საქართველო კორონავირუსს ნელ-ნელა ამარცხებს - ბოლო დღე-ღამის განმავლობაში ინფიცირების მხოლოდ ერთი შემთხვევა გამოვლინდა, გამოჯანმრთელებულთა რიცხვი კი ოთხით გაიზარდა. ეს იმის ფონზე ხდება, როდესაც მსოფლიო ლიდერი ქვეყნები ვირუსთან გამკლავებას ვერ ახერხებენ,ხოლო სამხრეთ ამერიკის კონტინენტი კი კორონავირუსის ახალ ეპიცენტრად იქცა.

საარჩევნო კოდექსში საკონსტიტუციო ცვლილებების შემთხვევაში, მიმდინარე წლის საპარლამენტო არჩევნების შედეგად, სავარაუდოდ თუ როგორ გადანაწილდება 30 მაჟორიტარული ოლქი, ცნობილია. 30 მაჟორიტარული ოლქიდან 12 დასავლეთ, 18 კი აღმოსავლეთ საქართველოში გადანაწილდება. რაც შეეხება დედაქალაქს, თბილისში 22-ის ნაცვლად მხოლოდ 8 ოლქი იქნება.

„მაჟორიტარებთან დაკავშირებით საბოლოო მონახაზი, სავარაუდოდ, ივნისის ბოლოს გამოიკვეთება, ჯერ ასეთი მონახაზი არ არის. მთავარია, დაკანონდეს ის 30 მაჟორიტარული ოლქი“ - ასე ეხმაურება „რესპუბლიკური პარტიის“ ერთ-ერთი ლიდერი დავით ბერძენიშვილი მაჟორიტარობის ერთიან კანდიდატებთან დაკავშირებით ოპოზიციაში დაწყებულ კონსულტაციებს.

ვინ შეცვლის შერიგებისა და სამოქალაქო თანასწორობის საკითხებში სახელმწიფო მინისტრის თანამდებობაზე ქეთევან ციხელაშვილს, არ დრომდე უცნობია. როგორც ყოფილი სახელმწიფო მინისტრი პაატა ზაქარეიშვილი „რეზონანსთან" საუბრისას აღნიშნავს, მის ადგილს სავარაუდოდ ისეთი პირი დაიკავებს, რომელიც უშიშროებისთვის მისაღებია. კონკრეტულად გვარის დასახელება ზაქარეიშვილმა არ ისურვა, რადგან არ სურს მას „საქმე გაუფუჭოს".

პრეზიდენტ სალომე ზურაბიშვილის განცხადებით, ახალი კორონავირუსით შექმნილმა კრიზისის გამო შესაძლოა რუსეთმა მეზობელ ქვეყნებზე აგრესია გახორციელოს. ანალიტიკოს ვახტანგ ძაბირაძის აზრით, ეს გარკვეულწილად საფუძვლიანი მოსაზრებაა, რადგან რუსეთმა, საკუთარი პრობლემებიდან გამომდინარე, შესაძლოა მოსახლეობის ყურადღების სხვა თემაზე გადატანის ხერხს მიმართოს და ამისთვის ამა თუ იმ ქვეყანაზე გარკვეული აგრესიის განხორციელება ერთ-ერთი გამოსავალია.

„მაჟორიტარად ნამდვილად არ ვიქნები. სიაში ვიქნები თუ არა, არც ეს არაა ჩემთვის ცნობილი", - ასე ეხმაურება უმრავლესობის დეპუტატი რევაზ არველაძე „ქართული ოცნების" გენერალური მდივნის კახა კალაძის განცხადებას მმართველი პარტიის მიერ საარჩევნო სიის შედგენაზე მუშაობის დაწყების შესახებ.

საგანგებო მდგომარეობის მოქმედების ვადის გასვლის შემდეგ, მთელი ქვეყნის მასშტაბით საკარანტინო ზონებად მხოლოდ ბოლნისის მუნიციპალიტეტის ორი სოფელი - მუშევანი და გეტა რჩება. ეს სწორედ ის სოფლებია, სადაც, დაავადებათა კონტროლის ცენტრის ხელმძღვანელის მოადგილე პაატა იმნაძის ვარაუდით, კორონავირუსის გავრცელების თვალსაზრისით მოვლენები შესაძლოა იტალიის მსგავსი დრამატული სცენარით განვითარდეს. „რეზონანსი" ამ სოფლების რწმუნებულებს ესაუბრა.

„მოულოდნელი იყო. აბა, საიდან უნდა მოეტანა ასეთი ზრაპარი... მათ ქვეყანას უმძიმესი მდგომარეობა აქვს და ჩვენ გვაქვს ევროპაში ერთ-ერთი ყველაზე კარგი შედეგი და მაგათ აქვთ ერთ-ერთი ყველაზე ცუდი და ასეთი განცხადება როიგორ შეიძლება?" - ასე აფასებს „რეზონანსთან" საუბრისას თბილისის ინფექციური საავადმყოფოს დირექტორი თენგიზ ცერცვაძე სომხეთის ჯანდაცვის მინისტრის არსენ ტოროსიანის კრიტიკულ განცხადებას. ტოროსიანს კორონავირუსთან დაკავშირებით საქართველოს ოფიციალურ სტატისტიკურ მონაცემებში ეჭვი შეაქვს და ამბობს, რომ სომხეთის ჯანდაცვის სისტემა საქართველოსას ჯობს.

„არც შემოთავაზება ყოფილა იქიდანაც არ შემოუხევიათ კალთები და არც ჩვენ არ გამოგვიჩენია ინიციატივა გამომდინარე იქიდან, რომ ზოგადად ჩვენი მთავარი საარჩევნო სტრატეგია აგებული გვექნება ლოზუნგზე „არც ქოცები, არც ნაცები" და გვინდა, რომ მოსახლეობისთვის მესამე არჩევანი წარმოვაჩინოთ", - ასე აფასებს „რეზონანსთან"პარტია "თავისუფალი საქართველო"-ს თავმჯდომარე კახა კუკავა 2020 წლის საპარლამენტო არჩევნებისთვის ოპოზიციური პარტიების მიერ, საერთო მაჟორიტარ კანდიდატების შერჩევას.

„მხოლოდ აშშ ამას ვერ გადაწყვეტს, რადგან ალიანსის ყველა წევრმა უნდა დაუჭიროს მხარი... თუ ნატო-ში ამ სახით შესვლას დავთანხმდებით, მაშინ სამუშაო იქნება იმ წევრებთან, რომლებიც წინააღმდეგი არიან", - ასე აფასებს „რეზონანსთან" საუბრისას ანალიტიკოსი თორნიკე შარაშენიძე ახალ ინიციატივას, რომლის შესახებაც უკრაინის საკითხებში ამერიკის შეერთებული შტატების სახელმწიფო დეპარტამენტის ყოფილმა სპეცწარმომადგენელმა, კურტ ვოლკერმა ისაუბრა ნატო-ში საქართველოს, უკრაინისა და მოლდოვის მიღებასთან დაკავშირებით.

„ვთვლი, რომ ხელისუფლებამ ვირუსს დღემდე წარმატებით ებრძოლა და საგანგებო მდგომარეობა ხელისუფლების წარმატებული ქმედებით სრულდება, ოღონდ ამ წარმატებას არჩევნებისთვის რამდენად გამოიყენებენ, ეს აღარ მესმის იმიტომ, რომ სხვა ფლანგზე ძალიან რთულად აქვთ საქმე," - ასე აფასებს „რეზონანსთან" ანალიტიკოსი ვახტანგ ძაბირაძე, კორონავირუსის პრევენციის გამო, შემოღებული საგანგებო მდგომარეობის დასრულებას.

„ნუ მოაწერენ ხელს, საკონსტიტუო ცვლილებები მაინც გავა. თავადაც ხვდებიან, რომ კატასტროფის პირას არიან, რამის თავი რომ ჰქონდეთ, აქამდე გააკეთებდნენ. მაგათი საქმე დამთავრებულია, ხელისუფლებაში ვეღარ მოვლენ" - ასე ეხმაურება ისტორიკოსი გიორგი ოთხმეუზური საკონსტიტუციო ცვლილებებთან დაკავშირებით არსებულ პერიპეტიებს.