"დემოკრატიული ინსტიტუტი" ყოფილი ფსიქიატრიული საავადმყოფოს ბაღის შენარჩუნების მიზნით აქციას მართავს. როგორც ეკოლოგი ლაშა ჩხარტიშვილი "რეზონანსთან" საუბრისას ამბობს, ამ ადგილას მშნებლობის გაგრძელება და თბილისის ერთ-ერთი უდიდესი ბაღის განადგურება მძიმე ეკოლოგიურ შედეგსა და სატრანსპორტო კოლაფსის განვითარებას გამოიწვევს.

თბილისის საბავშვო ბაღებში სწავლა პირველ თებერვლამდე შეწყდა. ამის მიზეზი დაავადებათა კონტროლისა და საზოგადოებრივი ჯანდაცვის ეროვნული ცენტრის მიერ გაცემული რეკომენდაცია გახდა, რომლის თანახმადაც, თუ გაცდენების მაჩვენებელი 20%-ს აჭარბებს, სწავლა მინიმუმ რამდენიმე დღით უნდა შეწყდეს.

მომხმარებლები ბანკებისგან უცხოურ ვალუტაში გაცემული სესხების გადახედვას ითხოვენ. ეროვნული ვალუტის გაუფასურებამ ისინიც დააზარალა, ვისაც სესხი ლარში აქვს გამოტანილი. სავალუტო კრიზისის ფონზე ხალხი კერძო სექტორისგან ტვირთის შემსუბუქებას ითხოვს, თუმცა შარშანდელი ინიციატივის განმეორებას, ანუ სესხის ვადის გაგრძელებას ეწინააღმდეგებიან. რესპონდენტების თქმით, ამ ცვლილებამ ისინი კიდევ უფრო აზარალა, რადგან მათი ხარჯი გაიზარდა.

დიდთოვლობამ რეგიონებში მოსახლეობას პრობლემა შეუქმნა. თითქმის ყველგან ხალხი წუხს, რომ საკვების მომარაგება ვერ მოასწრეს. უჭირთ პირუტყვის გამოკვებაც, რადგან გაძვირდა თივა და დამატებითი საკვების დეფიციტსაც განიცდიან. ამ მხრივ განსაკუთრებით მძიმე მდგომარეობა გურიასა და სამეგრელოს მთიან სოფლებში.

იური ვაზაგაშვილის მკვლელობაზე მიმდინარე გამოძიების ფარგლებში, პროკურატურამ ე.წ. კორტების საქმეზე ბრალდებულ გიორგი ცააძესა და ირაკლი ფირცხალავას რამდენიმე დღის წინ დნმ-ის ნიმუშების აღება მოსთხოვა, რაზეც მათ უარი განაცხადეს.

გაირკვა საქართველოს საკალათბურთო ეროვნული ნაკრების მეტოქეები საკვალიფიკაციო ეტაპზე. "ჯვაროსნები" ევრო-2017-ის ფინალური საგზურის მოსაპოვებლად მიმდინარე წლის აგვისტო-სექტემბერში ორ წრედ დაუპირისპირდებიან მონტენეგროს, ალბანეთსა და სლოვაკეთს. ჩვენი ნაკრები წინა ევრობასკეტის მაჩვენებლების მიხედვით პირველ კალათაში იყო განთესილი და ა ჯგუფში მოხვდა.

რუსეთსა და საქართველოს პირველი პირების შეხვედრამდე, პოლიტოლოგ რამაზ საყვარელიძის აზრით, ჯერ ის უნდა გაირკვეს, თუ რას ელის ამ შეხვედრისგან რუსეთი და რა იმალება რეალურად მისი შეთავაზებების მიღმა. მისი თქმით, თუკი პუტინს ქართულ მხარესთან შეხვედრა მხოლოდ იმისთვის სჭირდება, რომ დასავლეთი დაარწმუნოს, თითქოს ორ ქვეყანას შორის ჰარმონიული ურთიერთობაა, მაშინ შეთავაზებას არ უნდა დავთანხმდეთ.

მოსკოვი თბილისს რამდენიმე ორაზროვან და შანტაჟის ფორმის მესიჯს უგზავნის და სერგეი ლავროვის პირით აცხადებს, რომ მათ აქვთ ცნობა, როგორ იწვრთნებიან პანკისში ტერორისტები, მიუხედავად ამისა უვიზო რეჟიმის აღდგენისათვის მზად არიან ერთი პირობით - საქართველომ რუსეთთან დიპლომატიური ურთიერთობა წინაპირობების გარეშე უნდა აღადგინოს. რუსეთის პირველი დიპლომატის თქმით, მისი მესიჯები მხოლოდ "კეთილმეზობლური" ურთიერთობის შეთავაზებითაა მოტივირებული, თუმცა მისი ამ გზავნილებიდან ერთგვარი შანტაჟი რუსეთის მიმართ ლოიალურობაში დადანაშაულებულმა "ქართული ოცნების" წევრებმაც აღიარეს.

მიმდინარე პოლიტიკურ ვითარებაზე და იმაზე, ამჟამინდელი წევრებიდან რომელი სუბიექტი შემორჩება კოალიციას და რამდენი პოლიტიკური სუბიექტი შევა მომავალ პარლამენტში, "რეზონანსი" ექსპერტ ზაალ ანჯაფარიძეს ესაუბრა.

ლგბტ პირების უფლებადამცველი არასამთავრობო ორგანიზაცია "იდენტობის" ყოფილ აღმასრულებელ დირექტორს, ირაკლი ვაჭარაძეს ორგანიზაციის კუთვნილი თანხის მითვისებაში ადანაშაულებენ. "იდენტობის" ყოფილი იურისტის, ნინო ბოლქვაძის განცხადებით, ვაჭარაძის წინააღმდეგ ლგბტ თემის წარმომადგენლებმა პროკურატურაში სარჩელი უკვე შეიტანეს. თავად ბოლქვაძემ კი "იდენტობასთან" თანამშრომლობა მას შემდეგ შეწყვიტა, რაც ვაჭარაძემ იგი საბუთების ქურდობაში დაადანაშაულა.

კიდევ ერთი თვითმკვლელობა - ლაგოდეხის რაიონის სოფელ ჩადუნიანში 18 წლის მერაბ ქ. ჩამომხრჩვალი იპოვეს. როგორც გარდაცვლილი ბიჭის მეზობლები ყვებიან, სახლის აივანზე თოკით ჩამომხვრჩვალი ახალგაზრდა დედამ დილით აღმოაჩინა. ოჯახის წევრებსა და მეზობლებს თვითმკვლელობის მოტივზე საუბარი უჭირთ.

საქართველოს თითქმის ყველა რეგიონში დიდთოვლობა და უამინდობაა. განსაკუთრებით მძიმე მდგომარეობაა აჭარაში, გურიაში, მცხეთა-მთიანეთსა და კახეთში. უხვი ნალექის გამო ავტოსატრანსპორტო მოძრაობა აღნიშნულ რეგიონებში გართულდა.