იანვარ-თებერვალში ექსპორტი 26%-ით შემცირდა. ჯერჯერობით ეროვნული ვალუტის მცირედით გამყარების ნიშნებიც კი არ ჩანს. მოსახლეობას ისევ უმუშევრობასა და სამომხმარებლო პროდუქტის გაძვირებულ ფასებთან უწევს ბრძოლა. ამ ფონზე საზოგადოების ოპტიმიზმი და მთავრობისადმი ნდობა ნელ-ნელა პესიმიზმითა და უნდობლობით იცვლება. ეკონომისტები კი მომავალს იმედიანად უყურებენ და აცხადებენ, რომ თებერვლისა და მარტის ზოგიერთი ეკონომიკური მონაცემი ოპტიმიზმის შესაძლებლობას იძლევა.

ავეჯის ბიზნესისთვის კიდევ ერთი წარუმატებელი წელი დაიწყო. მდგომარეობა ამ სფეროში კვლავ არასახარბიელოა. ავეჯის იმპორტიორები და მწარმოებლები არსებულ პრობლემას ფინანსურ კრიზისს მიაწერენ, თუმცა ამ ბიზნესს რეალურად გაცილებით ადრე გაუჭირდა, როგორც კი სამშენებლო სექტორში კრიზისი გაჩნდა.

გაეროს დასკვნით, 2030 წლისთვის მსოფლიოში სასმელი წყლის რესურსი 40%-ით შემცირდება. ეს იმას ნიშნავს, რომ უკვე 15 წლის შემდეგ მტკნარ წყალზე მოთხოვნა მნიშვნელოვნად გაიზრდება. ამ დროს კი საქართველოში, სადაც სასმელი წყლის უდიდესი რესურსი არსებობს, მისი დამუშავებისა და ექსპორტისთვის, პრაქტიკულად, არაფერი კეთდება. წყლის გადამამუშავებელი საწარმოს მშენებლობის სურვილით ამ დრომდე არც "აწარმოე საქართველოსთვის" მიუმართავს ვინმეს, უწყებათაშორისი სამუშაო ჯგუფი კი, რომელიც წყლის რესურსის რაციონალური გამოყენების გრძელვადიანი სტრატეგიის შემუშავების მიზნით შეიქმნა, ისევ პასიურობს.

საქართველოში ხორბლის ნათესი ფართობები შემცირდა. ამის მიზეზი შარშანდელი გვალვაა. 2014 წლის ზაფხულში კახეთში, დაახლოებით, 5 ათასი ჰექტარი ხორბლის ყანა მთლიანად დაიწვა. გლეხებმა და ფერმერებმა იზარალეს, ამიტომ შემოდგომას ახალი მოსავლის მოსაყვანად აღარც რისკი გაწიეს და მათ ხორბლის დასათესი ფულიც აღარ დარჩათ. სოფლის-მეურნეობის სამინისტროში ახალი ჯიშების სელექციაზე მუშაობენ, რომელიც თითოეული რეგიონის ნიადაგზე იქნება მორგებული.

სარეკლამო ბიზნესს საქართველოში ისევ პრობლემა აქვს. პიარტექნოლოგები მიიჩნევენ, რომ ინვესტიციების შემცირება სარეკლამო ბაზარზეც ნეგატიურად აისახა და მდგომარეობა სასიკეთოდ ვერც უახლოეს პერიოდში შეიცვლება. სპეციალისტების შეფასებით, გასული წლის ამავე პერიოდთან შედარებით, სარეკლამო ბაზარზე კლებაა.

დსთ-ს ქვეყნებთან ექსპორტი 53%-ით შემცირდა, ევროკავშირის ქვეყნებთან კი - 9%-ით გაიზარდა. ქართული პროდუქტებიდან ყველაზე მზარდი თხილის ექსპორტია, რომელიც უკვე პირველ ადგილზე მყოფ ავტომობილების ექსპორტს მიუახლოვდა. მთლიანობაში ექსპორტი 26%-ით შემცირდა და შესაბამისად უარყოფითი სავაჭრო ბალანსი 55%-ია.

შავი ლითონისა და ალუმინის ჯართზე მოთხოვნაც და ფასიც შემცირდა. ჩამბარებელ პუნქტებში აცხადებენ, რომ წინა წლებთან შედარებით, ჯართის შესყიდვა განახევრდა, შესაბამისად, მინიმუმადე დაეცა ექსპორტიც, რასაც "საქსტატის" მონაცემებიც ადასტურებს.

სწრაფი ჩარიცხვის აპარატებით ამა თუ იმ გადასახადის გადახდა უფრო და უფრო პოპულარული ხდება. მოსახლეობა განურჩევლად ასაკისა, მიიჩნევს, რომ თანხის ამ მეთოდით გადახდა საკმაოდ მოსახერხებელია. სწრაფი ჩარიცხვის აპარატების პოპულარობაზე მეტყველებს "ეისითის" მიერ ჩატარებული კვლევის შედეგებიც, რომლის მიხედვით ათიდან ცხრა თბილისელს, ანუ გამოკითხულთა 90%-ს, ბოლო 3 თვის განმავლობაში ერთხელ მაინც გადაუხდია თანხა სწრაფი გადახდის აპარატის მეშვეობით.

საერთაშორისო ბაზრებზე ნავთობის ფასი ისევ თავქვე მიექანება. თუკი ტენდენცია შენარჩუნდა, ქართველ ნავთობიმპორტიორებს 5-თეთრით გაძვირებული ბენზინის ისევ გაიაფება მოუწევთ. ჯერჯერობით ბენზინის საერთაშორისო ფასი გაუფასურებულ ლართან მიმართებაში საწვავის გაიაფების შესაძლებლობას არ იძლევა. უცხოელი ანალიტიკოსები, წლის ბოლომდე "შავი ოქროს" კიდევ უფრო გაიაფებას ვარაუდობენ.

ბიძინა ივანიშვილმა ლარის გაუფასურებასთან დაკავშირებით ეროვნული ბანკის პრეზიდენტი კიდევ ერთხელ გააკრიტიკა. ყოფილი პრემიერის აზრით, ქვეყნის მთავარი ბანკის დაგვიანებულმა რეაქციამ ბაზარზე აჟიოტაჟი გამოიწვია, რამაც ლარის დევალვაციას შეუწყო ხელი. გიორგი ქადაგიძე კი ისევ თავის მართლების რეჟიმშია და ამბობს, რომ მის მიერ მიღებული გადაწყვეტილებები იყო ადეკვატური და თანმიმდევრული.

საქართველოში დასაქმებულთა საშუალო ხელფასი გაიზარდა. სტატისტიკის ეროვნული სამსახურის მონაცემებით, 2014 წლის მეოთხე კვარტალში, წინა წლის ანალოგიურ პერიოდთან შედარებით, საშუალო ანაზღაურებამ 8,5%-ით მოიმატა, 2012 წელთან შედარებით კი თითქმის 17%-ით. "საქსტატის" მონაცემებით, 2014 წლის მეოთხე კვარტალში საშუალო თვიურმა ანაზღაურებამ 950,1 ლარი შეადგინა.

ფინანსთა მინისტრს ეკონომიკური ზრდის 5%-იანი პროგნოზი არ ეთმობა. ნოდარ ხადური ამბობს, რომ თებერვლის ბიუჯეტის შესრულების მონაცემები იძლევა იმედს, რომ წელს ეკონომიკური ზრდა 4,5% იქნება. "ფიემსი კვლევითი ცენტრის" პროგნოზით, კი ეკონომიკური ზრდა 2%-ს არ გადააჭარბებს და ცენტრი მთავრობას 2015 წლის ბიუჯეტის შემცირებას ურჩევს.