ისრაელის წყაროების ცნობით, რუსეთის მიერ სირიისათვის "ეს-300"-ის ტიპის ჰაერსაწინააღმდეგო სისტემების გადაცემის საპასუხოდ, ისრაელი განიხილავს, გადახედოს მორატორიუმს და მიიღოს გადაწყვეტილება თანამედროვე უპილოტო საფრენი აპარატების მიყიდვაზე საქართველოსა და უკრაინისათვის, რომლებიც რუსეთის მტრებად მიიჩნევიან.

რუსეთის გზების სააგენტომ - "როსავტოდორმა" - გზების მშენებლობის 2019-21 წლების პროექტში ჩეჩნეთისა და საქართველოს დამაკავშირებელი გზის მშენებლობაც შეიტანა, რისთვისაც 2.633 მლრდ რუბლია (დაახლოებით 660 მლნ ლარი) განსაზღვრული. საუბარია ჩეჩნეთის იტუმე-ყალეს რაიონისა და საქართველოს ახმეტის რაიონის დამაკავშირებელ ავტომაგისტრალზე, რომლის მშენებლობაც 20 წლის წინ შეჩერდა.

"ადამიანის შეწყალება ჰუმანიზმის ფორმა გახლავთ და მერაბიშვილის ჯანმრთელობასთან დაკავშირებით ის, რაც საზოგადოებისათვის არის მიწოდებული, ექიმების უმრავლესობისთვის ნამდვილად ღიმილის მომგვრელია, რადგან მისი ამჟამინდელი მდგომარეობის აღწერა არ გახლავთ მისი გათავისუფლების მიზანი", - ვანო მერაბიშვილის შესაძლო შეწყალების შესახებ "რეზონანსს" პოლიტოლოგმა სოსო ცისკარიშვილმა განუცხადა.

პრეზიდენტებს, პარლამენტის თავმჯდომარეებსა და მინისტრებს, უფლებამოსილების ვადის ამოწურვიდან 1 წლის შემდეგ, სახელმწიფო დაცვა აღარ მოემსახურებათ. შესაბამის ცვლილებას ახალი კანონპროექტი ითვალისწინებს, რომელიც პარლამენტში უკვე შევიდა.

"თუკი მერაბიშვილის ჯანმრთელობის მდგომარეობა ასეთი მძიმეა, მაშინ ის შეწყალებული უნდა იქნას. "ქართული ოცნების" მიდგომა ზოგადად ამ საკითხისადმი არ არის ერთგვაროვანი; თუ მერაბიშვილი ციხეშია, მურუსიძე არ უნდა იყოს უზენაესი სასამართლოს მოსამართლე; თუ ის უზენაესი სასამართლოს მოსამართლეა, მერაბიშვილი არ უნდა იყოს ციხეში", - აცხადებს პოლიტოლოგი ვახტანგ ძაბირაძე, ვისაც "რეზონანსი" ვანო მერაბიშვილსა და სხვა საკითხებზე გაესაუბრა.

ყოფილი თანაგუნდელები, „ნაციონალები" და „ევროპული საქართველო", ერთმანეთს უპირისპირდებიან, რადგან ირკვევა, რომ გაერთიანებული ოპოზიციის მხარდამჭერი სიების გადამოწმება „ევროპული საქართველოს" პოლიტსაბჭოს წევრის განცხადების საფუძველზე დაიწყო და ახლა ამ საქმეს პროკურატურა იძიებს.

სირიის კონფლიქტში რუსეთსა და ისრაელს შორის ურთიერთობები კიდევ უფრო იძაბება. „რია ნოვოსტი" ბაშარ ალ-ასადის ადმინისტრაციაზე დაყრდნობით წერს, რომ მოსკოვი სირიას ეს-300 ტიპის საზენიტო-სარაკეტო სისტემებს მიაწვდის, რომელსაც შეუძლია 250 კილომეტრის რადიუსში საჰაერო აპარატების ჩამოგდება.

რუსეთსა და ისრაელს შორის კი სიტუაცია მას შემდეგ დაიძაბა, რაც ისრაელის ავიაიერიშის დროს სირიის სამთავრობო ძალებმა შემთხვევით რუსული სადაზვერვო თვითმფრინავი ჩამოაგდეს, რის შედეგადაც 15 რუსი სამხედრო დაიღუპა. მართალია, მოსკოვი აღიარებს, რომ რუსული "ილ-20" რუსულივე რაკეტით სირიის საზენიტო დანაყოფმა ჩამოაგდო, მაგრამ ირწმუნება, რომ ეს ისრაელის მოირიშეების მიერ მიზანმიმართული პროვოცირების ბრალია და "ამ მტრულ ქმედებას მოსკოვი ადეკვატურად გასცემს პასუხს".