუქტურული ცვლილებების შედეგად 18 სამინისტროდან 14 უწყება დარჩება. უფრო კონკრეტულად კი, ეკონომიკისა და მდგრადი განვითარების სამინისტროს უერთდება ენერგეტიკის სამინისტრო და გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი; სპორტისა და ახალგაზრდობის საქმეთა სამინისტროს ახალგაზრდობის საქმეთა მართვის კომპონენტი - განათლებისა და მეცნიერების სამინისტროს, ხოლო აღნიშნული უწყების სპორტის კომპონენტი კულტურისა და ძეგლთა დაცვის სამინისტროს უერთდება; გარემოს დაცვის სამინისტროს უერთდება სოფლის მეურნეობის სამინისტრო. საგარეო საქმეთა სამინისტროს კი უერთდება სახელმწიფო მინისტრის აპარატი ევროპულ და ევროატლანტიკურ სტრუქტურებში ინტეგრაციის საკითხებში.

მთავრობაში დაგეგმილი მასშტაბური საკადრო და სტრუქტურული ცვლილებების შედეგად მინისტრთა კაბინეტს, ჯამში, 7 მინისტრი დაემშვიდობება, 5 სამინისტრო კი გაუქმდება.

თბილისის მერი კახი კალაძე "სიტი პარკთან" სამართლებრივი დავის დაწყებას აპირებს. მისი თქმით, კომპანიასთან დადებული ხელშეკრულება შესასწავლია. "სიტი პარკი ძალიან უხეშად ექცევა ადამიანებს, რაც გამაღიზიანებელია", - აცხადებს კალაძე.