ევროკომისიის ანგარიშის მიხედვით, საქართველო კვლავ რჩება სატრანზიტო ქვეყნად, რომელსაც ევროკავშირში სხვადასხვა სახის უკანონო საქონლის გადასაზიდად იყენებენ. ამასთან, საუბარია, რომ ჩვენი ქვეყანა გამოიყენება შემოსავლების გასათეთრებლადაც, ევროკავშირის წევრ ქვეყნებში კი გაიზარდა ქართულ ორგანიზებულ დაჯგუფებათა დანაშაული.

გიორგი კვირიკაშვილის ინიციატივებს ოკუპირებული აფხაზეთისა და ცხინვალის რეგიონის მისამართით საოკუპაციო ხაზთან ვაჭრობის წახალისებასა და ჟენევის ფორმატის გაფართოებაზე, რათა მას კონფლიქტის პოლიტიკური გადაწყვეტის მანდატიც მიენიჭოს, ცხინვალიდან უკვე მოჰყვა გამოხმაურება და განცხადებები, რომ სანამ თბილისი სამხრეთ ოსეთს "რესპუბლიკად" არ აღიარებს და ბოდიშს არ მოიხდის ყველა წინა ხელისუფლების ქმედების გამო, რაიმე თანამშრომლობაზე საუბარი მხოლოდ "ლირიკა" და "პოპულიზმია", რასაც არაფერი მოჰყვება.

22 დეკემბერს სტოკჰოლმის სავაჭრო პალატის საერთაშორისო სასამართლოში უკრაინული "ნაფტოგაზისა" და რუსული "გაზპრომის" გაჭიანურებულ ოთხწლიან დავას საბოლოო წერტილი დაესვა. სასამართლომ ამ კონფლიქტის საქმეზე დასკვნითი განაჩენი გამოიტანა, რომელიც გასაჩივრებას აღარ ექვემდებარება.

საქართველოს ყოფილმა პრეზიდენტმა და ოდესის ოლქის  ექსგუბერნატორმა მიხეილ სააკაშვილმა, შესაძლოა, უკრაინა დატოვოს და საცხოვრებლად ჰოლანდიაში გადავიდეს. სააგენტო "ფრანს პრესის" ინფორმაციით, მან ნიდერლანდების სამეფოში გამგზავრების ნებართვა ადვოკატის დახმარებით მოითხოვა, რაზედაც დადებითი პასუხი მიიღო, რასაც თავად არ ადასტურებს. ჰოლანდიაში მის წასვლას ალოგიკურად მიიჩნევს პოლიტოლოგთა ნაწილიც.

26 დეკემბერს თბილისში სომხეთის პრეზიდენტი ჩამოდის და ერევანში დიდი მოლოდინია, რომ ოკუპირებული სამხრეთ ოსეთის მიმართულებით, როკის გვირაბის გავლთ ტვირთების გატარებაზე ქართული მხარე ბოლოს და ბოლოს თანხმობას იტყვის. "საქართველოს პოლიტიკის ინსტიტუტის" დამფუძნებელი კორნელი კაკაჩიას განცხადებით, ამგვარი შეთანხმება მიუღებელია და თუკი ხელისუფლება თანხმობას განაცხადებს, ამას საზოგადოებაში დიდი რეზონანსნი მოჰყვება.

საბავშვო ბაღები შესაძლოა იმ ოჯახებისთვის გახდეს ფასიანი, ვისი წლიური შემოსავალიც 40 000-ს ლარს აჭარბებს. როგორ პრემიერ მინისტრმა გიორგი კვირიკაშვილმა განაცხადა, ამის მიზეზი ბავშვების დიდი ნაკადია, რომელსაც სახელმწიფო ხარჯები ვეღარ წვდება.

წელს რუსეთში გამართული მასშტაბური სამხედრო წვრთნების - "ზაპად-2017"-ის სცენარი სულაც არ გულისხმობდა ტერორიზმთან ბრძოლას, როგორც ეს რუსეთის ხელისუფლებას ჰქონდა გამოცხადებული. სინამდვილეში რუსებმა დასავლეთ ევროპაში სამიზნეების დაბომბვის, ბალტიის ქვეყნების აეროპორტებისა და ნავსადგურების ხელში ჩაგდების და, ასევე, ნეიტრალურ შვედეთსა და ფინეთზე თავდასხმის სიმულირება მოახდინეს.

წელს საქართველოში კონტრაბანდის უპრეცედენტო ზრდაა, როგორიც ადრე არ ყოფილა. ფაქტობრივად, ყოველ მეორე დღეს მჟღავნდება თამბაქოსა და ძვირფასი ლითონების კონტრაბანდის ფაქტები. მარტო თამბაქოს შემთხვევაში 2017 წელს აღძრული სისხლის სამართლის საქმეების რაოდენობა, შარშანდელთან შედარებით, 3-ჯერ გაიზარდა. სპეციალისტების ინფორმაციით, წლის განმავლობაში ბიუჯეტმა სიგარეტის კონტრაბანდის გამო რამდენიმე ათეული მლნ ლარით იზარალა. უკვე აღმოჩენილია ნახევარი მილიონი კოლოფი უაქციზო სიგარეტი. სავარაუდოდ, უფრო მეტი ქვეყანაში არალეგალურად შემოვიდა და გასაღდა კიდეც.

საქართველო-რუსეთის საზღვრებზე ტვირთბრუნვის მონიტორინგი ნეიტრალურმა მებაჟეებმა, შესაძლოა, უკვე იანვრიდან განახორციელონ და 2018 წელს მაინც მოხდეს იმ ხელშეკრულების აღსრულება, რომელიც საქართველოსა და რუსეთს შორის 2011 წელს რუსეთის მსო-ში გაწევრიანებაზე საქართველოს თანხმობის სანაცვლოდ გაფორმდა.

პარლამენტის სხდომაზე დეპუტატები სარეგისტრაციო ბარათს სხვის მაგივრად ატარებენ. როგორც გუშინ რიგგარეშე სხდომის გახსნისას აღმოჩნდა, რეგისტრაცია 9 დეპუტატმა ისე გაიარა, რომ სესიაზე არ ყოფილა. აღსანიშნავია, რომ სარეგისტრაციო ბარათის სხვის მაგივრად გამოყენების გარდა, პარლამენტში არის შემთხვევები, როდესაც დეპუტატები ხმას სხვის მაგივრად აძლევენ.

საქართველოს საზღვარზე, ზემო ლარსზე, რუსულმა მხარემ ტერორისტულ საქმიანობაში ეჭვმიტანილი დააკავა, რომელიც რუსეთში აპირებდა შესვლას. ინფორმაციას რუსული მედია ავრცელებს, რომელიც, ასევე, წერს, რომ ეს არ არის პირველი შემთხვევა, როდესაც საქართველოდან რუსეთში შესვლას სავარაუდო ტერორისტი ცდილობს.

"საქართველომ არც თურქეთთან და არც ამერიკასთან ურთიერთობა არ უნდა გაიფუჭოს. შესაბამისად, ქართულმა მხარემ სწორი გადაწყვეტილება მიიღო, როცა პოზიციის გამოხატვისგან არაოფიციალურად თავი შეიკავა", - აღნიშნა პოლიტოლოგმა ნიკა ჩიტაძემ "რეზონანსთან" გაერო-ს გენერალურ ასამბლეაზე იერუსალიმის სტატუსთან დაკავშირებით თურქეთის ინიციატივით წარდგენილი რეზოლუციის კენჭისყრისას ქართული დელეგაციის გადაწყვეტილებასთან დაკავშირებით.