ლართან დაკავშირებით საშემოდგომო მოლოდინი ბუნდოვანია. საქართველოს ეროვნულ ბანკში აღნიშნავენ, რომ სავალუტო ტენდენციები პროგნოზის გაკეთების საშუალებას თითქმის არ იძლევა, ხოლო სპეციალისტებს მიაჩნიათ, რომ ლარის კურსზე მოლოდინის შექმნა ეროვნული ბანკის პრეროგატივაა, რათა უფრო მეტად შეეწყოსხელი ბიზნეს გარემოს განვითარებას. ფინანსისტები კი, ლარის კურსის პერსპექტივაზე საუბრობენ და აცხადებენ, რომ შემოდგომაზე კურსი 2.50-იან ნიშნულს გადასცდება.

ავტომობილის შენახვის ხარჯი იზრდება. ამ სიმძიმეს განსაკუთრებით ტაქსის მძღოლები იგრძნობენ, რომელთაც რეგულაციების გამო ვალდებულებები გაეზრდებათ როგორც ტექდათვალიერების, ასევე ნებართვისა და ტაქსის რეგულეციებთან დაკავშირებითაც. მთლიანობაში, საზოგადოების დიდ ნაწილს ავტომობილის მოვლა-შენახვა გაუძვირდება. საწვავის ფასი, პარკირების ახალ სისტემაზე გადასვლა და ტექდათვალიერების გავლა მძღოლების მხრიდან გარკვეულ ხარჯს მოითხოვს, შესაბამისად, ტრანსპორტის დარგი უბრუნდება იმ დროს, როცა მანქანა ფუფუნების საგანი იყო.

საპარლამენტო უმრავლესობაში ჯგუფებს შორის შიდა დაპირისპირება არ ცხრება და ბოლო პერიოდში ეს შიდა ბრძოლის ხაზი პარლამენტის თავმჯდომარის დამცველებსა და კრიტიკოსებს შორის გადის. როგორც დეპუტატი ზაქარია ქუცნაშვილი აცხადებს, "პარლამენტში ჯგუფია ჩამოყალიბებული, რომელიც ირაკლი კობახიძეს ებრძვის". საპასუხოდ კი, დავით ჭიჭინაძე, ვინც კობახიძის წინააღმდეგ მებრძოლთა ჯგუფის ყველაზე აქტიურ ფიგურად მიიჩნევა, აცხადებს, რომ "კოლექტიურ ზარდიაშვილებს ნებისმიერი განსხვავებული აზრი ბრძოლა ჰგონიათ" და "მოვესწარით იმ დღეს, როდესაც დემოკრატია ქუცნაშვილის დასაცავი ხდება".

მსოფლიო პატრიარქმა უკრაინისათვის ავტოკეფალიის მინიჭება საბოლოოდ გადაწყვიტა და ღია წერილით ეს გადაწყვეტილება მისმა დელეგაციამ 27 ივლისს, კიევის რუსეთის გაქრისტიანების 1030-ე წლის იუბილეს დღესასწაულზე ამცნო უკრაინასა და უკრაინაში ზეიმზე შეკრებილ 10-მდე მართლმადიდებელი ეკლესიის დელეგაციას, რომელთა შორის საქართველოდან ზუგდიდისა და ცაიშის მიტროპოლიტი გერასიმეც იყო.

ქართველი ჯარისკაცები ავღანეთში დიდ სკანდალში გაეხვნენ. საქმე ეხება ქურდობის ფაქტს, რომელიც, სავარაუდოდ, სამხედრო ბაზის ტერიტორიაზეა ჩადენილი. ამერიკის შეიარაღებული ძალების სამხედრო პოლიციამ გამოძიება დაიწყო და 4 ქართველი ჯარისკაცის დაკითხვა მოხდა, რომლებიც, სავარაუდოდ, ამ დანაშაულში ეჭვმიტანილნი არიან.

"ივანიშვილმა თავსატეხი ყველას მოგვცა. მისი პოზიცია ინტერესს აჩენს და სხვა ანალიტიკოსების მხრიდან გაჩნდა ასეთი ვერსიები, რომ შეიძლება, ეს პოზიცია ივანიშვილმა თანაგუნდელების საყურადღებოდ გაახმოვანა, მათი მობილიზაციისა და გამოფხიზლებისათვის. არ გამოვრიცხავ და მეც ავყვები ამ თვალსაზრისს", - აცხადებს "მთელ კვირასთან" საპრეზიდენტო არჩევნებზე საუბრისას პოლიტოლოგი რამაზ საყვარელიძე.

"დაველოდები პოლიტსაბჭოს გადაწყვეტილებას და შემდეგ მივმართავ ყველა იმ ინსტანციას, სადაც ჩემს უფლებებს დავიცავ. ამისთვის არსებობს სასამართლო, საკონსტიტუციო სასამართლო, ადამიანის უფლებათა დაცვის ორგანიზაციები და სხვა", - აცხადებს პარლამენტარი დავით ჭიჭინაძე, ვისაც "მთელი კვირა" სამომავალო გეგმებთან დაკავშირებით გაესაუბრა.