საქართველოს პრეზიდენტმა გიორგი მარგველაშვილმა, შესაძლოა, ვეტოს უფლება კიდევ გამოიყენოს. საუბარია ადგილობრივი თვითმმართველობის კოდექსში შეტანილი ცვლილების კანონპროექტზე, რომელიც 7 თვითმმართველი ქალაქის გაერთიანებას გულისხმობს. სამოქალაქო სექტორმა მარგველაშვილს საკუთარი კონსტიტუციური უფლების გამოყენებისთვის უკვე მიმართა. საპარლამენტო უმრავლესობაში კი, ტრადიციულად, ვეტოს დასაძლევად ემზადებიან.

საქართველოსა და ნატოს დაახლოებამ რუსეთის აღშფოთება კიდევ ერთხელ გამოიწვია. რუსეთის საგარეო საქმეთა მინისტრის მოადგილე გრიგორი კარასინის თქმით, თბილისი ხდება რუსეთის შეკავების ნატოსეული პოლიტიკის მონაწილე. ამ სიტყვებში მუქარის შემცველი განცხადება ამოიკითხეს ქართველმა პოლიტოლოგებმა და, შესაბამისად, რუსეთისგან ახალი პრობლემების შექმნას ელოდებიან.

"ძალიან, ძალიან იმედგაცრუებული ვარ და ყოველ საათში კიდევ უფრო იმედგაცრუებული ვხდები", "საკონსტიტუციო ცვლილების პროცესი ბლოკირებული და ჩიხში შესულია", "ეს უკვე კრიზისია"... - ვენეციის კომისიის თავმჯდომარე ჯანი ბუკიკიოს შეფასებები პრემიერ-მინისტრთან, პარლამენტის სპიკერთან და პრეზიდენტთან შეხვედრის შემდეგ უფრო და უფრო მწვავეა "ქართული ოცნების" მიერ ხმის მიცემის წინა დღით სასწრაფოდ შეცვლილი კონსტიტუციის პროექტის და უმთავრესად პროპორციული საარჩევნო სისტემის 7 წლით გადავადების გამო.

"სამწუხაროდ, ბუკიკიო გვიან მიხვდა, რომ ამ პროცესში გამოყენებული იყო ლეღვის ფოთლად და ამიტომაც ასეთი მძიმე იყო მისი რეაქციაც. ეს გაბრაზებული ადამიანის განცხადებაა," - აცხადებს პოლიტოლოგი გია ხუხაშვილი.

"აუცილებელია, საქმეში ჩაერთონ ჩვენი ევროპელი და ამერიკელი პარტნიორები, ასევე ევროკავშირი, ნატო, რომლებიც ქართულ საზოგადოებას მისცემენ მინიშნებას, რომ ამ საკონსტიტუციო ცვლილებების პრაქტიკაში განხორციელებით მნიშვნელოვნად შეფერხდება ქვეყნის ევროპული და ევროატლანტიკური ინტეგრაციის პროცესი", - აცხადებს პოლიტოლოგი ნიკა ჩიტაძე "რეზონანსთან საუბრისას.

ენერგეტიკისა და წყალმომარაგების მარეგულირებელმა კომისიამ, შესაძლოა, გადაწყვეტილების მიღების შესაძლებლობა დაკარგოს. სამი წევრისგან შემდგარ სემეკში ერთ-ერთ წევრს უფლებამოსილების ვადა აგვისტოში ეწურება, ხოლო ახალი წევრის შერჩევა ჭიანურდება. დეპუტატების ნაწილი პრეზიდენტის კანდიდატურას არ იწონებს, ორი წევრის ამარა დარჩენილი კომისია კი უუნარო იქნება.

თბილისში საცხოვრებელ სახლებზე მიშენებულთა 50%-ზე მეტი უკანონოა. ზოგიერთი ავარიულია, ზოგი კი - გამართული, თუმცა თავის დროზე არც ერთ მათგანზე ნებართვა არ გაცემულა. მიუხედავად ამისა, მსგავს მშენებლობაზე დაკისრებული ჯარიმებისგან მოსახლეობა თავისუფლდება. ურბანისტები მიიჩნევენ, რომ მიშენებაზე დაკისრებული ჯარიმები ერთიანად უნდა გაუქმდეს და მხოლოდ ის უკანონო ნაგებობები უნდა დაინგრეს, რომლებიც სეისმურად არამდგრადია.

ოკუპირებულ აფხაზეთში რუსი და აფხაზი სამხედროების მონაწილეობით ერთობლივი ფართომასშტაბიანი წრთვნები იწყება. ამის შესახებ ინფორმაციას რუსეთის მე-7 სამხედრო ბაზის პრესსამსახური ავრცელებს.

ყოფილი პრემიერ-მინისტრი ბიძინა ივანიშვილი "ქართული ოცნების" წინასაარჩევნო კამპანიაში, დიდი ალბათობით, წელს აღარ ჩაერთვება. საპარლამენტო უმრავლესობაში ამბობენ, რომ ამის საჭიროება აღარ არის. პოლიტოლოგ სოსო ცინცაძის აზრით კი, ივანიშვილს "ქართული ოცნების" თრევა მობეზრდა.

საპატიმროში მყოფი დეკანოზი გიორგი მამალაძე საპატრიარქოს ქორეპისკოპოს იაკობსა და ბათუმის ეპარქიას საეკლესიო კანონების დარღვევაზე მიუთითებს და მასზე დაკისრებული სასჯელის გამო განმარტებებს ითხოვს.

"იმდენად დახვეწილია არჩევნების გაყალბების ტექნოლოგიები, რომ მიკვირს, რატომ დასჭირდათ "ქართული ოცნების" ლიდერებს, კიდევ ერთხელ შეეწუხებინათ ქართული კანონმდებლობა და გაეზარდათ მხოლოდ საკუთარი პარტიის მიერ დანიშნულ წევრთა რაოდენობა საარჩევნო კომისიებში.

"ტრამპ, შენ და შენი ხალხი, მუსლიმანურ ქვეყნებში დაღვრილი სისხლის თითოეული წვეთისთვის აგებთ პასუხს!" - მსგავსი შინაარსის განცხადება ჰაკერებმა აშშ-ის მმართველი ორგანოების საიტებზე განათავსეს, რაც, ანალიტიკოსების შეფასებით, ტერორისტული აქტების წინასწარ დაანონსებას ნიშნავს.