ცესკო-მ ხმების 100% დაითვალა, სალომე ზურაბიშვილს 38,6%, გრიგოლ ვაშაძეს კი 37,7% აქვს. "ოცნების" კანდიდატი "ნაცმოძრაობის" კანდიდატს მხოლოდ 0,9%-ით უსწრებს და მეორე ტური 2 დეკემბრამდე უნდა დაინიშნოს.

საპრეზიდენტო არჩევნების პირველ ტურში სალომე ზურაბიშვილისა და გრიგოლ ვაშაძის შედეგებს შორის სხვაობა მხოლოდ 0,2%-ია და სწორედ ამის გამო, მეორე ტურის წინ, "ოცნების" ლიდერების ნაწილს მოუწია აღიარება, რომ საზოგადოებამ მმართველ პარტიას ამ შედეგით "გაულაწუნა" და არ გამართლდა არც ბიძინა ივანიშვილის მტკიცება, რომ მას საზოგადოებაში ჭარბი ნდობა აქვს.

დაძაბული არჩევნები და მეორე ტური ქვეყნის საინვესტიციო გარემოზე უარყოფითად იმოქმედებს. დიდია საფრთხე, რომ ინვესტიციები შეჩერდეს და ეკონომიკურ ზრდას საფრთხე დაემუქროს, რადგან არჩევნებმა პოლიტიკური ვითარება უკიდურესად დაძაბა. განსაკუთრებით გრძელვადიან ინვესტიციებს ემუქრება საფრთხე, ხოლო ახალი ინვესტორების მოზიდვა საგრძნობლად გაძნელდება.

მომავალი წლიდან მომხმარებელს ალკოჰოლი და თამბაქო კიდევ უფრო გაუძვირდება. ბიუჯეტის პროექტის მიხედვით, 2019 წელს აქციზის გადასახადი მატულობს, რაც პროდუქციის ფასზეც ადეკვატურად აისახება. აქციზის ზრდის გადაწყვეტილება საქართველოსათვის ევროპასთან ასოცირების ხელშეკრულებით ნაკისრი ვალდებულებაა. მწარმოებლებს ხარჯი კიდევ გაეზრდებათ, რაც უარყოფით გავლენას ფასზეც მოახდენს.

მოსახლეობის დიდი ნაწილი 2 დღეში სესხს ვეღარ აიღებს. მიზეზი ეროვნული ბანკის მიერ შემუშავებული რეგულაციებია, რომლებიც დაუდასტურებელი შემოსავლის მქონე თვითდასაქმებულებს შეეხებათ. მინიმუმ, ნახევარი მილიონი ადამიანი ფულს ვეღარ ისესხებს. შეზღუდვები დაწესდება დადასტურებული შემოსავლის მქონე პირებისათვის ვადებსა და კოეფიციენტებთან დაკავშირებითაც.

ბოლო რამდენიმე დღეა, უცხოურ ბაზრებზე ნავთობის ფასი ურთიერთსაპირისპირო მიმართულებით შეიცვალა და დაახლოებით 12%-ით შემცირდა. როგორც ნავთობპროდუქტების იმპორტიორთა კავშირში აღნიშნავენ, ნედლი ნავთობის წარმოება გაიზარდა და ფასზე დამატებით ამ პროცესმაც მოახდინა გავლენა. ამ ეტაპზე ბარელი ნავთობის ღირებულება 77 დოლარს შეადგენს, რაც სექტემბრის შემდეგ ერთ-ერთი ყველაზე დაბალი მაჩვენებელია, სულ ცოტა ხნის წინ კი ანალიტიკოსები პროგნოზირებდნენ, რომ საწვავის ღირებულება 100 დოლარს მიაღწევდა, თუმცა დღეს ვითარება რადიკალურად შეიცვალა.