ოკუპირებული გალის შემდეგ ახლა უკვე ახალგორშიც უქმდება ქართული სკოლები. გადაწყვეტილია, რომ სექტემბრიდან ოკუპირებულ სამხრეთ ოსეთში არსებულ 8 ქართულ სკოლაში ქართულად სწავლება აიკრძალება. მოსწავლეები რუსული სახელმძღვანელოებით ისწავლიან, ის ქართველი პედაგოგები კი, ვინც ე.წ. ატესტაციას თავის საგანში რუსულად ვერ ჩააბარებენ, სამსახურის გარეშე დარჩებიან და მათ ცხინვალიდან ოსი პედაგოგები შეცვლიან.

"საქართველოს ერთ-ერთი ამოცანა არის ტერიტორიული მთლიანობის აღდგენა, რაც რეალურად არის ნდობის აღდგენა აფხაზებსა და ცხინვალის რეგიონში მცხოვრებ ოსებთან. ამიტომ რა ნაბიჯებსაც უნდა ვდგამდეთ, ყოველთვის ყურადღებას ვაქცევთ, როგორ შეხედავს ამას ევროპა, მაგრამ გვავიწყდება იმის გათვალისწინება, როგორ შეგვხედავენ ამ რეგიონის მცხოვრებლები. იმიტომ რომ მათ, პრინციპში, ის აქვთ გადასაწყვეტი, რომელ ქვეყანაში ურჩევნიათ ცხოვრება და რამდენადაც არასტაბილური, არაწყნარი და არაგონივრული ქვეყნის შთაბეჭდილებას დავტოვებთ, მით უფრო მიუღებელი გახდება მათთვის საქართველოსკენ შემოტრიალება და ალბათ ამაზეც უნდა ვიფიქროთ," - ამბობს პოლიტოლოგი რამაზ საყვარელიზე "მთელ კვირასთან" ხელისუფლებისა და პრეზიდენტის ადმინისტრაციის მორიგ დაპირისპირებასთან დაკავშირებით.

"კახი კალაძეს პიროვნული გამოცდილება და თუნდაც ის ფიზიკური გამოცდილება, რომელიც სპორტში აქვს გადატანილი, ხასიათის წრთობა ძალიან კარგ სიმაღლეზე აქვს. იმედია, გამარჯვების შემთხვევაში იგი არ მიემატება დაპირებების მიმცემ და მატყუარა მერთა სიას" - აცხადებს რუსთაველის პრემიის ლაურეატი რევაზ მიშველაძე, რომელსაც "მთელი კვირა" თვითმმართველობის არჩევნებთან დაკავშირებით და მიმდინარე საკითხებზე ესაუბრა.

კომკავშირლები, მედროვეები, "ნაციონალებიდან" პორტირებულები - გიორგი მარგველაშვილმა ამ სიტყვებით შეამკო "ქართული ოცნების" დეპუტატები, რომლებიც მისგან პრეზიდენტის საპარლამენტო მდივნის, ანა დოლიძის, დაგმობას ითხოვდნენ და მისმა ამგვარმა განცხადებამ პრეზიდენტის ადმინისტრაციასა და საპარლამენტო უმრავლესობას შორის ისედაც ქრონიკულად მწვავე ურთიერთობა უკიდურესად გაამწვავა. შედეგად კი, მომავალში, დიდი ალბათობით, შესაძლოა, პრეზიდენტის წარმომადგენლის - ანა დოლიძის პარლამენტში გამოსვლისას მმართველი პარტიის წევრებმა დარბაზი დატოვონ.

სოხუმში პატრულირება ნიღბიანმა ე.წ. სპეცრაზმელებმა დაიწყეს. მიზეზი ოკუპირებულ აფხაზეთში კრიმინოგენური ვითარების უკიდურესი გამწვავება გახდა.

"დავიწყებთ პერმანენტულ და საჭიროების მიხედვით უწყვეტ აქციებს არამხოლოდ მთავარ პროკურატურასთან, არამედ სხვა სახელმწიფო დაწესებულებებთან," - ამ განცხადებას "ბავშთა სამყაროს" აქციონერები გიორგი მაჭავარიანის დაკავებასთან დაკავშირებით ავრცელებენ. მათი თქმით, დირექტორი უსამართლოდ არის დაკავებული და გამოძიებისგან რეალური დამნაშავის დადგენას მოითხოვენ.

"ალბათობა იმისა, რომ თბილისში მერის არჩევნების მეორე ტური შედგეს, არის ძალიან მცირე, ვინაიდან ადმინისტრაციული რესურსის გარეშეც კალაძე გაცილებით უფრო პოპულარულია დანარჩენ კანდიდატებზე" - აცხადებს ექსპერტი პეტრე მამრაძე, რომელსაც "რეზონანსი" თვითმმართველობის არჩევნებთან დაკავშირებით და მიმდინარე საკითხებზე ესაუბრა.

"დარწმუნებული ვარ, რომ ივანიშვილი საქართველოში მიმდინარე პროცესების მოთვალთვალეა. ეს ეხება როგორც ეკონომიკურ, ისე საშინაო თუ საგარეო პოლიტიკურ საკითხებს," - აცხადებს პოლიტოლოგი იგორ კვესელავა და აღნიშნავს, რომ ქვეყანას ძლიერი მინისტრები რომ ჰყოლოდა, ბიძინა ივანიშვილის საჭიროება არ იქნებოდა, მაგრამ როდესაც აღმასრულებელი ხელისუფლება სუსტია, "ივანიშვილი ყველაფერზე მაღლა დგას."

"მართალია, ამის დამამტკიცებელ ინფორმაციას მე არ ვფლობ, მაგრამ შეიძლება ვივარაუდოთ, რომ პოროშენკოს გადაწყვეტილება რამდენიმე დღით ადრე გახდა ცნობილი სააკაშვილისთვის იმავე პოროშენკოს მეშვეობით და მან დროულად დატოვა უკრაინა, რითაც სერიოზულ გართულებებს დააღწია თავი უკრაინის ხელისუფლებამ. ექსტრადირებაზე უფრო ხელსაყრელი პოროშენკოსთვის იყო სააკაშვილის ადრე გასვლა უკრაინიდან" - ამბობს პოლიტოლოგი სოსო ცინცაძე, რომელსაც "რეზონანსი" მიხეილ სააკაშვილისთვის უკრაინის მოქალაქეობის ჩამორთმევის თაობაზე ესაუბრა.

არჩევნებამდე 3 თვეზე ცოტა ნაკლებია დარჩენილი და სოციოლოგიური კვლევებით ერთგვარი მანიპულაციაც უკვე დაიწყო. ამ დროისთვის გამოქვეყნებულია "ენ-დი-აი"-ს კვლევა. "რეზონანსთან" ასევე საუბრობენ, რომ "ქართულმა ოცნებამაც" ჩაატარა პარტიის შიდა კვლევა და პროცენტული მონაცემები და პოლიტიკური სურათი განსხვავებულია. ერთადერთი მსგავსება ისაა, რომ თბილისის მერობისთვის ბროლაში პირველი ადგილი უჭირავს კახა კალაძეს, თუმცა "ენ-დი-აი"-ს კვლევაში მას 30% აქვს და მეორე ტურის ალბათობა დიდია, "ოცნების" შიდა კვლევაში - 40%-მდე და მეორე ტურის საჭიროება არ ჩანს, რადგან ოპოზიცია სერიოზული კონკურენციისათვის საკმარის ხმებს ჯამურადაც ვერ აგროვებს.

მთავარმა პროკურატურამ "ბავშვთა სამყაროს" დირექტორი გიორგი მაჭავარიანი, ამავე საზოგადოების შიდა უსაფრთხოების სამსახურის თანამშრომელი მ.თ. დააკავა. მთავარი საგამოძიებო უწყების ინფორმაციით, საქმეზე ჩატარებული გამოძიებით დადგინდა, რომ სახანძრო უსაფრთხოების წესების დარღვევის და სამსახურებრივი გულგრილობის გამო შეუძლებელი აღმოჩნდა ხანძრის ლოკალიზება და ჩაქრობა. შედეგად, ხანძარი გავრცელდა "ბაზრობა ნიუ მოლის" მთელ ტერიტორიასა და სავაჭრო ცენტრ "ბავშვთა სამყაროს" შენობაში, რამაც ამ შენობების, მათში არსებული სარეალიზაციო საქონლისა და ინვენტარის განადგურება გამოიწვია.

პრეზიდენტის ადმინისტრაციის წევრსა და "ქართული ოცნების" ლიდერებს შორის დაპირისპირება კვლავ გრძელდება. ამჯერად სიტყვიერი დაპირისპირება პარლამენტის თავმჯდომარე ირაკლი კობახიძესა და პრეზიდენტის საპარლამენტო მდივან ანა დოლიძეს შორის მოხდა. მიზეზი დოლიძის მიერ კობახიძის მისამართით გამოთქმული მწვავე შეფასებები გახდა. რიგგარეშე სხდომაზე პარლამენტის თავმჯდომარემ პრეზიდენტის საპარლამენტო მდივანს სიტყვა რამდენჯერმე შეაწყვეტინა.