საქართველოს მეხუთე პრეზიდენტი უკვე ოფიციალურად სალომე ზურაბიშვილია. ინაუგურაცია თელავში, ერეკლე მეორის სასახლეში, ჩატარდა. მთელი დღის განმავლობაში პრეზიდენტის ინაუგურაციის პარალელურად სიტუაცია კახეთში უკიდურესად დაძაბული იყო.

"შესთავაზეს ალერნატიული მარშრუტი და ტრანსპორტი იმისათვის, რომ თელავში მისულიყვნენ. ოპოზიცია თავიდანვე იმისთვის იყო მზად, რომ ერთგვარი აჟიოტაჟი და ისეთი განცდა შეექმნა, თითქოს თელავში ჩასვლის საშუალებასა და გამოხატვის თავისუფლებას არ აძლევდნენ," - ამბობს ანალიტიკოსი ზაალ ანჯაფარიძე "მთელ კვირასთან" საუბრისას.

ერთ-ერთი პირველი საკითხი, რომელზეც ახლად არჩეულ პრეზიდენტს მმართველ გუნდთან მსჯელობა მოუწევს, ცესკო-ს თავმჯდომარის კანდიდატურა იქნება. ცესკო-ს თავმჯდომარე თამარ ჟვანიას უფლებამოსილების ვადა ეწურება, მოქმედი კანონმდებლობით, ახალი თავმჯდომარის კანდიდატურის შერჩევა პრეზიდენტის უფლებამოსილებაში შედის. ახალი კანდიდატურის წარდგენა კი დეკემბრის ბოლომდე უნდა მოხდეს.

უკრაინაში დიდი ზეიმია. ისტორიული საეკლესიო კრება შედგა. კიევში, წმინდა სოფიას ტაძარში შეკრებილმა მღვდელმთავრებმა უკრაინის ერთიანი მართლმადიდებელი ეკლესიის მეთაური აირჩიეს - 39 წლის მიტროპოლიტი ეპიფანე, რომელიც მსოფლიო პატრიარქმა ბართლომეოსმა სტამბულში უკვე დაპატიჟა, სადაც 6 იანვარს გადასცემს კიდეც  ავტოკეფალიის ტომოსს და მართლმადიდებელ ოჯახში კიდევ ერთი ავტოკეფალური ეკლესია გაჩნდება.

„ჟურნალისტები აკრეტირებული უნდა იყვნენ. ვინც გაიარა აკრეტიდაცია, ისინი არიან და იქიდან გადმოსცემენ. ახლა „ჟურნალისტი ვარ და გამატარეთ," ალბათ არ ატარებენ. ჩვენც რაღაცა კონკრეტული მარშუტით მივდივართ," - აცხადებს უმრავლესობის დეპუტატი ნუკრი ქანთარია რეზონანთან" საუბრისას.

თელავში, ბატონის სასახლის ეზოში ინაუგურაციას შესაძლოა „ნაციონალური მოძრაობის" მხოლოდ ერთი წარმომადგენელი დაესწროს - ნიკა მელია. მმართველი პარტიის წარმომადგენელთა ცნობით, ინაუგურაციაზე ოფიციალურად მიწვეული „ნაციონალებიდან" მხოლოდ მან განაცხადა ოფიციალური თანხმობა. თუმცა, მმართველ პარტიაში შიშობენ, რომ ინაუგურაციაზე მის ყოფნას შესაძლოა ინციდენტი მოყვეს.

„ნებისმიერ ქვეყანაში ამ დროს გზა არის შეზღუდული და იზღუდება გადაადგილებაც. ასე რომ, სწორად აკეთებს პოლიცია. მითითითებულ ადგილზე შეუძლიათ მივიდნენ და ჩაატარონ აქცია. რომ მიუახლოვდნენ და ფაქტობრივად, შექმნან ძალიან უხერხული სურათი, ამის საშუალებას არ აძლევენ და სწორადაც იქცევიან," - აღნიშნავს უმრავლესობის დეპუტატი ნუკრი ქანთარია გურჯაანში ოპოზიციის მომხრეებსა და პოლიციას შორის მომხდარ დაპირისპირებაზე „რეზონანსთან" საუბრისას.