ბიზნესმენ ბესო ხარძიანის მკვლელობის საქმე გახსნილია - მკვლელობაში მხილებულნი უკრაინის მოქალაქე, 30 წლის ალეკსანდრ დამეტოვი და რუსეთის მოქალაქე 42 წლის ოლეგ დოევი არიან, რომლებიც წითელი ცირკულარით იძებნებიან. ოჯახი გამოძიებას ენდობა, თუმცა დამკვეთის ვინაობის დასახელებას ითხოვს, მანამდე კი კვლავ ყოფილ მაღალჩინოსნებს - გია უდესიანს და რეზო ქურასბედიანს ადანაშაულებენ.

აღდგეს ავტომობილების ტექდათვალიერება და ტაქსების ლიცენზირება - ამ მოთხოვნით ინტერნეტში პეტიცია გავრცელდა. პეტიციის ავტორია მწერალი და არასამთავრობო ორგანიზაცია "მომავლის სოფელი"-ს თანადამფუძნებელი გურამ მეგრელიშვილი.

ყოველწლიურად საქართველოში დაახლოებით ერთ წლამდე ასაკის 600-მდე ახალშობილი იღუპება - ამის შესახებ დასკვნას არასამთავრობო ორგანიზაცია "საერთაშორისო გამჭვირვალობა-საქართველო" აქვეყნებს.

ტურისტული კომპანიების ნაწილს გარე ტურებზე მოთხოვნა შეუმცირდა. ზოგიერთს კი თურქეთსა და ეგვიპტეში აფეთქებების სერიის გამო, აღნიშნული მიმართულებით ტურის გაუქმება მოუხდა. საფრთხის გარდა, კომპანიებზე უარყოფითი გავლენა ეკონომიკურმა კრიზისმა, სავალუტო რყევამაც იქონია. ტუროპერატორებმა "რეზონანსთან" საუბრისას აღნიშნეს, რომ ტერაქტების გამო, ვიზიტორებმა თურქეთიდან და ეგვიპტიდან საქართველოში გადმოინაცვლეს.

ღვინის, მინერალური წყლებისა და ავტომობილების ექსპორტი კატასტროფულად შემცირდა. გამომდინარე იქიდან, რომ მთავარ სავაჭრო პარტნიორებში სერიოზული ეკონომიკური პრობლემებია, საქართველოდან ექსპორტს კარგი დღე არც წელს დაადგება. სპეციალისტების აზრით, მთავრობამ, მეწარმეებთან ერთად, მთავარი აქცენტი ამერიკისა და ევროპის ბაზრებზე უნდა გააკეთოს, რათა დსთ-ს ქვეყნებში ვარდნის დაბალანსება მცირედით მაინც შეძლოს.

გაზსაცავის მშენებლობაზე კომპანია "ჯეოსტოკი" დასკვნას უახლოეს მომავალში გამოაქვეყნებს. გაზსაცავისთვის ადგილი უკვე შერჩეულია - სამგორის სამხრეთი თაღის საბადო. ახლა სახელმწიფო ინვესტორის ძიებაშია. ცოტა ხნის წინ პროექტში მონაწილეობაზე ინტერესი უკვე გამოთქვა აზერბაიჯანულმა სახელმწიფო კომპანია "სოკარმა". ენერგეტიკოსები პროექტში კერძო კომპანიების მონაწილეობას კატეგორიულად ეწინააღმდეგებიან და აცხადებენ, რომ გაზსაცავის ასაშენებლად სახელმწიფომ სახსრები თავად უნდა გამონახოს.

სამთო-სათხილამურო კურორტებზე სეზონი წარუმატებლად დაიწყო. გუდაურის, ბაკურიანისა და მესტიის წამყვან სასტუმროებში დამსვენებლების სიმცირეა, რის მიზეზად მეზობელ ქვეყნებში შექმნილი ეკონომიკური კრიზისი მიიჩნევა. სასტუმროს მენეჯერები აცხადებენ, რომ გარე ფაქტორების გარდა, პრობლემა არის სეზონურიც, რადგან იანვრის მეორე ნახევარი ყოველთვის პასიურია. მათი ვარაუდით, მდგომარეობა თებერვლიდან გამოსწორდება.

"დიდი ანტრაქტის" შემდეგ სრულიად საქართველო დიდი მოლოდინით ელის თბილისის ოპერისა და ბალეტის სახელმწიფო თეატრის გახსნას, რომელიც სრულიად განახლებული იერსახით წარდგება მაყურებლის წინაშე.

თბილისში სტადიონების დანგრევის თემამ ლამის პოლიტიკური საკითხებიც კი გადაფარა. ეწყობოდა საპროტესტო აქციები, რომლის ერთ-ერთი ლიდერი საქართველოს ნაკრებისა და რუსეთის პირველ ლიგაში მოასპარეზე "სკა-ენერგის" ფეხბურთელი კახა ალადაშვილი იყო.

რუსული რუბლი ისტორიულ მინიმუმამდე დაეცა და 1998 წლის მაჩვენებელს მიუახლოვდა. გუშინ მოსკოვის ბანკთაშორის სავალუტო ბირჟაზე ერთმა დოლარმა 80 რუბლს, ევრომ კი 88 რუბლს გადააჭარბა. ნავთობის ფასის ვარდნის პარალელურად, უცხოელი ანალიტიკოსები რუბლის კიდევ უფრო გაუარესებას ვარაუდობენ. ამერიკული ბანკის "მერილი ლინჩის" პროგნოზით კი, გამორიცხული არ არის, წელს რუსული ვალუტის კურსი დოლართან მიმართებაში 210 რუბლამდეც კი დაეცეს.

"ვერც ერთ ზამთარს ვერ დაასახელებთ, გრიპი რომ არ ყოფილიყო. წლევანდელი ზამთარიც ჩვეულებრივია, ჩვეულებრივი გრიპით. წინა და იმის წინა წლებისაგან არაფრით განსხვავდება," - აცხადებს დაავადებათა კონტროლის ეროვნული ცენტრის დირექტორის მოადგილე პაატა იმნაძე.

არჩევნების მოახლოებასთან ერთად რა მნიშვნელოვანი ცვლილებები შეიძლება მოხდეს ქართულ პოლიტიკურ სპექტრში და შეძლებს თუ არა კოალიცია "ქართული ოცნება" წინასაარჩევნოდ ერთობის შენარჩუნებას, ამ საკითხებზე "რეზონანსი" პოლიტოლოგ რამაზ საყვარელიძეს ესაუბრა.