„თბილისი პრაიდი“ დროებით გადაიდო. ამის შესახებ ინფორმაცია მისმა ორგანიზატორებმა გაავრცელეს. როგორც ინფორმაციაშია ნათქვამი, „თბილისი პრაიდის“ გადადების მიზეზი რუსთაველის გამზირზე განვითარებული პროცესები გახდა. ორგანიზატორები აცხადებენ, რომ მარში, რომლის დრო და მარშრუტი მედიისთვისაც კი გასაიდუმლოებული იქნება, შესაძლოა საერთოდ შსს-სთან შეთანხმების გარეშე ჩაატარონ.

„ეს რაღაც არაადეკვატური განცხადება გაუკეთებია, რაც ჭკუასთან ახლოს ვერ არის. რა თქმა უნდა, არასწორი განცხადებაა, მაგრამ მაინც რობერტ სტურუაა და ნუ გადაუვლიან თავზე," - ასე აფასებს „რეზონანსთან" საუბრისას მწერალი და მსახიობი გივი სიხარულიძე რუსთაველის თეატრის სამხატვრო ხელმძღვანელის რობერტ სტურიას მიერ გამოქვეყნებულ ფეისბუკპოსტს, სადაც იგი თბილისში, 20 ივნისს დაწყებულ საპროტესტო გამოსვლებს გამოეხმაურა.

რუს ტურისტებს საქართველოდან დროზე ადრე წასვლა არ უნდათ, ხოლო მათ კი, ვინც რუსეთდან საქართველოში საცხოვრებლადაა ჩამოსული, პრეზიდენტ ვლადიმირ პუტინის განკარგულება საქართველოს მიმართულებით ფრენების აკრძალვის შესახებ სისულელედ მიანჩნიათ.

„ის ნარატივი, რაც ბოლოს გარკვეულმა ძალებმა შემოგვთავაზეს - ერთმორწმუნეობის და დასავლეთის დემონიზაციის - ამას საზოგადოებაში სერიოზული საყრდენი არ აქვს და რაც მთავარია, ეს პროტესტი პოლიტიკოსების მხრიდან კი არაა ინსპირირებული, რასაც ხელისუფლება ორი დღის წინ გვეუბნებოდა, არამედ მთლიანად საზოგადოებრივი (ახალგაზრდების) განწყობაა," - აცხადებს „რეზონანსთან" ანალიტიკოს გია ხუხაშვილი ბოლო ორი დღის საპროტესტო აქციების შესახებ საუბრისას.

„ეს არის ყველაზე დამამცირებელი, სამარცხვინო და საზიზღარი საქციელი... ადამიანი, რომელიც ვერ იაზრებს რა არის ქრისტიანობა," - ასე აფასებს „რეზონანსთან" საუბრისას მამა შალვა კეკელია რუსი ეპისკოპოსის, მეუფე პიტირიმის განცხადებას, რომელმაც ქართველებს „ჭინკები" უწოდა, 20 ივნიის თბილისში გამართულ საპროტესო აქციას კი - „შაბაში".

„არ ვიზიარებ კვირიკაშვილის პოზიციას. ბოლო ხნის, მისი პრემიერობის დროსაც არ ვიზიარებდი კვირიკაშვილის ბევრ რამეს. რაც შეეხება გახარიას გადადგომას, მე წინააღმდეგი ვარ. უბრალოდ, „ქართულ ოცნებას" სჭირდება რეალობიდან გამომდინარე გადაწყობა. მე შევაფასე ზოგადად მოვლენები ერთი-ორი სიტყვით. შემეძლო უფრო გრძლად, მაგრამ ამ წუთში მეზარება", - ასე შეაფასა დეპუტატმა ზაზა პაპუაშვილმა ყოფილი პრემიერ-მინისტრის, გიორგი კვირიკაშვილის 21 ივნისს გაკეთებული განცხადება, რომელიც გიორგი გახარიას გადაყენებასა და ვადამდელი საპარლამენტო არჩევნების დანიშვნას მოითხოვს.

„ძალიან ბევრი რამ დამოკიდებულია წუთიერ მომენტზე. არ მგონია, რომ ვადამდელი საპარლამენტო არჩევნები დაინიშნოს ორი მიზეზის გამო: არც ისე დიდი სხვაობაა ვადამდელსა და დანიშნულ არჩევნებს შორის და თუკი ემოციური მხარე არ იქნება ხელისუფლებისთვის სასარგებლო და მისთვის რისკის შემცველი აღმოჩნდება, ხელისუფლება არ წავა ამაზე და ეცდება, რომ დაელოდოს 2020 წელს", - ასე შეაფასა პოლიტიკურმა ექსპერტმა, რამაზ საყვარელიძემ ოპოზიციის მოთხოვნა, რომელიც ვადამდელი საპარლამენტო არჩევნების ჩატარება ითხოვს.

პარლამენტის შენობასთან მიმდინარე აქციაზე სპეცრაზმელები გამოჩნდნენ, რომლებიც აღჭურვილები არიან ხელკეტებითა და დამცავი ფარებით. მათ აქციის მონაწილეები სტვენით და შეძახილით „წადი!“ შეხვდნენ. სპეცრაზმელები პარლამენტის კიბეებთან იმპროვიზებული ტრიბუნის უკან იდგნენ, თუმცა შემდეგ პარლამენტის ეზოს სიღრმეში გადაინაცვლეს.

„გავრილოვის იქ ჩაჯდომა ეს იყო ძალზედ მძიმე სიმბოლო, რომელიც „ოცნებას“ დარჩება ბოლომდე. როგორც ტალეირანი იტყოდა, ეს არ იყო დანაშაული, ეს იყო შეცდომა, რაც პოლიტიკაში გაცილებით უარესია. ეს იყო ისეთი შეცდომა, რომლის გამოსწორება პრაქტიკულად შეუძლებელია. შეიძლება დაგვავიწყდეს დარბევა, ტკივილმა გადაიაროს, განრისხებამ გადაიაროს, მაგრამ პარლამენტში სავარძელში მჯდომი გავრილოვის სურათი მუდმივად იქნება „ოცნების“ სამარკო ნიშანი“, - აცხადებს ფილოსოფოსი ზაზა ფირალიშვილი.

„ქართული ოცნების“ წევრი ნუკრი ქანთარია „რეზონანსთან“ აცხადებს, რომ იმ მოთხოვნების შესრულება, რაც აქციის მონაწილეების მიერ ჟღერდება, ნაკლებად სავარაუდოა. ქანთარია აცხადებს, რომ პარლამენტის თავმჯდომარე ირაკლი კობახიძის გადადგომა მართალია დაძაბულ სიტუაციას მთლიანად ვერ განმუხტავს, მაგრამ, პოლიტიკური პასუხისმგებლობა აღებულია და მმართველმა გუნდმა მომხდარი სწორად გაანალიზა. 

წელს საქართველოს ტურისტებისთვის "უსაფრთხო ქვეყნის" სტატუსის შენარჩუნება გაუჭირდება. მიმდინარე პროცესები და ბოლო დროის მუდმივი დაძაბულობა ტურიზმს დააზარალებს. სპეციალისტები ვარაუდობენ, რომ რუსი დამსვენებლებლების რაოდენობა შემცირდება, თუმცა ქვეყანაში ჩამოსვლისგან ევროპელი ტურისტებიც თავს შეიკავებენ. ექსპერტები ფიქრობენ, რომ მოსალოდნელია ჯავშნების გაუქმებაც, რაზეც გავლენას "თბილისი პრაიდის" ჩატარება და ამ მოვლენისთვის დამახასიათებელი დაძაბულობაც მოახდენს.