ევროპარლამენტის წევრები საქართველოში ბოლო პერიოდში განვითარებულ მოვლენებს ეხმაურებიან და საქართველოს მთავრობას ღია წერილით მიმართავენ: "გვსურს გამოვხატოთ ღრმა შეშფოთება საქართველოში ახლახან განვითარებული მოვლენების გამო, რომელიც ქვეყნის სტაბილურობასა და დემოკრატიას უქმნის საფრთხეს", - აღნიშნულია განცხადებაში.

"თავისუფალი დემოკრატების" ერთ-ერთი ლიდერის, ზურაბ აბაშიძის აზრით, წამებისა და არაადამიანური მოპყრობის ამსახველი ვიდეოკადრების გავრცელების უკან ხელისუფლება დგას. ეს განცხადება აბაშიძემ პარლამენტის პლენარულ სხდომაზე გააკეთა.

"ძალიან მალე სტალინის სურათი ყველა კაბინეტში დაიკიდება, რადგან ყველა მიხვდება, რომ ის გენიალური პიროვნება იყო, მან დიდი საქმეები გააკეთა", - ეს განცხადება კოალიცია "ქართული ოცნების" წევრმა გოგი თოფაძემ "მაესტროს" ეთერში, "ნაციონალური მოძრაობის წევრ" გიორგი კანდელაკთან დებატებისას გააკეთა.

თავდაცვისა და უსაფრთხოების კონფერენციაზე საქართველოს თავდაცვის მინისტრმა თინა ხიდაშელმა განაცხადა, რომ მოლოდინი, რომელიც ნატოსთან მიმართებით აქვს ქართველ ხალხს, მკრთალდება, რადგან რეალობა უხეშია.

ბოლო პერიოდში "რუსთავი 2"-ის სასამართლომ და წამების კადრების გავრცელებამ ქვეყანაში სიტუაცია დაძაბა. ამას ემატება პრემიერისა და საპარლამენტო უმრავლესობის ახალი და მწვავე დაპირისპირება პრეზიდენტთან. შეგახსენებთ, რომ ჯერ პარასკევს საპარლამენტო უმრავლესობამ თქვა უარი ქვეყანაში არსებულ ვითარებასთან დაკავშირებით პრეზიდენტთან კონსულტაციის გავლაზე, შაბათს კი პრეზიდენტის განცხადების საპასუხოდ, რომელშიც გიორგი მარგველაშვილი პრემიერთან და პარლამენტის თავმჯდომარესთან შეხვედრას ითხოვდა, პრემიერმა ღარიბაშვილმა განაცხადა, რომ ის "ხალხს ხვდება".

სასამართლომ 17 მაისის საქმეზე ბრალდებულების მიმართ გამამართლებელი განაჩენი გამოიტანა. 17 მაისის აქციის დარბევის საქმეზე თავდაპირველად 5 კაცი იყო ბრალდებული, რომელთაც შეკრებისა და მანიფესტაციის ხელის შეშლა ედებოდათ ბრალად. მათგან ერთზე, მამა ანთიმოზზე სამართლებრივი დევნა სასამართლო განხილვების პირველ ეტაპზევე შეწყდა, ხოლო 4 ბრალდებულზე საქმის წარმოება ამ დრომდე გრძელდებოდა.

რამდენიმე დღის წინ ისევ გავრცელდა წამების ამსახველი ფარული ჩანაწერი, რამაც პოლიტიკურ პარტიებს შორის დაპირისპირება გამოიწვია. საქართველოს პრემიერ-მინისტრის, ირაკლი ღარიბაშვილის ინფორმაციით, ადამიანების წამებისა და გაუპატიურების ამსახველ ვიდეოკადრებს მედიასივრცეში თავად "ნაციონალური მოძრაობა" ავრცელებს, მიზეზად კი "ნაციონალების" კომერციული ინტერესი დაასახელა.

"რუსთავი 2"-ის გენერალური დირექტორი ნიკა გვარამია მხარდამჭერებს დღეს სასამართლოსთან და ტელეკომპანიის შენობასთან მისვლისკენ მოუწოდებს. როგორც ამბობს, ხელისუფლებიდან მიიღო ინფორმაცია, რომ დღეს სასამართლო ქიბარ ხალვაშის სარჩელს დააკმაყოფილებს და ტელეკომპანიის 100%-ს მას გადასცემს, და რომ დღეს ან ხვალ "რუსთავი 2"-ში აღმასრულებლები მივლენ. გვარამიას თქმით, ეს იქნება ძალისმიერი ჩარევა, რასაც თავადაც ძალას დაუპირისპირებენ. ამიტომ, ხალხს მოუწოდებს, მივიდნენ და დაიცვან ტელეკომპანია და ზოგადად ქვეყანაში დემოკრატიული ღირებულებები.

ცხინვალის მარიონეტული რეჟიმის ლიდერმა ლეონიდ თიბილოვმა გუშინ ცხინვალში, რუსეთის პრეზიდენტის თანაშემწე ვლადისლავ სურკოვთან შეხვედრის შემდეგ განაცხადა, რომ "რესპუბლიკის" რუსეთის შემადგენლობაში გაწევრიანებაზე რეფერენდუმის ჩატარებას გეგმავს.

ზუგდიდში წამებისა და სექსუალური ძალადობის კადრები საჯაროდ აჩვენეს. ძალადობის ამსახველი მასალა ქალაქის ცენტრში, გამსახურდიას ძეგლთან, პროექტორების მეშვეობით გაუშვეს. კადრები რამდენჯერმე გაიმეორეს და მისი ნახვა ნებისმიერ გამვლელს შეეძლო.

აშშ-ის ეროვნულ-დემოკრატიული ინსტიტუტის ("ენდიაი") მიერ ჩატარებული გამოკითხვის იმ ნაწილმა, რომელიც პოლიტიკური პარტიების რეიტინგს ეხება, პოლიტიკურ წრეებსა და ზოგადად ქართულ საზოგადოებაში არაერთგვაროვანი რეაქცია გამოიწვია.

გუშინ ოპერასთან "გაზპრომის" წინააღმდეგ გამართულ აქციაზე ტელეკომპანია "ტაბულას" დირექტორი თამარ ჩერგოლეიშვილი და რამდენიმე პირი "გაზპრომის" საწინააღმდეგო პოსტერების გაკვრის დროს დააკავეს. შინაგან საქმეთა სამინისტროს ცნობით, ჩერგოლეიშვილი ადმინისტრაციულ სამართალდარღვევათა კოდექსის 150-ე მუხლის საფუძველზე იქნა დაკავებული, რაც თვითმმართველი ორგანოს იერსახის დამახინჯებას გულისხმობს.