"ნაციონალური მოძრაობის" ორად გაყოფა უკვე გადაწყვეტილია. სხვადასხვა საშუალებით გავცრელებულ ცნობებს, რომ ხვალ, 12 იანვარს ბოკერია-ბაქრაძის გუნდი საკუთარ თანამოაზრეებთან ერთად პარტიას ოფიციალურად გამოეყოფა და საზოგადოების წინაშე "ევროპული საქართველოს" სახელით გამოჩნდება, "რეზონანსის" წყაროებიც ადასტურებენ.

სოციოლოგი ზურაბ ბიგვავა მიიჩნევს, რომ "ნაციონალური მოძრაობის" ორად გაყოფის შემდგომ, მხარდამჭერთა რიცხვი ბოკერია-ბაქრაძის ფრთას უფრო მოაკლდება, ვიდრე ექსპრეზიდენტ სააკაშვილის გუნდს. მისი შეფასებით, მიუხედავად იმისა, რომ ბოკერიას გუნდი ინტელექტუალურ ელიტად მიიჩნევა, ამომრჩეველი არჩევანს მაინც სააკაშვილზე გააკეთებს, როგორც პარტიის ლიდერსა და ქარიზმატულ მმართველზე. ბიგვავა იმასაც ამბობს, რომ შესაძლოა ბოკერიას ჯგუფმა პოლიტიკა შეცვალოს და ეს ახალი ძალების მოსაზიდად გამოიყენოს.

"ნაციონალურ მოძრაობაში" არსებული დაპირისპირება პიკს აღწევს. დიდი ალბათობით, 20 იანვარს პარტიას ყრილობის გამართვა ე.წ. ბოკერია-უგულავას ფრთის გარეშე მოუწევს. არსებული ინფორმაციით, დაპირისპირებული მხარე პარტიიდან წასვლის შესახებ განცხადებას ამ დღებში გააკეთებს. მანამდე კი ციხიდან ახლად გამოსული ქალაქის ყოფილი მერი გიგი უგულავა სააკაშვილთან საუბარს კიდევ ერთხელ შეეცდება.

"ნაციონალური მოძრაობის" ხელმძღვანელობის აბსოლუტური უმრავლესობა არის ჩვენს გუნდში. ასე რომ, ვფიქრობ, ჩვენ ვიქნებით, როგორც საპარლამენტო უმცირესობა და, ასევე, მთავარი ოპოზიციური ძალა", - ამბობს "რეზონანსთან" საუბრისას, ე.წ ბოკერია-უგულავას ფრთის მომხრე, პარტიის წევრი სერგი კაპანაძე.

"ნაციონალური მოძრაობის" წევრის ნიკანორ მელიას თქმით, ე.წ. ბოკერია-უგულავას ფრთამ პარტიის დატოვების შესახებ გადაწყვეტილება ჯერ კიდევ 30 ნოემბერს მიიღო. მისი თქმით, ბოკერია ახლა ხელსაყრელ დროს ელოდება, რომ "პარტიის კარი ხმაურით გაიჯახუნოს". მისი აზრით, ბოკერიამ ეს გადაწყვეტილება იძულებით მიიღო - იცის, რომ ვერ შეძლებს პარტიის სათავეში ყოფნას.

აფხაზეთში კულტურის ძეგლების განადგურება გრძელდება. რუსმა ოკუპანტებმა გულრიფშის რაიონის სოფელ წებელდაში სამხედრო პოლიგონის მოსაწყობად ყ|ყ საუკუნის ნახევრად დანგრეული საყდარი და სასაფლაო ბულდოზერით მიწასთან გაასწორეს. საუბარია იმაზეც, რომ პოლიგონის ახლოს მდებარეობს წებელდას ისტორიული ციხესიმაგრე, რომელსაც ასევე განადგურება ემუქრება.

ვანის რაიონის ყულეს თემში სასტიკი მკვლელობა მოხდა. 18 წლის ახალგაზრდამ, შელაპარაკების ნიადაგზე საკუთარი ძმა სანადირო თოფით მოკლა. როგორც ადგილობრივები ყვებიან, ახალგაზრდებს შორის კონფლიქტი ყოფით ნიადაგზე დაიწყო, რაც მოგვიანებით ფიზიკურ დაპირისპირებაში გადაიზარდა.

პოლიტოლოგი სოსო ცინცაძე "ნაციონალურ მოძრაობაში" მიმდინარე პროცესებზე საუბრისას აცხადებს, რომ ამ ყველაფრით მოგებული მხოლოდ ხელისუფლება იქნება, რადგან მას კონკურენტუნარიანი ოპონენტი აღარ დარჩა. "ნაცმოძრაობისაგან" დარჩენილი ნაწილები კი, ცინცაძის აზრით, ვერანაირ წარმატებას ვეღარ მიაღწევენ და ეს 2017 წლის შუალედურ არჩევნებშიც გამოჩნდება.

"ამ ბოლო 120 წლის განმავლობაში საქართველოდან ნობელის პრემიაზე წარდგენილი იყო სულ სამი მწერალი: გრიგოლ რობაქიძე, ჭაბუა ამირეჯიბი და ოთარ ჭილაძე, მეოთხე მე გახლავართ. აქამდე ნობელის კომიტეტმა ვერც ერთი ქართველი მწერლისთვის ვერ გაიმეტა მსოფლიოს ეს უმაღლესი ლიტერატურული ჯილდო. არც ჩემი მოკრძალებული ქვეყნის საერთაშორისო მდგომარეობა და არც ჩემი მოკრძალებული შემოქმედება დიდ ოპტიმიზმს არ მიტოვებს იმისას, რომ მივიღებ ამ სანუკვარ პრემიას," - განაცხადა "რეზონანსთან" საუბრისას მწერალთა კავშირის თავმჯდომარე რევაზ მიშველაძემ, რომელიც ნობელის პრემიის ნომინაციაზეა წარდგენილი.

წინა წლებთან შედარებით 2016 წელს მერიის ნებართვებით მოჭრილ ხეებს შორის მინიმუმ 5-ჯერ მეტ ხეს მიენიჭა დაზიანებულის სტატუსი, ამის შესახებ "ინფორმაციის თავისუფლების განვითარების ინსტიტუტის" მიერ გავრცელებულ განცხადებაშია ნათქვამი. მომატებული მაჩვენებლიდან გამომდინარე, ორგანიზაციაში მერიის საქმიანობის კეთილსინდისიერაბაზეც გამოთქვამენ ეჭვს. თუმცა დავით ნარმანიას განცხადებით, დაზიანებული ხეების მოჭრის გაზრდილი სტატისტიკა სანიტარიულ ჭრებს უკავშირდება, რომელიც სპეციალისტების დასკვნის საფუძველზე განხორციელდა.

სეპარატისტულ აფხაზეთს "ენგურჰესის" მიერ გამომუშავებული ელექტროენერგია არ ყოფნის. ამის მიზეზი დენის მოხმარების არანორმალურად გაზრდილი მაჩვენებელია, რის შეკავებაც ჯერჯერობით ვერ ხერხდება. ტენდენცია თუ გაგრძელდება, აფხაზეთის ჩაბნელების საფრთხე გარდაუვალია.

2016 წლის პირველ 9 თვეში ქვეყნის მთლიანი საგარეო ვალი 254 მლნ დოლარით გაიზარდა. იმის ნაცვლად, რომ ვალი შემსუბუქდეს, მთავრობა ტენდენციას არ ცვლის და ახალი ფინანსური ვალდებულებების წამოკიდებაზე უარს არ ამბობს. ამას ისიც მოწმობს, რომ სამთავრობო ვალი 263 მლნ დოლარით არის გაზრდილი.